ନୂଆଦିଲ୍ଲୀ,୧୮। ୧୧ (ପି.ଟି.): ଭାରତରେ ଆୟୋଜନ ହେବାକୁ ଥିବା ୧୭ ବର୍ଷରୁ କମ୍ ମହିଳା ବିଶ୍ୱକପ୍କୁ ଫିଫା ବାତିଲ କରିଛିି। ଏହା ୨୦୨୦ରେ ଆୟୋଜନ ହେବାର ଥିଲା, କିନ୍ତୁ କୋଭିଡ୍-୧୯ କାରଣରୁ ୨୦୨୧କୁ ଘୁଞ୍ଚାଇ ଦିଆଯାଇଥିଲା। କିନ୍ତୁ ମହାମାରୀର ପ୍ରକୋପ ଜାରି ରହିଥିବାରୁ ଶେଷରେ ବିଶ୍ୱ ଫୁଟବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ଏହାକୁ ବାତିଲ କରିବାକୁ ନିଷ୍ପତ୍ତି ନେଇଛି। ପ୍ରତିବଦଳରେ ଫିଫା ଭାରତକୁ ବିଶ୍ୱକପ୍ର ୨୦୨୨ ସଂସ୍କରଣର ଆୟୋଜନ ଅଧିକାର ପ୍ରଦାନ କରିଛି।
କୋଭିଡ୍-୧୯ କାରଣରୁ ବିଶ୍ୱ ଫୁଟବଲ ସାଂଘାତିକ ଭାବେ ପ୍ରଭାବିତ ହୋଇଛି। ଫଳରେ ବ୍ୟୁରୋ ଅଫ୍ ଦି ଫିଫା କାଉନସିଲ ଏହି ମେଗା ଇଭେଣ୍ଟକୁ ବାତିଲ କରିବାକୁ ନିଷ୍ପତ୍ତି ନେଇଛି। ଟୁର୍ନାମେଣ୍ଟକୁ ଥରେ ଘୁଞ୍ଚାଇ ଦିଆଯାଇଥିବାରୁ ପୁଣି ଥରେ ଘୁଞ୍ଚାଇବା ଲାଗି ଫିଫା ଅକ୍ଷମତା ପ୍ରକାଶ କରିବା ସହ ଟୁର୍ନାମେଣ୍ଟର ୨୦୨୦ ସଂସ୍କରଣକୁ ବାତିଲ କରାଯିବାକୁ ନିଷ୍ପତ୍ତି ନେଇଛି। ୨୦୨୨ ସଂସ୍କରଣର ଆୟୋଜନ ଅଧିକାର ୨୦୨୦ ଟୁର୍ନାମେଣ୍ଟର ଆୟୋଜକ ଅର୍ଥାତ୍ ଭାରତକୁ ପ୍ରଦାନ କରିବାକୁ ନିଷ୍ପତ୍ତି ନିଆଯାଇଛି ବୋଲି ଫିଫା ତରଫରୁ ସ୍ପଷ୍ଟ କରାଯାଇଛି। ଅନ୍ୟପକ୍ଷରେ କୋଷ୍ଟାରିକାକୁ ୨୦ ବର୍ଷରୁ କମ୍ ମହିଳା ବିଶ୍ୱକପ୍ର ୨୦୨୨ ସଂସ୍କରଣର ଆୟୋଜକ ଭାବେ ଘୋଷଣା କରାଯାଇଛି। ପ୍ରଥମେ ୧୭ ବର୍ଷରୁ କମ୍ ମହିଳା ବିଶ୍ୱକପ୍ ଚଳିତ ବର୍ଷ ନଭେମ୍ବରରେ ଆୟୋଜନ ହେବା କାର୍ଯ୍ୟକ୍ରମ ଥିଲା। ପରେ ବିଶ୍ୱରେ ଦେଖାଦେଇଥିବା ସ୍ବାସ୍ଥ୍ୟ ସଙ୍କଟ କାରଣରୁ ଏହାକୁ ଆସନ୍ତାବର୍ଷ ଫେବୃୟାରୀ- ମାର୍ଚ୍ଚକୁ ଘୁଞ୍ଚାଇ ଦିଆଯାଇଥିଲା।