ଦୁନିଆରେ ଏମିତି କିଛି ସ୍ଥାନ ଅଛି, ଯାହାର ସ୍ବତନ୍ତ୍ରତା ପାଇଁ ଲୋକଙ୍କ ମଧ୍ୟରେ ବେଶ୍ ପରିଚିତି ଲାଭ କରିଥାଏ। ସେଥିପାଇଁ ଏହି ସ୍ଥାନର ମଜା ଉଠାଇବାକୁ ଧାଇଁ ଆସନ୍ତି ଲୋକେ। ସାଧାରଣତଃ ଲୋକେ ପାହାଡ଼ ଚଢ଼ନ୍ତି। ମାତ୍ର ଝରଣା ଚଢ଼ିବା କଥା କେବେ ଶୁଣିଛନ୍ତି। ଅବିଶ୍ୱସନୀୟ ଲାଗୁଥିଲେ ମଧ୍ୟ ସତ। ଏମିତି ଏକ ଅନନ୍ୟ ଝରଣା ଅଛି, ଯାହା ଉପରକୁ ଆପଣ ସହଜରେ ଚଢ଼ି ପାରିବେ।
ବୁଆ ଥୋଙ୍ଗ୍ ନାମକ ଏହି ଝରଣା ଥାଇଲାଣ୍ଡରେ ରହିଛି। ଏହି ଝରଣାର ଖାସ୍ କଥା ହେଲା ତଳୁ ଉପରକୁ ଆପଣ ସହଜରେ ଚଢ଼ି ପାରିବେ। ପାଦ ଆଦୌ ଖସିବ ନାହିଁ। ୩୩୦ ଫୁଟ ଉଚ୍ଚର ଏହି ଝରଣାକୁ ‘ ଚିପ୍ଚିପା’ ଝରଣା କୁହନ୍ତି। ଏହି ଝରଣା ପାଣି ଧଳା ରଙ୍ଗର। ଏହା ଉପରକୁ ଚଢ଼ିବାକୁ ହେଲେ ପାର୍ଶ୍ୱରେ ବନ୍ଧା ଯାଇଥିବା ରଶି ସାହାଯ୍ୟରେ ଚଢ଼ିପାରିବେ। ଏହି ଝରଣାର ସ୍ରୋତରେ କ୍ୟାଲସିୟମର ମାତ୍ରା ଅଧିକ ରହିଛି। ଯାହା ଚଟାଣ ଉପରେ ଜମିଯାଏ। ଏହାର ପାଣି କ୍ଷୀର ପରି ଧଳା। କାରଣ ଏଥିରେ ଚୂନର ମିଶ୍ରଣ ରହିଛି। ଏହି ଗୋଲାକାର ଚଟାଣର ଓ୍ବାଟର ସ୍ଲାଇଡ୍ ଖୁବ୍ ମନଲୋଭା।
ଏଠାକୁ ପର୍ଯ୍ୟଟକମାନେ ବହୁ ସଂଖ୍ୟାରେ ଆସିଥାନ୍ତି। ଏହି ଝରଣାର ତଳୁ ଉପରକୁ ଉଠିବା ପାଇଁ ମଜା ନିଆରା। ଝରଣା ଉପରକୁ ସିଧା ଉଠିହେବ,ମାତ୍ର କଷ୍ଟ ହେବ। ତେଣୁ ପାର୍ଶ୍ୱରେ ବନ୍ଧାଯାଇଥିବା ରଶି ଧରି ଆରାମରେ ଉପରକୁ ଯାଇପାରିବେ।