ବ୍ୟବସାୟ କରିବା କଷ୍ଟକର
କୋଭିଡ୍ ଯୋଗୁ ବ୍ୟବସାୟ ଏକ ପ୍ରକାର କ୍ଷତିଗ୍ରସ୍ତ ହୋଇ ରହିଛି। ସେହିପରି ଦେଶର ଅର୍ଥନୀତି ମଧ୍ୟ ବର୍ତ୍ତମାନ ପର୍ଯ୍ୟନ୍ତ ରାସ୍ତାକୁ ଆସିପାରିନାହିଁ। ଏଭଳି ସମୟରେ ଲୋକଙ୍କ ନିଯୁକ୍ତି ଚାଲିଯାଇଥିବା ବେଳେ କ୍ରୟଶକ୍ତି ମଧ୍ୟ କମିଛି। ସେହିପରି ଅଫ୍ଲାଇନ ବ୍ୟବସାୟ ଅନ୍ଲାଇନ ବା ଡିଜିଟାଲ ବାଣିଜ୍ୟ ଯୋଗୁ ମାନ୍ଦା ରହିଛି। ଫଳରେ ବଜାର ଉପରେ ଏହାର ସିଧାସଳଖ ପ୍ରଭାବ ପଡୁଛି। ଅନ୍ଲାଇନ କାରବାର ହ୍ରାସକରି ଅଫ୍ଲାଇନ ବ୍ୟବସାୟ ବୃଦ୍ଧି କରାଇ ବଜାରର ଚାହିଦା ବଢ଼ାଇବାର ଆବଶ୍ୟକତା ରହିଛି। ମାତ୍ର ବଜେଟରେ ସେଭଳି କିଛି ପଦକ୍ଷେପ ନିଆଗଲା ନାହିଁ। ଇଲେକ୍ଟ୍ରୋନିକ୍ସ ସାମଗ୍ରୀ ଉପରେ ସେଭଳି କିଛି ବିଶେଷ ଘୋଷଣା ହୋଇନାହିଁ।
-ରାଜେଶ ଗୁପ୍ତା, ଏମ୍ଡି, ଗୁପ୍ତା ଡିଷ୍ଟ୍ରିବ୍ୟୁଟର୍ସ
ବିକାଶମୁଖୀ ବଜେଟ ବ୍ୟବସ୍ଥା
ଚଳିତ ଥରର ବଜେଟ ଏକ ଦୂରଦୃଷ୍ଟିସମ୍ପନ୍ନ ଓ ବିକାଶମୁଖୀ ବଜେଟ ବ୍ୟବସ୍ଥା ହୋଇଛି। ଦେଶର ବିକାଶ ପାଇଁ ଗତିଶକ୍ତି ଯୋଜନା କରାଯାଇଛି। ଏହାଦ୍ୱାରା ସାମଗ୍ରୀ ପରିବହନ କ୍ଷେତ୍ରକୁ ବେଶ୍ ପ୍ରୋତ୍ସାହନ ସହ ଅମୃତକାଳ ଲାଗି ବ୍ଲ ପ୍ରିଣ୍ଟ ମଧ୍ୟ ପ୍ରସ୍ତୁତ ହୋଇଛି। ସେହିଭଳି ପୁଞ୍ଜି ବ୍ୟୟରେ ୩୫.୪% ବୃଦ୍ଧି ବେଶ୍ ସ୍ବାଗତଯୋଗ୍ୟ ପଦକ୍ଷେପ। ଏହାଦ୍ୱାରା ଦେଶର ଅଭିବୃଦ୍ଧି ଲାଗି ବହୁଗୁଣିତ ପ୍ରଭାବ ପକାଇବ। ସେହିପରି ଇସ୍ପାତ କ୍ଷେତ୍ରରେ ଚାହିଦା ବୃଦ୍ଧିରେ ଏହା ସହାୟକ ହେବ। ଆତ୍ମନିର୍ଭର ଭାରତକୁ ସଫଳ କରିବା ପାଇଁ ଆଉ ଏକ ଦୃଢ଼ ପଦକ୍ଷେପ।
