ଭୁବନେଶ୍ୱର, ୨୫।୫ (ତପନ ସ୍ବାଇଁ): କଳିଙ୍ଗ ଷ୍ଟାଡିୟମ ଟେନିସ କମ୍ପ୍ଲେକ୍ସରେ ଅନୁଷ୍ଠିତ ୧୪ ଓ ୧୬ ବର୍ଷରୁ କମ୍ ଚାମ୍ପିୟନଶିପ୍ ସିରିଜ (ସିଏସ୭) ଟେନିସ ଟୁର୍ନାମେଣ୍ଟରେ ଓଡ଼ିଶାର ଆହାନ ମିଶ୍ର ତ୍ରିମୁକୁଟ ହାସଲ କରିଛନ୍ତି। ସେ ୧୪ ଓ ୧୬ ବର୍ଷରୁ କମ୍ ସିଙ୍ଗଲ୍ସ ଏବଂ ୧୬ ବର୍ଷରୁ କମ୍ ଡବଲ୍ସରେ ଚାମ୍ପିୟନ ହୋଇଛନ୍ତି।
୧୪ ବର୍ଷରୁ କମ୍ ବାଳକ ଫାଇନାଲରେ ଟପ୍ ସିଡ୍ ଆହାନ କର୍ନାଟକର ଇଶାୟୁ ଦେସାଇଙ୍କୁ ୬-୩, ୬-୦ ସେଟ୍ରେ ହରାଇଛନ୍ତି। ସେହିପରି ୧୬ ବର୍ଷରୁ କମ୍ ସିଙ୍ଗଲ୍ସ ଫାଇନାଲରେ ସେ ଅଣସିଡେଡ ଆନ୍ଧ୍ର ପ୍ରଦେଶର କେ. ସୌର୍ଯ୍ୟଙ୍କୁ ୬-୩, ୬-୧ ସେଟ୍ରେ ପରାସ୍ତ କରିଛନ୍ତି।
ଅନ୍ୟତମ ଓଡ଼ିଶା ଖେଳାଳି ସୁତଭ୍ୟ କର୍ମକାରଙ୍କୁ ସାଥିକରି ଖେଳିଥିବା ଆହାନ ୧୬ ବର୍ଷରୁ କମ୍ ବାଳକ ଡବଲ୍ସ ଫାଇନାଲରେ ଅନିକେତ ସାହୁ ଓ ଅଂଶୁମାନ ଆଚାର୍ଯ୍ୟଙ୍କୁ ୬-୦, ୬-୨ ସେଟ୍ରେ ହରାଇ ତ୍ରିମୁକୁଟ ପୂରଣ କରିଛନ୍ତି। ଅନ୍ୟପକ୍ଷରେ ଏସ୍ ବେସ୍ ଟେନିସ ଏକାଡେମୀରେ ଅଜୟ ନିଶଙ୍କଙ୍କଠାରୁ ପ୍ରଶିକ୍ଷଣ ନେଉଥିବା ଆହାନ ୧୬ ବର୍ଷରୁ କମ୍ ବାଳିକା ବର୍ଗ ଫାଇନାଲରେ ତାମିଲନାଡ଼ୁର ଲୋକେଶ ସନ୍ମିଥାଙ୍କୁ ୬-୧, ୬-୦ ସେଟ୍ରେ ହରାଇ ଚାମ୍ପିୟନ ହୋଇଛନ୍ତି। ୧୪ ବର୍ଷରୁ କମ୍ ବାଳିକା ସିଙ୍ଗଲ୍ସ ଟାଇଟଲ ଜିତିଛନ୍ତି ତାମିଲନାଡ଼ୁର ଲୋକେଶ ସନ୍ମିଥା। ସେ ଓଡ଼ିଶାର ଶାଜଫା ସେକ୍ଙ୍କୁ ୬-୦, ୬-୨ରେ ହରାଇ ଟାଇଟଲ ଜିତିଛନ୍ତି।
୧୪ ବର୍ଷରୁ କମ୍ ଡବଲ୍ସ ଫାଇନାଲରେ ଓଡ଼ିଶାର ଜଗତ ଜ୍ୟୋତି ପତି ଓ ସ୍ବୟମ ସାହୁ ଅନ୍ୟତମ ଓଡ଼ିଆ ଯୋଡ଼ି ରାୟାଂଶ ଦାସ ଓ ଶ୍ରେୟାନ ପଟ୍ଟନାୟକଙ୍କୁ ୬-୩, ୭-୫ରେ ହରାଇ ଚାମ୍ପିୟନ ହୋଇଛନ୍ତି। ଖୋର୍ଦ୍ଧା ଜିଲା ଟେନିସ ଆସୋସିଏଶନ (କେଡିଟିଏ) ସଭାପତି ମଧୁସୂଦନ ପାଢ଼ୀ ମୁଖ୍ୟ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। କେଡିଟିଏ ସମ୍ପାଦକ ଅସିତ ପ୍ରଧାନ, ଓଡ଼ିଶା ଟେନିସ ଆସୋସିଏଶନ ଉପସଭାପତି ତଥା ଟୁର୍ନାମେଣ୍ଟ ଡାଇରେକ୍ଟର ଦାମୋଦର ପ୍ରଧାନୀ, କାର୍ଯ୍ୟକାରିଣୀ ସଦସ୍ୟ ବିବେକାନନ୍ଦ ପଟ୍ଟନାୟକ, ଦୁଷ୍ମନ୍ତ ତୁଙ୍ଗା, ସମ୍ବିତ ପଟ୍ଟନାୟକ, ଟୁର୍ନାମେଣ୍ଟ ରେଫରି ଜତୀନ ବୈତ୍ସ୍ୟ ପ୍ରମୁଖ ଉପସ୍ଥିତ ଥିଲେ। ଭାରତର ୮ ରାଜ୍ୟରୁ ୭୦ ପ୍ରତିଯୋଗୀ ଏଥିରେ ଅଂଶଗ୍ରହଣ କରିଥିଲେ। ଚାମ୍ପିୟନ ଓ ରନରଅପ୍ ପ୍ରତିଯୋଗୀ ଯଥାକ୍ରମେ ୨୫ ଓ ୨୦ ଏଆଇଟିଏ ର଼୍ୟାଙ୍କିଙ୍ଗ୍ ପଏଣ୍ଟ ପାଇଛନ୍ତି।