ବେଙ୍ଗାଲୁରୁ,୯।୩: କର୍ନାଟକ ବିଧାନସଭାର କାର୍ଯ୍ୟକାଳ ଆସନ୍ତା ମେ’ ମାସରେ ଶେଷ ହେବ। ଖୁବ୍ଶୀଘ୍ର ରାଜ୍ୟରେ ନିର୍ବାଚନର ତାରିଖ ଘୋଷଣା ହେବାର ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ରାଜନୈତିକ ଦଳଗୁଡିକ ଜୋରସୋରରେ ପ୍ରଚାର ଆରମ୍ଭ କରିଛନ୍ତି। ଏହି କ୍ରମରେ ଗୁରୁବାର କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ ‘ବିଜୟ ସଂକଳ୍ପ ଯାତ୍ରା’ ଅଧୀନରେ ହାସନ ଜିଲାର ଜଭାଗଲରେ ଏକ ବିଶାଳ ରୋଡ ଶୋ’ରେ ଅଂଶଗ୍ରହଣ କରିଥିଲେ। ଏହି ସମୟରେ କଂଗ୍ରେସକୁ ଟାର୍ଗେଟ କରି କେନ୍ଦ୍ରମନ୍ତ୍ରୀ ଏକ ଅଜବ ମନ୍ତବ୍ୟ ଦେଇଛନ୍ତି। ପ୍ରହ୍ଲାଦ କହିଛନ୍ତି, କଂଗ୍ରେସ ନିଜ ଶାସନ କାଳରେ କମ ବିଦ୍ୟୁତ ଦେଇଛି। ବିଦ୍ୟୁତ୍ ଠିକ୍ ଭାବେ ଯୋଗାଇବାରେ ସକ୍ଷମ ହୋଇ ନ ଥିବାରୁ କଂଗ୍ରେସ ଶାସନ କାଳରେ ଜନସଂଖ୍ୟା ବୃଦ୍ଧି ପାଇଥିଲା। ପ୍ରହ୍ଲାଦଙ୍କ ଏହି ମନ୍ତବ୍ୟକୁ ନେଇ ଚର୍ଚ୍ଚା ଆରମ୍ଭ ହୋଇଛି।
କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ମଧ୍ୟ ଦୁର୍ନୀତି ପ୍ରସଙ୍ଗରେ କଂଗ୍ରେସ ଉପରେ ବର୍ଷିଥିଲେ। ସେ କହିଥିଲେ ଯେ, ଦୁର୍ନୀତି ବିଷୟରେ କଂଗ୍ରେସ ଦଳକୁ କହିବାର କୌଣସି ନୈତିକ ଅଧିକାର ନାହିଁ। କଂଗ୍ରେସ ଦେଶରେ ଦୁର୍ନୀତିର ମୂଳମଞ୍ଜି। ଜବାହରଲାଲ ନେହେରୁଙ୍କ ଠାରୁ ମନମୋହନ ସିଂଙ୍କ ପର୍ଯ୍ୟନ୍ତ, ଦଳ ଅନେକ ଦୁର୍ନୀତିଗ୍ରସ୍ତ କାରବାରରେ ଜଡିତ ଅଛି। ସୂଚନାଯୋଗ୍ୟ, ଲାଞ୍ଚ ମାମଲାରେ ଭାଜପା ବିଧାୟକଙ୍କ ପୁଅଙ୍କ ଗିରଫଦାରୀକୁ ନେଇ କର୍ନାଟକ ମୁଖ୍ୟମନ୍ତ୍ରୀ ବାସଭାରାଜ ବୋମ୍ମାଇଙ୍କ ଇସ୍ତଫା ଦାବି କରିଛି କଂଗ୍ରେସ।