-ଦିଲୀପ ଓମେନ, ସିଇଓ, ଏଏମ୍ଏନ୍ଏସ୍
ଅର୍ଥନୀତି ଲାଗି ବେଶ୍ ଲାଭକାରୀ
ଚଳିତ ବଜେଟ ବ୍ୟବସ୍ଥାରେ ସରକାର ଘୋଷଣା କରିଥିବା ବିଭିନ୍ନ ପଦକ୍ଷେପ ମଧ୍ୟରୁ ଅଟୋମୋବାଇଲ ଶିଳ୍ପ ବେଶ୍ ଲାଭବାନ ହେବ। ଏହା ସହ ଜଡ଼ିତ ବିଭିନ୍ନ ଆନୁଷଙ୍ଗିକ କ୍ଷେତ୍ର ମଧ୍ୟ ବିଶେଷ ଉପକୃତ ହେବେ। ସେହିଭଳି ଆତ୍ମନିର୍ଭର ଭାରତ ଏବଂ ଭୋକାଲ ଫର୍ ଲୋକାଲ ଏବଂ ଇ ଯାନ ନୀତିରେ ବ୍ୟାଟେରି ପରିବର୍ତ୍ତନ ଭଳି ପଦକ୍ଷେପ ଅଟୋଶିଳ୍ପର ଅଭିବୃଦ୍ଧିର ଆଉ ଏକ ସଂକଳ୍ପବଦ୍ଧ ବ୍ୟବସ୍ଥା। ଶିଳ୍ପର ଭିତ୍ତିଭୂମିକୁ ସରକାର ଗୁରୁତ୍ୱ ଦେଉଥିବାରୁ ଏହା ଦେଶର ଅର୍ଥନୀତି ଏବଂ ଅଟୋମୋବାଇଲ ଶିଳ୍ପର ଅଭିବୃଦ୍ଧିକୁ ବଢ଼ାଇବାରେ ବେଶ୍ ସହାୟକ ହେବ।
-ଭେଙ୍କଟରାମ ମାମିଲାପାଲେ, କଣ୍ଟ୍ରି ସିଇଓ, ରେନୋ ଇଣ୍ଡିଆ
ଅଭିବୃଦ୍ଧିଭିତ୍ତିକ ବଜେଟ
୨୦୨୨-୨୩ ଆର୍ଥିକ ବର୍ଷର ବଜେଟ ବ୍ୟବସ୍ଥାରେ ଅନେକ ପଦକ୍ଷେପ ନିଆଯାଇଛି। ଚଳିତ ଥରର ବଜେଟ ହେଉଛି ଏକ ଅଭିବୃଦ୍ଧିଭିତ୍ତିକ ତଥା ଦୂରଦୃଷ୍ଟିସମ୍ପନ୍ନ ବଜେଟ। ବର୍ତ୍ତମାନ ଦେଶର ପ୍ରଭାବିତ ଅର୍ଥନୀତି ଲାଗି ଏଭଳି ପଦକ୍ଷେପ ଓ ଯୋଗଦାନ ବେଶ୍ ଗୁରୁତ୍ୱପୂର୍ଣ୍ଣ । ବଜେଟରେ ରହିଥିବା ବିଭିନ୍ନ ପ୍ରସ୍ତାବ ଦେଶର ଅଭିବୃଦ୍ଧି ସହ ମହାନ୍ ଲକ୍ଷ୍ୟ ନେଇ ପ୍ରସ୍ତୁତ କରାଯାଇଛି। ସ୍ଥିର ଏବଂ ଉନ୍ନତ ନୀତି, ବିଶ୍ୱାସଭିଭିକ ଗଭର୍ନାନ୍ସ, ପୁଞ୍ଜି