କେଉଁଆଡ଼େ ବୁଲିବାକୁ ଗଲେ ସାଧାରଣତଃ ରହିବା, ଖାଇବାର ଭଲ ସୁବିଧା ଥିବା ବିଳାସପୂର୍ଣ୍ଣ ହୋଟେଲ ସମସ୍ତେ ପସନ୍ଦ କରନ୍ତି। ହେଲେ ପୃଥିବୀରେ ଏମିତି କିଛି ହୋଟେଲ ରହିଛି, ଯାହାରା ନିଆରା ଆକୃତି ବା ନିର୍ମାଣଶୈଳୀ ଲୋକଙ୍କୁ ଆକୃଷ୍ଟ କରିଥାଏ। ଜାଣିବା ସେଭଳି କେତେକ ହୋଟେଲ ସମ୍ପର୍କରେ…
ମଣିଷ ଆକୃତିର ହୋଟେଲ: ଚାଇନାର ହେବେଇ ପ୍ରୋଭିନ୍ସରେ ରହିଛି ମଣିଷ ଆକୃତିର ଏକ ହୋଟେଲ, ଯାହାର ନାମ ଟିଆଞ୍ଜି ହୋଟେଲ। ଏଠାରେ ତିନିଜଣ ବୃଦ୍ଧଙ୍କ ଆକୃତି କରାଯାଇଛି ଏବଂ ଏହାର ନାମ ଫୁ, ଲୁ ଏବଂ ଶୁ ରଖାଯାଇଛି। ଯାହାର ଅର୍ଥ ଭାଗ୍ୟ, ସମୃଦ୍ଧି, ଦୀର୍ଘଜୀବନ। ତେବେ ଏହା ପୃଥିବୀର ବୃହତ୍ତମ ଇମେଜ୍ ବିଲ୍ଡିଂ ଭାବେ ଗିନିଜ୍ ରେକର୍ଡରେ ମଧ୍ୟ ସ୍ଥାନ ପାଇଛି।
ଶିପ୍ ହୋଟେଲ୍ ବା ପାଣିଜାହାଜ ଆକୃତିର ହୋଟେଲ: ସାଉଥ୍ କୋରିଆରେ ରହିଛି ସନ୍ କ୍ରୁଇଜ୍ ନାମକ ଏକ ରିସର୍ଟ। ହୋଟେଲଟି ପାଣିଜାହାଜ ଆକୃତିରେ ତିଆରି ହୋଇଛି, ଯାହା ସେଠାରେ ଥିବା ପାହାଡ଼ ଉପରେ ଅବସ୍ଥିତ। ସୂର୍ଯ୍ୟକିରଣ ଓ ପ୍ରାକୃତିକ ସୌନ୍ଦର୍ଯ୍ୟ ପାଇଁ ଏହି ସ୍ଥାନଟି ବେଶ୍ ପ୍ରସିଦ୍ଧ। ତେଣୁ ସୂର୍ଯ୍ୟଙ୍କ ପ୍ରଥମ କିରଣ ହୋଟେଲ ଉପରେ ପଡ଼ୁଥିବାରୁ ଏହାର ସୌନ୍ଦର୍ଯ୍ୟ ଖୁବ୍ ନିଆରା। ହୋଟେଲଟିରେ ୨୧୧ଟି ରୁମ୍, କ୍ଲବ୍, ଓ୍ବାଟର ପୁଲ୍ ଆଦି ରହିଛି।
ଏରୋପ୍ଲେନ୍ ହୋଟେଲ: ପ୍ରଶାନ୍ତ ମହାସାଗର ନିକଟବର୍ତ୍ତୀ କୋଷ୍ଟାଲ୍ ରେନ୍ ଫରେଷ୍ଟରେ ରହିଛି କୋଷ୍ଟା ଭର୍ଡେ ହୋଟେଲ। ଏହା ଦେଖିବାକୁ ଉଡ଼ାଜାହାଜ ବା ଏରୋପ୍ଲେନ୍ ପରି। ୧୯୬୫ ମସିହାରେ ତିଆରି ହୋଇଥିବା ‘ବୋଇଂ-୭୨୭’ ଉଡ଼ାଜାହାଜ ଆକୃତି ଅନୁଯାୟୀ ଏହା ତିଆରି ହୋଇଛି। ଏହା ମଧ୍ୟରେ ଥାଇ ଜଣେ ‘କାନୋପି’ ଜଙ୍ଗଲର ମନୋରମ ଦୃଶ୍ୟକୁ ଉପଭୋଗ କରିପାରିବ।