ଚେନ୍ନାଇ,୨୧ ।୧୧: ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା ଶନିବାର ୨ଦିନିଆ ତାମିଲନାଡୁ ଗସ୍ତରେ ଚେନ୍ନାଇ ପହଞ୍ଚିଛନ୍ତି । ଶାହା ସେଠାରେ କେତୋଟି ବିକାଶମୂଳକ ପରିଯୋଜନାର ଉଦ୍ଘାଟନ କରିବାର କାର୍ଯ୍ୟକ୍ରମ ରହିଛି । ଏହାସହ ତାମିଲନାଡୁ ଭାଜପା ପ୍ରତିନିଧି ଓ ସହଯୋଗୀ ଏଆଇଏଡିଏମ୍କେର ବରିଷ୍ଠ ନେତାଙ୍କୁ ସାକ୍ଷାତ୍ କରିବାର କାର୍ଯ୍ୟକ୍ରମ ମଧ୍ୟ ରହିଛି । ଶାହାଙ୍କ ଏହି ଗସ୍ତକୁ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି କାରଣ ଆସନ୍ତା ବର୍ଷ ମେ’ ମାସରେ ସେଠାରେ ବିଧାନସଭା ନିର୍ବାଚନ ହେବ । ଅନ୍ୟପଟେ ଶାହା ଯେଉଁ ରାଜ୍ୟକୁ ଗସ୍ତ କରନ୍ତି ସେଠାରେ ରାଜନୀତିର ପାଣିପାଗ ସାମାନ୍ୟ ବଦଳିଯାଇଥାଏ । ଏହି ଗସ୍ତ ସମୟରେ ଶାହା ପୂର୍ବତନ ମୁଖ୍ୟମନ୍ତ୍ରୀ ଏମ୍ କରୁଣାନିଧିଙ୍କ ପୁଅ ତଥା ଡିଏମ୍କେ ଅଧ୍ୟକ୍ଷ ଏମ୍ କେ ଷ୍ଟାଲିନଙ୍କ ବଡ ଭାଇ ଏମ୍ ଆଲାଗିରିଙ୍କ ସହ ସାକ୍ଷାତ୍ କରିବାର କାର୍ଯ୍ୟକ୍ରମ ରହିଛି । ଏହାକୁ ଏଇଥିପାଇଁ ଗୁରୁତ୍ୱପୂର୍ଣ୍ଣ କୁହାଯାଉଛି କି ଆସନ୍ତା ବିଧାନସଭା ନିର୍ବାଚନରେ ଭାଜପା ଆଲାଗିରିଙ୍କ ସମ୍ଭାବ୍ୟ ଦଳ କେଡିଏମ୍କେ ସହ ମିଶି ନିର୍ବାଚନ ଲଢି ପାରେ । କାରଣ ଆଲାଗିରି ଡିଏମ୍କେଠାରୁ ମୁହଁ ଫେରାଇ ନେଇଛନ୍ତି ।