ଖର୍ଚ୍ଚରେ ନିରନ୍ତର ବୃଦ୍ଧି ଭଳି ଅନ୍ୟ ପଦକ୍ଷେପ ଅର୍ଥନୀତିକୁ ଅଗ୍ରସର କରାଇବାରେ ବେଶ୍ ସହାୟକ ହେବ। ବିଶେଷକରି ଏମ୍ଏସ୍ଏମ୍ଇ କ୍ଷେତ୍ରକୁ ଏହାଦ୍ୱାରା ଅଧିକ ଲାଭ ମିଳିପାରିବ।
-ଶୁଭ୍ରକାନ୍ତ ପଣ୍ଡା, ଏମ୍ଡି, ଇମ୍ଫା
ପର୍ଯ୍ୟଟନ କ୍ଷେତ୍ରର ବିକାଶ, ଅଭିବୃଦ୍ଧି
ଚଳିତ ବଜେଟରେ ସରକାର ହୋଟେଲ ଶିଳ୍ପ ପାଇଁ ଅନେକ ପଦକ୍ଷେପ ନେଇଛନ୍ତି। ସରକାର ଇସିଏଲ୍ଜିିଏସ୍ ଋଣ ଭାବେ ଅତିରିକ୍ତ ୫୦ହଜାର କୋଟି ଟଙ୍କାର ବ୍ୟବସ୍ଥା କରିଛନ୍ତି ଯାହା ବେଶ୍ ସ୍ବାଗତଯୋଗ୍ୟ ପଦକ୍ଷେପ। ମହାମାରୀ ସମୟରେ ଏହା ଏକ ରିଲିଫ୍ ନୁହେଁ ୨୦୨୩ ମାର୍ଚ୍ଚ ଯାଏ ମୋରାଟୋରିୟମ ସମୟସୀମାକୁ ସମ୍ପ୍ରସାରଣ ଭାବେ ଘୋଷଣା କରାଯାଇଛି, ଯାହା କି ଯଥେଷ୍ଟ ନୁହେଁ। ଗତ ୨ ବର୍ଷ ମଧ୍ୟରେ ହୋଟେଲ ଶିଳ୍ପ ବ୍ୟାପକ ପରିମାଣରେ କ୍ଷତି ସହିଛନ୍ତି। ସେହିଭଳି ୨୦୨୫ ମାର୍ଚ୍ଚ ଯାଏ ଏହାକୁ ସମ୍ପ୍ରସାରଣ କରାଯାଉ ବୋଲି ଶିଳ୍ପ ସଂଘ ଦାବି କରି ଆସୁଥିଲା। ସେହିପରି ପିଏମ୍ ଗତିଶକ୍ତି ପାଇଁ ଉତ୍ତର ପୂର୍ବାଞ୍ଚଳ ପରିଷଦ (ଏନ୍ଇସି)କୁ ଅତିରିକ୍ତ ୧୫୦୦ କୋଟି ଟଙ୍କା ମଞ୍ଜୁର କରାଯାଇଛି। ଦେଶର ପର୍ଯ୍ୟଟନ କ୍ଷେତ୍ରକୁ ବୃଦ୍ଧି କରାଇବା ଲକ୍ଷ୍ୟରେ ମନ୍ତ୍ରଣାଳୟର ବଜେଟକୁ ୨୦୦୦ କୋଟିରୁ ୨୪୦୦ କୋଟି ବଢ଼ାଇ ଦିଆଯାଇଛି। ଦେଶରେ ୮ଟି ରୋପ୍ ପ୍ରକଳ୍ପକୁ ମଞ୍ଜୁରୀ ମିଳିଛି। ସେଥିରୁ ଓଡ଼ିଶା ଭାଗରେ କିଛି ଆସିବାର ଆଶା ରହିଛି।
-ଜେ.କେ. ମହାନ୍ତି, ଅଧ୍ୟକ୍ଷ, ହାରୋ
