ଓ୍ବାଶିଂଟନ୍,୬।୭: କରୋନା ଭାଇରସ୍କୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅନେକ ସମୟରେ ଚାଇନାକୁ ଟାର୍ଗେଟ କରିଥାନ୍ତି। ସୋମବାର ପୁଣି ଥରେ ଟ୍ରମ୍ପ ଚାଇନାକୁ ଭର୍ତ୍ସନା କରି କରୋନା ଭାଇରସ୍କୁ ‘ଚାଇନିଜ୍ ଭାଇରସ୍’ ବୋଲି କହିଛନ୍ତି। ଏଥିସହ ଟ୍ରମ୍ପ କହିଛନ୍ତି ଆମେରିକାରେ ବହୁ ସଂଖ୍ୟାରେ ଟେଷ୍ଟ କରାଯାଉଥିବାରୁ ପ୍ରତିଦିନ ଏଠାରେ ଅଧିକ ସଂଖ୍ୟାରେ କରୋନା ପଜିଟିଭ୍ ଚିହ୍ନଟ ହେଉଛନ୍ତି। କିନ୍ତୁ ଏବେ ମୃତ୍ୟୁ ସଂଖ୍ୟାରେ ହ୍ରାସ ଘଟିଛି ବୋଲି ଟ୍ରମ୍ପ ଟୁଇଟ କରି କହିଛନ୍ତି। ସୂଚନାଯୋଗ୍ୟ, ଗତ କିଛି ଦିନରୁ ଆମେରିକାରେ କରୋନା ଭାଇରସ୍ ସଂକ୍ରମଣ ଦ୍ରୁତ ଗତିରେ ବ୍ୟାପିବାରେ ଲାଗିଛି। କରୋନା ଜନିତ ପ୍ରତିଦିନ ଏଠାରେ ପ୍ରାୟ ୫୦ହଜାର କରୋନା ରୋଗୀ ଚିହ୍ନଟ ହେଉଥିଲେ। ଓ୍ବାଲ୍ଡ ମିଟର ଅନୁସାରେ ଆମେରିକାରେ ଏପର୍ଯ୍ୟନ୍ତ ୨୯ଲକ୍ଷ ଲୋକ କରୋନାରେ ସଂକ୍ରମିତ ହୋଇଥିବା ବେଳେ ୧.୩୨ଲକ୍ଷ ଲୋକଙ୍କ ମୃତ୍ୟୁ ଘଟିଛି। କିନ୍ତୁ ଏବେ ଆମେରିକାରେ ମୃତ୍ୟୁ ସଂଖ୍ୟା ହ୍ରାସ ପାଇଥିବା ଜଣାପଡ଼ିଛି। ବର୍ତ୍ତମାନ ଏଠାରେ କରୋନା ଭାଇରସ୍ ଜନିତ ଦିନକୁ ୫୦୦ଜଣଙ୍କ ମୃତ୍ୟୁ ଘଟୁଛି। ପୂର୍ବରୁ କିନ୍ତୁ ଏହି ସଂଖ୍ୟା ୫ହଜାର ରହିଥିଲା। କରୋନା ଭାଇରସ୍କୁ ନେଇ ଲଗାତର ଟ୍ରମ୍ପ ଚାଇନାକୁ ସମାଲୋଚନା କରୁଥିବା ଦେଖିବାକୁ ମିଳେ। ବେଳ ଥାଉ ଯଦି କରୋନା ବିଷୟରେ ଚାଇନା ସାରା ବିଶ୍ୱକୁ ସୂଚାଇଥାନ୍ତା, ତେବେ ଏଭଳି ସଙ୍ଗୀନ ପରିସ୍ଥିତି ଦେଖିବାକୁ ମିଳି ନ ଥାନ୍ତା ବୋଲି ଟ୍ରମ୍ପ କହିଛନ୍ତି। ଏଥିପାଇଁ ସେ ସବୁବେଳେ କରୋନାକୁ ଚାଇନିଜ୍ ଭାଇରସ୍ ବୋଲି କହୁଛନ୍ତି।
