ପାଟନା,୨।୪: ବିହାର ରୋହତସର ସାସାରାମ ସହରରେ ସାମ୍ପ୍ରଦାୟିକ ହିଂସା ଘଟିଛି। ଏଠାରେ ଅନେକ ଯାନବାହନ, ଘର ଏବଂ ଦୋକାନରେ ନିଆଁ ଲାଗି ନଷ୍ଟ ହେବା ସହ ଅନେକ ଲୋକ ଆହତ ହୋଇଛନ୍ତି। ସାସରାମ ସହରରେ ଘଟିଥିବା ହିଂସା ପାଇଁ ବିହାରର ରୋହତସ ଜିଲାରେ ଥିବା ସମସ୍ତ ସରକାରୀ ଏବଂ ବେସରକାରୀ ବିଦ୍ୟାଳୟ ଏପ୍ରିଲ ୪ପର୍ଯ୍ୟନ୍ତ ବନ୍ଦ ରଖାଯାଇଛି। ଏହା ସହିତ ସମସ୍ତ କୋଚିଂ ପ୍ରତିଷ୍ଠାନ ମଧ୍ୟ ବନ୍ଦ ରହିବ ବୋଲି ଜଣାପଡିଛି। ସାସାରାମ ସହରରେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ କାର୍ଯ୍ୟକ୍ରମ ଅନୁଷ୍ଠିତ ହେବାର ଥିଲା। ଏହାପୂର୍ବରୁ ହିଂସା ଯୋଗୁ ତାଙ୍କ କାର୍ଯ୍ୟକ୍ରମ ବନ୍ଦ ହେବା ପରେ ଏବେ ଭାଜପା ନୀତୀଶ ସରକାରଙ୍କୁ ଟାର୍ଗେଟ୍ କରିଛି।
କେନ୍ଦ୍ର ମନ୍ତ୍ରୀ ଗିରିରାଜ ସିଂ ରବିବାର ପାଟନାରେ କହିଛନ୍ତି, ନୀତୀଶ କୁମାର ବିହାରକୁ ସମ୍ଭାଳିବାରେ ଅସମର୍ଥ। ତେଣୁ ସେ ଉତ୍ତରପ୍ରଦେଶକୁ ଦୁଇଥର ପରିଚାଳନା କରୁଥିବା ବୁଲଡୋଜର ବାବାଙ୍କଠାରୁ ଶିଖନ୍ତୁ। ତାଙ୍କଠାରୁ ରାଜ୍ୟ ଚଳାଇବା ପାଇଁ କୌଶଳ ଗ୍ରହଣ କରନ୍ତୁ। ଦୁର୍ଭାଗ୍ୟବଶତଃ ନୀତୀଶ କୁମାର ବିହାରକୁ ପଶ୍ଚିମବଙ୍ଗ ଢାଞ୍ଚାରେ ନେଉଛନ୍ତି। ସେ ମମତା ବାନାର୍ଜୀଙ୍କ ପଥ ଅନୁସରଣ କରୁଛନ୍ତି। ଜନତା ଏହାର ଉଚିତ ଜବାବ ଦେବେ।