ବାରିପଦା ଅଫିସ,୧୮।୫ – ମୟୂରଭଞ୍ଜ ଜିଲାରେ ଲଘୁଖଣିଜ ଚୋରା ଚାଲାଣ ରୋକିବା ନେଇ ବାରିପଦା ସର୍କିଟ ହାଉସରେ ମଙ୍ଗଳବାର କେନ୍ଦ୍ର ଆଦିବାସୀ ବ୍ୟାପାର ଓ ଜଳଶକ୍ତି ମନ୍ତ୍ରୀ ଇଂ. ବିଶ୍ୱେଶ୍ୱର ଟୁଡୁ ଏକ ସମୀକ୍ଷା ବୈଠକ କରିଛନ୍ତି। ମୋରଡ଼ା, ବାଙ୍ଗିରିପୋଷି, ବାରିପଦା ଓ ସାରସକଣା ତହସିଲଦାରଙ୍କ ସହ ଆଲୋଚନା କରି ଅଞ୍ଚଳରୁ ବାଲି, ମୋରମ, ପଥର ଆଦି ଚୋରା ଚାଲାଣ ରୋକିବା ଦିଗରେ ପଦକ୍ଷେପ ଗ୍ରହଣ କରିବାକୁ ସେ ପରାମର୍ଶ ଦେଇଛନ୍ତି। ଲଘୁଖଣିଜ ସମ୍ପଦ ପଡ଼ୋଶୀ ଝାଡ଼ଖଣ୍ଡ ଓ ପଶ୍ଚିମବଙ୍ଗ ରାଜ୍ୟକୁ ଚାଲାଣ ହେଉଥିବା ବେଳେ ପ୍ରଶାସନର ଭୂମିକାକୁ ନେଇ ସେ ଅସନ୍ତୋଷ ବ୍ୟକ୍ତ କରିଛନ୍ତି। ଜିଲାରେ ଥବା ସରକାରୀ ଜମିଗୁଡ଼ିକ ରାଜସ୍ବ ବିଭାଗକୁ ଆଣି ଚିଠା ପ୍ରସ୍ତୁତ କରାଗଲେ ଭବିଷ୍ୟତରେ ବୃକ୍ଷରୋପଣ ଓ ଶିଳ୍ପ ପ୍ରତିଷ୍ଠା ସମ୍ଭବ ହୋଇପାରିବ ବୋଲି କହିଥିଲେ। ବାଙ୍ଗିରିପୋଷି ରେଳ ଷ୍ଟେଶନରେ ରେଲୱେ ଗୁଡ୍ସ ସେଡ୍ ନିର୍ମାଣ କରିବା ପାଇଁ ଜାଗା ଚିହ୍ନଟ ଲାଗି ପରାମର୍ଶ ଦେଇ ଏହାଦ୍ୱାରା ୫ଶହରୁ ଊର୍ଦ୍ଧ୍ୱ ଲୋକ ରୋଜଗାରକ୍ଷମ ହୋଇପାରିବେ ବୋଲି ସେ କହିଛନ୍ତି।