ଏମ୍ଏସ୍ଏମ୍ଇ କ୍ଷେତ୍ରକୁ ଗୁରୁତ୍ୱ
ମଙ୍ଗଳବାର ୨୦୨୨-୨୩ ବର୍ଷର ୟୁନିୟନ ବଜେଟ ଉପସ୍ଥାପନ ହୋଇଛିି। ଏହି ବଜେଟ ଭିତ୍ତିଭୂମି ଉପରେ ଆଧାରିତ ଓ ଭିତ୍ତିଭୂମିର ଉନ୍ନତି ଉପରେ ଜଡ଼ିତ । ଏଥିରେ ଅଣୁ, କ୍ଷୁଦ୍ର ଓ ମଧ୍ୟମ ଶିଳ୍ପର ସମୃଦ୍ଧି ପାଇଁ କିଛିଟା ବ୍ୟବସ୍ଥା କରାଯାଇଛି। ଆର୍ଥିକ ବିନିଯୋଗ ପାଇଁ କ୍ରେଡିଟ୍ ଗ୍ୟାରେଣ୍ଟି ଫଣ୍ଡ ଟ୍ରଷ୍ଟକୁ ୨ ଲକ୍ଷ କୋଟି ଟଙ୍କା ପ୍ରଦାନ କରାଯାଇଛି। ଫଳରେ କ୍ଷୁଦ୍ର ବ୍ୟବସାୟୀମାନଙ୍କ ପାଇଁ ୫ ଲକ୍ଷ କୋଟି ଟଙ୍କାର ବିନିଯୋଗ ପାଇଁ ବ୍ୟବସ୍ଥା କରାଯାଇଛି। ସବୁଠାରୁ ଆଖିଦୃଶିଆ ପଦକ୍ଷେପ ହେଲା ପ୍ରତିରକ୍ଷା ବିଭାଗ ୬୮ ପ୍ରତିଶତ କ୍ରୟ କେବଳ ଏମ୍ଏସ୍ଏମ୍ଇରୁ ହିଁ କରିବ।
– ବିରଞ୍ଚି ନାରାୟଣ ମିଶ୍ର, ସଭାପତି, ଓଇଆ
ବିକାଶକୁ ବ୍ୟାପକ କରିବ
ଚଳିତ ଥରର ବଜେଟ ବ୍ୟବସ୍ଥା ଦେଶର ବିକାଶକୁ ବ୍ୟାପକ କରିବ। ବିଶେଷକରି ଗତିଶକ୍ତି ଯୋଜନା ଜରିଆରେ ରାଷ୍ଟ୍ରର ବିକାଶ ସାଙ୍ଗକୁ ସଂସ୍ଥାର ଅଭିବୃଦ୍ଧି ହୋଇପାରିବ। ଇ-ଯାନ ନୀତି ଓ ବ୍ୟବସ୍ଥା ସାଙ୍ଗକୁ ସୁବିଧା ଏପରିକି ପ୍ରୋତ୍ସାହନ ମଧ୍ୟ ଉଭୟ ଗ୍ରାହକ ଓ ବ୍ୟବସାୟୀଙ୍କ ମନୋବଳ ବଢାଇବ। ଶିଳ୍ପର ଅଭିବୃଦ୍ଧି ସାଙ୍ଗକୁ ସମାଜର ବିକାଶ ଓ ପରିବେଶ ସୁରକ୍ଷା ସମ୍ପର୍କରେ ମଧ୍ୟ ବଜେଟରେ ବ୍ୟବସ୍ଥା କରାଯାଇଛି। ଏହା ଦେଶର ଅର୍ଥନୀତିକୁ ଅଭିବୃଦ୍ଧି କରାଇବାରେ ସହଜ ହେବ। – ଅଭିନାଶ ସାମଲ, ଏମ୍ଡି, ଏମ୍ଜି ହେକ୍ଟର