କୁଆମରା,୯।୧୦(ଡି.ଏନ.ଏ.): ମୟୂରଭଞ୍ଜ ଜିଲାର ବିଭିନ୍ନ ସାପ୍ତାହିକ ହାଟରୁ ପଡ଼ୋଶୀ ରାଜ୍ୟକୁ ଅବାଧରେ ଗୋରୁ ଚାଲାଣ କରାଯାଉଥିଲେ ମଧ୍ୟ ପ୍ରଶାସନ ନୀରବଦ୍ରଷ୍ଟା ସାଜିଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଉଦଳା, ବାଲିଯୋଡ଼ା ପ୍ରଭୃତି ହାଟରୁ ସପ୍ତାହର ଦୁଇ ଦିନ ଗୋରୁଙ୍କୁ ପଶ୍ଚିମବଙ୍ଗ କଂସେଇଖାନାକୁ ଦଲାଲଙ୍କ ସହାୟତାରେ ଚାଲାଣ କରାଯାଉଛି। ରାତ୍ରି ସମୟରେ ପିକଅପ ଭ୍ୟାନରେ ୮ରୁ ୧୦ଟି ଗୋରୁଙ୍କୁ ଭର୍ତ୍ତି କରି ନିଆଯାଉଛି। ଦିନ ବେଳା ଦଳଦଳ ହୋଇ ଗୋରୁଙ୍କୁ ଏକାଠି ବାନ୍ଧି ନିଆ ଯାଉଛି। କିଛି ଦିନ ତଳେ ଚାଲାଣ ବେଳେ କୁଆମରା ନିକଟରେ ୯୭ ଗୋରଙ୍କୁ ଉଦ୍ଧାର କରି ବାଲେଶ୍ୱର ଗୋଶାଳାକୁ ପଠାଯାଇଥିଲା। ସେହି ଦିନଠାରୁ ଗୋଚାଲଣ ବନ୍ଦ ହୋଇ ଯାଇଥିବା ବେଳେ ପୁଣି ଏବେ ସପ୍ତାହର ରାତି ବେଳା ଟ୍ରକ୍ରେ ନିଆ ଯାଉଛି। ଫାଣ୍ଡି ଓ ଥାନା ସମ୍ମୁଖ ଦେଇ ଗୋରୁ ଚାଲାଣ ହେଉଥିଲେ ମଧ୍ୟ ପୋଲିସ ନିରବ ଦ୍ରଷ୍ଟା ସାଜିଛି। ଫଳରେ ବେପାରୀ ଓ ଜନ ସାଧାରଣଙ୍କ ମଧ୍ୟରେ ତିକ୍ତତା ଦେଖାଦେଉଛି। ପ୍ରଶାସନ ଉଚିତ ପଦକ୍ଷେପ ନ ନେଲେ ଆଗାମୀ ଦିନରେ ଲୋକେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।