କୋଲକାତା,୧୯ ।୧୨: ପଶ୍ଚିମବଙ୍ଗରେ ଆଉ କିଛି ମାସ ପରେ ହେବାକୁ ଯାଉଛି ବିଧାନସଭା ନିର୍ବାଚନ । ଏବେଠାରୁ କିନ୍ତୁ ସେଠାରେ ରାଜନୀତି ହେଲାଣି ସରଗରମ । ଶାସକ ତ୍ରୁଣମୂଳ କଂଗ୍ରେସ(ଟିଏମ୍ସି)ରୁ କେତେଜଣ ନେତା ଇସ୍ତଫା ଦେବା ଦଳ ପାଇଁ ମୁଣ୍ଡ ବ୍ୟଥାର କାରଣ ପାଲଟିଛି । କାରଣ ଏମାନେ ଭାରତୀୟ ଜନତା ପାର୍ଟି(ଭାଜପା) ହାତ ଧରିବାକୁ ଯାଉଥିବା ଜଣାପଡିବା ପରେ ଟିଏମ୍ସି କ୍ୟାମ୍ପରେ ଆରମ୍ଭ ହୋଇଗଲାଣି ଛକାପଞ୍ଝା । ଏହି କ୍ରମରେ ଭାଜପା ନେତାମାନେ ଲଗାତାର ଭାବେ ପଶ୍ଚିମବଙ୍ଗ ଗସ୍ତ କରିବାକୁ ନେଇ ମଧ୍ୟ ଆଲୋଚନା ଜାରି ରହିଛି । ଶୁକ୍ରବାର ବିଳମ୍ବିତ ରାତ୍ରରେ ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହା ପଶ୍ଚିମବଙ୍ଗ ପହଞ୍ଚିଛନ୍ତି । ଶନିବାର ସେ ଏନ୍ଆଇଏ ଅଧିକାରୀଙ୍କ ସହ ବୈଠକ କରିବାର କାର୍ଯ୍ୟକ୍ରମ ରହିଛି । ଏହାସହ ରାଜ୍ୟରେ ଭାଜପା ନେତାଙ୍କ ସଙ୍ଗଠନ ସମ୍ପର୍କରେ ବୁଝିବେ । ଶନିବାର ସକାଳେ ଶାହା ରାମକ୍ରିଷ୍ଣ ଆଶ୍ରମ ଯାଇଛନ୍ତି । ସେଠାରେ ସେ ବିବେକାନନ୍ଦଙ୍କୁ ଶ୍ରଦ୍ଧାଞ୍ଜଳି ଦେବା ସହ କହିଛନ୍ତି ବିବେକାନନ୍ଦ ଆଧୁନିକତା ଓ ଆଧ୍ୟାତ୍ମିକତାକୁ ଯୋଡିଥିଲେ । ମୁଁ ପ୍ରାର୍ଥନା କରୁଛି ଆମେ ତାଙ୍କ ମାର୍ଗରେ ଚାଲିବାକୁ ସକ୍ଷମ । ସ୍ୱାମୀ ବିବେକାନନ୍ଦଙ୍କ ବିଚାର ପୂର୍ବରୁ ଯେତିକି ପ୍ରାସଙ୍ଗିକତା ରଖିଥିଲା ଏବେବି ସେତିକି ପ୍ରାସଙ୍ଗିକତା ରଖିଛି । ଏହାପରେ ସେ ମେଦିନାପୁର ଯିବାର କାର୍ଯ୍ୟକ୍ରମ ରହିଛି ।
