ବ୍ରହ୍ମପୁର ଅଫିସ,୧୨ା୫: ଗ୍ରାହକଙ୍କ ପାଇଁ ଭରସାଯୋଗ୍ୟ ବିଦ୍ୟୁତ୍ ଯୋଗାଣକୁ ନିଶ୍ଚିତ କରିବା ପାଇଁ ଟିପି ସଦର୍ଣ୍ଣ ଓଡିଶା ଡିଷ୍ଟ୍ରିବ୍ୟୁଶନ ଲିମିଟେଡ (ଟିପିଏସ୍ଓଡିଏଲ୍) ପକ୍ଷରୁ ସମସ୍ତ ସର୍କଲରେ ଏବେ ଭ୍ରାମ୍ୟମାଣ ସବ୍ ଷ୍ଟେଶନ ରଖା ଯାଇଛି। ଫଳରେ ବିଦ୍ୟୁତ୍ ବିଭ୍ରାଟ ସମୟରେ ଯୋଗାଣ ସୁଗମ ହେବ। ବ୍ରହ୍ମପୁର ସର୍କଲ, ସିଟି ସର୍କଲ, ରାୟଗଡା ସର୍କଲ, ଜୟପୁର ସର୍କଲ, ଆସ୍କା ସର୍କଲ ଓ ଭଞ୍ଜନଗର ସର୍କଲରେ ୧୧/୦୪ କେଭିର ଗୋଟିଏ ଲେଖାଏ ଭ୍ରାମ୍ୟମାଣ ସବ୍ ଷ୍ଟେଶନ ରଖାଯାଇଛି। ଏହି ଭ୍ରାମ୍ୟମାଣ ସବ୍ ଷ୍ଟେଶନଗୁଡିକ ଛୋଟ ପ୍ଲଗ୍ ଇନ ସବ ଷ୍ଟେଶନ। ଏଥିରେ ବଣ୍ଟନ ଟ୍ରାନ୍ସଫର୍ମର, ହାଇ ଓ ଲୋ ଟେନଶନ ସୁରକ୍ଷା ଉପକରଣ। ଯାହାକୁ ଏକ ଭ୍ରାମ୍ୟମାଣ ଟ୍ରଲି ଉପରେ ରଖାଯାଇଛି। ଯେ କୌଣସି ଜରୁରୀକାଳୀନ ସମୟରେ ବିଦ୍ୟୁତ୍ ଯୋଗାଣକୁ ସ୍ବାଭାବିକ କରିବା ପାଇଁ ତୁରନ୍ତ ଏହାକୁ ବ୍ୟବହାର କରିହେବ। ଏଥିସହ ପରିବହନ ସମୟ ଛାଡି ଦେଲେ ପ୍ରାୟ ଦେଢ ଘଣ୍ଟା ମଧ୍ୟରେ ଭ୍ରାମ୍ୟମାଣ ସବ୍ ଷ୍ଟେଶନକୁ ବ୍ୟବହାର କରିହେବ। ହସ୍ପିଟାଲ ଓ ଜଳ ଯୋଗାଣ ଭଳି ଗୁରୁତ୍ୱପୂର୍ଣ୍ଣ ଜରୁରୀକାଳୀନ ସେବାରେ ଶୀଘ୍ର ବିଦ୍ୟୁତ୍ ଯୋଗାଣକୁ ସ୍ବାଭାବିକ କରିବାରେ ଏହି ସବ୍ ଷ୍ଟେଶନଗୁଡିକ ବିଶେଷ ସହାୟକ ହେବ। ଡିଏସ୍ଏସ୍ର ମରାମତି ଭଳି ଘଟଣାରେ ଗ୍ରାହକଙ୍କୁ ବିଦ୍ୟୁତ୍ ଯୋଗାଣ ପାଇଁ ଭ୍ରାମ୍ୟମାଣ ସବ୍ ଷ୍ଟେଶନ ବ୍ୟବହାର କରାଯାଇ ପାରିବ। ସବ୍ ଷ୍ଟେଶନଗୁଡିକ ଛୋଟ ଓ ସହଜରେ ପରିବହନ କରିହେବ। ଏଣୁ ଝଡ ଓ ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ ସମୟରେ ତୁରନ୍ତ ବିଦ୍ୟୁତ୍ ଯୋଗାଣ ସ୍ବାଭାବିକ କରିବାରେ ସହାୟକ ହେବ। ଗ୍ରାହକଙ୍କ ପାଇଁ ନିରବଚ୍ଛିନ ବିଦ୍ୟୁତ୍ ଯୋଗାଣ ନିଶ୍ଚିତ କରିବା ଦିଗରେ ନିରନ୍ତର ଉଦ୍ୟମ ଜାରି ରହିଛି ବୋଲି ଟିପିଏସ୍ଓଡିଏଲ ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ଅରବିନ୍ଦ ସିଂହ କହିଛନ୍ତି।