ଦୈନନ୍ଦିନ ଜୀବନରେ ଆମେ ଯାହା ବି ଖାଉ ତା’ର ଭିନ୍ନ ଭିନ୍ନ ପ୍ରକାରର ସ୍ବାଦ ଥାଏ। ହେଲେ ଏମିତି କେହି କିଛି ଖାଇଛନ୍ତି କି, ଯାହାର ସ୍ବାଦ ହିଁ ନ ଥିବ। ନିକଟରେ ଜାପାନର ‘ଲାସନ’ ନାମକ ଏକ କମ୍ପାନୀ ତିଆରି କରିଛି ଏକ କ୍ୟାଣ୍ଡି, ଯାହା ସମ୍ପୂର୍ଣ୍ଣଭାବେ ସ୍ବାଦହୀନ। ଆଉ ତା’ର ନାଁ ହେଉଛି ‘ଅଜି ନୋ ଶିନାଈ’। ଏହି କ୍ୟାଣ୍ଡିର ନାହିଁ କିଛି ସ୍ବାଦ। ଅର୍ଥାତ୍ ଏହାକୁ ଖାଇବାବେଳେ ପାଟିକୁ ନା ମିଠା ଲାଗିବ ନା ଲାଗିବ ଖଟା, ନା ପୁଣି ଲାଗିବ ରାଗ ଅବା ଲୁଣି। ଏହାକୁ ତିଆରି କରିବା ପାଇଁ କେବଳ ଦୁଇଟି ସାମଗ୍ରୀର ବ୍ୟବହାର ହୋଇଛି। ପ୍ରଥମଟି ହେଉଛି ସିନ୍ଥେଟିକ ସୁଗର୍ର ବିକଳ୍ପ ଯାହାକୁ ପଲିଡେକ୍ସଟ୍ରୋଜ୍ କହନ୍ତି ଓ ଅନ୍ୟଟି ହେଉଛି ଅର୍ଗାନିକ ସୁଗରର ସବ୍ଷ୍ଟିଚ୍ୟୁଟ୍ ଏରିଥ୍ରିଟୋଲ। କମ୍ପାନୀର କହିବାନୁସାରେ କିଛି ଲୋକ କ୍ୟାଣ୍ଡି ଏଇଥିପାଇଁ ଖାଆନ୍ତି ଯେମିତିକି ତାଙ୍କ ପାଟି ସୁଖିବନି। ହେଲେ ସେମାନେ ମିଠା କ୍ୟାଣ୍ଡି ଖାଇବାକୁ ଚାହାନ୍ତିନି। ସେହିଭଳି ଆଉ କିଛିଙ୍କୁ ଆର୍ଟିଫିସିୟଲ ଫ୍ଲେଭର୍ ଭଲ ଲାଗେନା। ସେଥିପାଇଁ ଏହି ଫ୍ଲେଭରଲେସ୍ କ୍ୟାଣ୍ଡି ତିଆରି କରିଛୁ। ତେବେ ନ୍ୟୁଜ୨୪ର ଟେଷ୍ଟର୍ସଙ୍କ ମତରେ ଏହି କ୍ୟାଣ୍ଡିର ସ୍ବାଦ ଏକ ସ୍ପୋର୍ଟସ୍ ଡ୍ରିଙ୍କ ପରି ଯେଉଁଥିରେ ପ୍ରଚୁର ମାତ୍ରାରେ ପାଣି ମିଶାଇ ଦିଆଯାଇଥିବାରୁ ତା’ର ମିଠାପଣ କମିଯାଇଛି ପରି ଅନୁଭବ ହୁଏ।