ନୂଆଦିଲ୍ଲୀ: ସମସ୍ତଙ୍କ ଜୀବନରେ ବିବାହ ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ। ଏହାକୁ ସ୍ବତନ୍ତ୍ର କରିବାକୁ ନେଇ ଲୋକେ ଭଳିକି ଭଳି ଉପାୟ ଆପଣାଇଥାନ୍ତି। ହେଲେ ପଶ୍ଚିମବଙ୍ଗର ଏକ ଯୋଡ଼ି ବିବାହ ସମୟରେ ଏଭଳି କିଛି କରିଥିଲେ, ଯାହା ତାଙ୍କର ଅତିଥିଙ୍କୁ ଚକିତ କରିଦେଇଥିଲା। ଗୋଗୋଲ ଶାହା ଏବଂ ସୁବର୍ଣ୍ଣା ଦାସଙ୍କ ବିବାହର ନିଆରା ମେନୁ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି, ଯାହାକୁ ଠିକ୍ ଆଧାରକାର୍ଡ ଭଳି ଡିଜାଇନ୍ କରାଯାଇଛି। ସୋସିଆଲ ମିଡିଆରେ ଏହାର କିଛି ଫଟୋ ଭାଇରାଲ ହେଉଛି।
ସୁବର୍ଣ୍ଣା ଜଣେ ସ୍ବାସ୍ଥ୍ୟକର୍ମୀ ହୋଇଥିବା ବେଳେ ଗୋଗୋଲ ଜଣେ ସେଲ୍ସ ଏବଂ ମାର୍କେଟିଂ କର୍ମଚାରୀ। ଉଭୟ ଆଧାରକାର୍ଡ ଭଳି ନିଜ ବିବାହର ମେନୁ ଡିଜାଇନ୍ କରି ପରସା ଯିବାକୁ ଥିବା ବ୍ୟଞ୍ଜନ ବିଷୟରେ ଉଲ୍ଲେଖ କରିଥିଲେ। କାର୍ଡର ଉପର ଭାଗରେ ସୁବର୍ଣ୍ଣା ସହ ଗୋଗୋଲ ଲେଖାଯାଇଛି। ସେହିଭଳି ଆଧାର ନଂ ସ୍ଥାନରେ ବିବାହ ତାରିଖ ୧/୦୨/୨୧ ଲେଖାଯାଇଥିବା ଦେଖିବାକୁ ମିଳୁଛି।
ଏକ ସାକ୍ଷାତକାରରେ ଗୋଗୋଲ କହିଛନ୍ତି, ଏଭଳି ବିଚାର ତାଙ୍କ ସ୍ତ୍ରୀଙ୍କ ମନରେ ଆସିଥିଲା। ଆମେ ଡିଜିଟାଲ ଇଣ୍ଡିଆକୁ ସମର୍ଥନ କରୁଛୁ। ଏହାକୁ ଦର୍ଶାଇବା ପାଇଁ ଏହାଠାରୁ ଭଲ ଉପାୟ ନ ଥିଲା। ବିବାହକୁ ଆସିଥିବା ଅତିଥି ଚେୟାରରେ ଏଭଳି ଷ୍ଟାଇଲ୍ର ମେନୁ ଦେଖି ବେଶ୍ ଆଶ୍ଚର୍ଯ୍ୟ ହେବା ସହ ଖୁସି ପ୍ରକଟ କରିଥିଲେ। କେବଳ ଏତିକି ନୁହେଁ କିଛି ନିଜର ଆଧାରକାର୍ଡ ଛାଡ଼ି ଆସିଥିବା ମଧ୍ୟ ଭାବିଥିଲେ। ମୋଟାମୋଟି ଭାବେ ଉଭୟଙ୍କ ବିବାହ ଆଶା ମୁତାବକ ଢ଼ଙ୍ଗରେ ସମ୍ପନ୍ନ ହୋଇଛି ବୋଲି ସେ କହିଛନ୍ତି।