ବିଳାସପୁର, ୧୦।୮: ଛତିଶଗଡ଼ର ବିଳାସପୁରରେ ଏକ ଅଜବ ଛେଳି ଛୁଆ ଜନ୍ମ ନେଇଛି। ନବଜାତ ଛେଳି ଛୁଆର ନାକ ନ ଥିବାବେଳେ ଏହି ସ୍ଥାନରେ ଆଖି ରହିଛି। ଏଭଳି ବିଚିତ୍ର ଛେଳି ଛୁଆକୁ ନେଇ ଏବେ ବେଶ୍ ଚର୍ଚ୍ଚା। ବିଳାସପୁର ବାସିନ୍ଦା ଫରିଦ ଖାନ୍ଙ୍କ ଛେଳି ରବିବାର ଏହି ବିଚିତ୍ର ଛେଳି ଛୁଆକୁ ଜନ୍ମ ଦେଇଥିଲା। ଜନ୍ମ ପରେ ଦେଖାଯାଇଥିଲା ଯେ ଛେଳି ଛୁଆର ନାକ ନାହିଁ। ନାକ ବଦଳରେ ୨ଟି ଆଖି ରହିଛି। ସେହିଭଳି ଆଖି ସ୍ଥାନରେ ବଡ଼ ଗର୍ତ୍ତ ରହିଛି। ପାଟିପଟେ ଏହି ଛୁଆଟି ନିଶ୍ୱାସ ପ୍ରଶ୍ୱାସ ନେବା ଆଣିବା କରୁଥିଲା।
ଫରିଦ ଏବଂ ତାଙ୍କ ସାହି ପଡ଼ିଶା ଏହି ଛେଳି ଛୁଆକୁ ଦେଖି ଆଶ୍ଚର୍ଯ୍ୟ ହୋଇଥିଲେ। ତୁରନ୍ତ ସେମାନେ ପଶୁ ଚିକିତ୍ସକ ଅଜୟ ଅଗ୍ରଓ୍ବାଲଙ୍କ ସହ ଯୋଗାଯୋଗ କରିଥିଲେ। ଏହାପରେ ଡାକ୍ତରଙ୍କ ପରାମର୍ଶକ୍ରମେ ଛେଳି ଛୁଆଟିକୁ ଡାକ୍ତର ଏସ୍ପି ଶର୍ମାଙ୍କ କ୍ଲିନିକକୁ ନିଆଯାଇଥିଲା। ଯେଉଁଠାରେ ବରିଷ୍ଠ ସର୍ଜନ ଡାକ୍ତର ଆର୍.ଏମ୍. ତ୍ରିପାଠୀ ଓ ଡାକ୍ତର ସିହ୍ନା ଅପରେସନ ମାଧ୍ୟମରେ ଛେଳିଟି ନାକବାଟେ ନିଶ୍ୱାସ ପ୍ରଶ୍ୱାସ ନେବା ଲାଗି ଚେଷ୍ଟା କରିଥିଲେ। କିନ୍ତୁ ସେଥିରେ ସଫଳ ହୋଇ ନ ଥିଲେ। ଡାକ୍ତର ତ୍ରିପାଠୀ କହିଛନ୍ତି, କୌଣସି ରୋଗ ଲାଗି ନୁହେଁ ବରଂ ଗୁଣସୂତ୍ରରେ ଅସ୍ବଭାବିକତା ହେତୁ ଏଭଳି ଅସମାନତା ହୋଇଥାଏ। ୧୦ ମେ ୨୦୧୧ରେ କେରଳରେ ଏହିଭଳି ଏକ ଛେଳି ଛୁଆ ଜନ୍ମ ହୋଇଥିଲା ବୋଲି ଡାକ୍ତର ସିହ୍ନା କହିଛନ୍ତି।