ଓ୍ପାଶିଂଟନ, ୧୫।୨ : ୟୁକ୍ରେନ୍ ଉପରେ ବୁଧବାର ସ୍ଥାନୀୟ ସମୟ ଭୋର୍ ସାଢ଼େ ୫ଟାରେ ରୁଷିଆ ଆକ୍ରମଣ କରିବାର ଯୋଜନା କରିଛି ବୋଲି ଆମେରିକା ପ୍ରତିରକ୍ଷା ବିିଭାଗ ପକ୍ଷରୁ ଦାବି କରାଯାଇଛି। ସ୍ଥାନୀୟ ସମୟ ଭୋର୍ ୩ଟାରେ ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନ୍ ଆକ୍ରମଣ ସମ୍ପର୍କରେ ଘୋଷଣା କରିବା ପରେ ରୁଷିଆ ଆକ୍ରମଣକୁ ଚୂଡ଼ାନ୍ତ ରୂପ ଦେବ ବୋଲି ପ୍ରତିରକ୍ଷା ବିଭାଗ କହିଛି।
ଭାରତୀୟ ସମୟାନୁସାରେ ଯୁଦ୍ଧ ଘୋଷଣା ରାତି ୧୨ଟାରେ କରାଯିବ। ଏହାପରେ ଯୋଜନାବଦ୍ଧ ଭାବେ ୟୁକ୍ରେନ୍ ରାଜଧାନୀ କାଇଭ୍କୁ ମସ୍କୋର ନିୟନ୍ତ୍ରଣକୁ ନିଆଯିବ। ଭାରତୀୟ ସମୟ ରାତି ସାଢ଼େ ଦୁଇଟାରେ ରୁଷିଆ ୟୁକ୍ରେନ୍ ଉପରେ ଆକ୍ରମଣ ଆରମ୍ଭ କରିବ।
ପ୍ରଥମେ କାଇଭ୍ର ସୈନ୍ୟ ଶିବିର, ସରକାରୀ କମାଣ୍ଡ ଏବଂ ନିୟନ୍ତ୍ରଣ କେନ୍ଦ୍ର ଉପରେ ରୁଷିଆ ଯୁଦ୍ଧ ବିମାନ ଆକ୍ରମଣ କରିବ। ୟୁକ୍ରେନ୍ର ଦକ୍ଷିଣ ତଟୀୟ ଅଞ୍ଚଳରେ ରୁଷିଆ ଅକ୍ରମଣ କରିବାର ଯୋଜନା କରିଛି। ୟୁକ୍ରେନ୍ର ପୂର୍ବ ସୀମାରେ ରୁଷିଆର ୧,୨୬,୦୦୦ରୁ ଅଧିକ ସୈନ୍ୟ ଆକ୍ରମଣ ପାଇଁ ପ୍ରସ୍ତୁତ ହୋଇ ରହିଥିବାବେଳେ ଉତ୍ତରରେ ବେଲାରୁଷରେ ୮୦,୦୦୦ ସୈନ୍ୟ ନିର୍ଦ୍ଦେଶକୁ ଅପେକ୍ଷା କରି ରହିଛନ୍ତି।
ରୁଷିଆ ସୈନ୍ୟ ୟୁକ୍ରେନ୍ ସୀମାରୁ ହଟୁଥିବା ନେଇ ମଙ୍ଗଳବାର ସୂଚନା ମିଳିଥିଲା ବୋଲି ଆମେରିକା ପ୍ରତିରକ୍ଷା ଏଜେନ୍ସି କହିଛି। ତେବେ ରୁଷିଆ ସମ୍ପୂର୍ଣ୍ଣ ବିବରଣୀ ପ୍ରଦାନ କରି ନାହିଁ। ଏଥିରୁ ଜଣାପଡୁଛି ଯେ ରୁଷିଆ ଆକ୍ରମଣ ଲାଗି ଚୂଡ଼ାନ୍ତ ପ୍ରସ୍ତୁତି କରି ସାରିଥିବା ନେଇ ଏଜେନ୍ସି ପକ୍ଷରୁ ସୂଚନା ପ୍ରଦାନ କରାଯାଇଛି।
