କଣ୍ଟାପଡା, ୬ା୨ (ଡି.ଏନ୍.ଏ.): କଣ୍ଟାପଡା ବ୍ଲକ ଅନ୍ତର୍ଗତ ବାଇରୋଇ ନାରାୟଣୀ ୟୁଥକ୍ଲବ ପକ୍ଷରୁ ସ୍ଥାନୀୟ କେଳାକୁଦ ପଡିଆରେ ଆୟୋଜିତ ୩ୟ ୟୁନାଇଟେଡ କପ୍ କ୍ରିକେଟ ଟୁର୍ନାମେଣ୍ଟର ଫାଇନାଲ ମ୍ୟାଚରେ ବାଲିଅନ୍ତା ଆର୍ସିସି କ୍ରିକେଟ କ୍ଲବକୁ ୮୬ ରନରେ ହରାଇ ସ୍ମାଇଲ ଏସ୍ଜି ସ୍ପୋର୍ଟିଂ ସୁନ୍ଦରଗ୍ରାମ ଚାମ୍ପିୟନ ଟ୍ରଫି ହାସଲ କରିଛି।
ସୌରଭ ଦାସଙ୍କ ୧୭ ବଲରୁ ୫୦ ଓ ଦିଲୀପ ରାଉତଙ୍କ ୨୫ ବଲରୁ ବିସ୍ଫୋରକ ୬୭ ରନ ବଳରେ ସୁନ୍ଦରଗ୍ରାମ ଦଳ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୫ ଉଇକେଟ ହରାଇ ୨୬୨ ରନ୍ କରିଥିଲା। ବିପକ୍ଷ ଦଳର ବିକାଶ ଓ ପ୍ରଭାତ ୨ଟି ଲେଖାଏ ଉଇକେଟ ନେଇଥିଲେ। ୨୬୨ ରନ୍ର ବିଜୟ ଲକ୍ଷ୍ୟକୁ ପିଛାକରି ବାଲିଅନ୍ତା ଦଳ ପ୍ରାରମ୍ଭରେ ସୁମନ୍ତଙ୍କ ୪୦ ଓ ଅଭିତାଭଙ୍କ ୩୯ରନ ସହାୟତାରେ ଭଲ ଆରମ୍ଭ କରିଥିଲା। ମାତ୍ର ପରବର୍ତ୍ତୀ ବ୍ୟାଟରମାନଙ୍କ ବିଫଳତା ଯୋଗୁ ଦଳ ୧୬ ଓଭରରେ ୧୭୬ ରନ କରି ଅଲଆଉଟ ହୋଇଯାଇଥିଲା।
ଚାମ୍ପିୟନ ଦଳର ଚନ୍ଦନ ୪ ଓ ବାପୁଜୀ ୩ ଉଇକେଟ ନେଇ ବିପର୍ଯ୍ୟୟ ଘଟାଇଥିଲେ। କଣ୍ଟାପଡା ସରପଞ୍ଚ ନିର୍ମଳ ସାହୁ, ସାମାଜିକ କର୍ମୀ ପବିତ୍ର ପ୍ରଧାନ, ଗୁଣନିଧି ସାହୁ, ସୁକାନ୍ତ ସାହୁ, ରମେଶ ସାହୁ, ବିଜୟ ନନ୍ଦ, ରାଜେଶ ନନ୍ଦ ପ୍ରମୁଖ ଅତିଥିଭାବେ ଯୋଗଦେଇ ବିଜୟୀଦଳକୁ ୧୮,୦୦୦ ଟଙ୍କାସହ ଚାମ୍ପିୟନ ଟ୍ରଫି ଓ ରନରଅପ୍ ଦଳକୁ ୧୨,୦୦୦ ଟଙ୍କା ଓ ଟ୍ରଫି ପ୍ରଦାନ କରିଥିଲେ। ଚାମ୍ପିୟନ ଦଳର ଚନ୍ଦନଙ୍କୁ ପ୍ଲେୟର ଅଫ ଦି ଫାଇନାଲ ଓ ରନରଅପ୍ ଦଳର ପବିତ୍ରଙ୍କୁ ପ୍ଲେୟର ଅଫ୍ ଦି ଟୁର୍ନାମେଣ୍ଟ ପୁରସ୍କାର ପ୍ରଦାନ କରାଯାଇଥିଲା। ଏହି ଅବସରରେ ଆୟୋଜକ କ୍ଲବ ପକ୍ଷରୁ ଅତିଥିମାନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଶେଷଦେବ ସ୍ବାଇଁ , ସୁନୀଲ ଦଳେଇ ଓ ସତ୍ୟରଞ୍ଜନ ବାରିକ ମ୍ୟାଚ ପରିଚାଳନା କରିଥିଲେ।
