ଓ୍ବାଶିଂଟନ,୯ା୧୧: ଆମେରିକାବାସୀ ଅସତ୍ୟକୁ ପରାଜିତ କରି ସତ୍ୟକୁ ବିଜୟୀ କରାଇଛନ୍ତି। ସେମାନେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ହରାଇ ଆଶା, ଏକତା ଓ ଶିଷ୍ଟତାକୁ ବାଛିଛନ୍ତି। ଆମେରିକାକୁ ପ୍ରତ୍ୟେକ କୁନି ଝିଅ ଏକ ସମ୍ଭାବନାର ଦେଶ ଭାବେ ଦେଖନ୍ତୁ ବୋଲି ଉପରାଷ୍ଟ୍ରପତି ଭାବେ ନିର୍ବାଚିତ ହେବା ପରେ ଡେମୋକ୍ରାଟ୍ କମଲା ହାରିସ୍ କହିଛନ୍ତି।
ଥର ପାଇଁ ଜଣେ ଏସୀୟ-ଆମେରିକୀୟ, କୃଷ୍ଣକାୟ ତଥା ମହିଳା ଉପରାଷ୍ଟ୍ରପତି ଭାବେ ନିର୍ବାଚିତ ହେବା ପରେ ଶନିବାର ରାତିରେ ଡେଲାଓ୍ବେରସ୍ଥିତ ଓ୍ବିଲ୍ମିଂଟନର ଚେସ୍ ସେଣ୍ଟରରେ କମଲା ହାରିସ୍ ଜାତି ଉଦ୍ଦେଶ୍ୟରେ ସମ୍ବୋଧିତ କରିଛନ୍ତି। ସେ କହିଛନ୍ତି, ଆମେରିକାରେ ମହିଳାଙ୍କୁ ଭୋଟ ପାଇବା ପାଇଁ ୧୦୦ ବର୍ଷ ଧରି ସଂଗ୍ରାମ କରିବାକୁ ପଡ଼ିଛି। ସେମାନଙ୍କ ମଧ୍ୟରେ ଥିବା କୃଷ୍ଣକାୟ ମହିଳାଙ୍କୁ ଅଣଦେଖା କରାଯାଇଛି। କିନ୍ତୁ ସେମାନେ ଆମ ଗଣତନ୍ତ୍ରର ମେରୁଦଣ୍ଡ ବୋଲି ଅନେକ ସମୟରେ ପ୍ରମାଣିତ କରିଛନ୍ତି। କୃଷ୍ଣକାୟ ରାଷ୍ଟ୍ରପତି ଭାବେ ମୁଁ ପ୍ରଥମ ହୋଇପାରେ। କିନ୍ତୁ ଶେଷ ମହିଳା ନୁହେଁ। ଏହି ଅବସରରେ କମଲା ହାରିସ୍ ତାଙ୍କ ମା’ ଶ୍ୟାମଲା ଗୋପାଲନ୍ ହାରିସ୍ଙ୍କୁ ମନେପକାଇ ଶ୍ରଦ୍ଧାଞ୍ଜଳି ଦେଇଥିଲେ। ଶ୍ୟାମଲାଙ୍କୁ ୧୯ ବର୍ଷ ହେଉଥିବାବେଳେ ସେ ଡାକ୍ତରୀ ପଢ଼ିବା ପାଇଁ ଆମେରିକା ଯାଇଥିଲେ। ୨୦୦୯ରେ ଆର ପାରିକୁ ଚାଲିଯାଇଥିବା ମା’ଙ୍କୁ କମଲା ତାଙ୍କ ସଫଳତାର ଶ୍ରେୟ ଦେଇ ସେ ସବୁବେଳେ ଆମ ହୃଦୟରେ ରହିବେ ବୋଲି କହିଥିଲେ। ଆମେରିକାର ଗଣତନ୍ତ୍ର ଓ ଅଖଣ୍ଡତାକୁ ରକ୍ଷା କରିଥିବାରୁ ସେ ପୋଲ୍ ଓ୍ବାର୍କରମାନଙ୍କୁ ଧନ୍ୟବାଦ ଦେଇଥିଲେ। ପରେ ସେ ଭାବି ରାଷ୍ଟ୍ରପତି ଜୋ ବାଇଡେନ୍ଙ୍କୁ ଇଣ୍ଟ୍ରୋଡ୍ୟୁସ୍ କରିଥିଲେ।
୭୭ ବର୍ଷୀୟ ବାଇଡେନ୍ ମଞ୍ଚ ଉପରକୁ ଆସିବା ମାତ୍ରେ ଉପସ୍ଥିତ ଜନତାଙ୍କ ମଧ୍ୟରେ ଉଲ୍ଲାସ ଭରିଯାଇଥିଲା। ବକ୍ତବ୍ୟ ଆରମ୍ଭ କରି ବାଇଡେନ କହିଥିଲେ, ଲୋକେ ଆମକୁ ସ୍ପଷ୍ଟ ବହୁମତ ସହ ବିଜୟୀ କରାଇଛନ୍ତି। ଏଥିରେ ସାରା ଦେଶ ଖୁସି। ସମଗ୍ର ବିଶ୍ୱ ଆମ ଉପରେ ଖୁସି ଓ ଆଶା ଅଜାଡ଼ିଦେଉଛି। ଆସନ୍ତା କାଲି ଏକ ଉନ୍ନତ ଦିନ ହେବ। ଆପଣମାନେ ମୋ ଉପରେ ଯେଉଁ ଆସ୍ଥା ପ୍ରକଟ କରିଛନ୍ତି ସେଥିପାଇଁ କୃତଜ୍ଞ। ନିଜ ୧୫ ମିନିଟର ଭାଷଣରେ ସେ ଆହୁରି କହିଥିଲେ, ମୁଁ ଏପରି ଜଣେ ରାଷ୍ଟ୍ରପତି ହେବାକୁ ପ୍ରତିଜ୍ଞା କରୁଛି, ଯିଏ ବିଭାଜନ ନ କରି ସମସ୍ତଙ୍କୁ ଏକତ୍ରିତ କରିବ। ଯିଏ ରେଡ୍ ଷ୍ଟେଟ୍ ଓ ବ୍ଲ୍ୟ ଷ୍ଟେଟ୍କୁ ନ ଦେଖି କେବଳ ୟୁନାଇଟେଡ୍ ଷ୍ଟେଟ୍କୁ ଦେଖିବ। କରୋନା ମହାମାରୀ ଦେଶର ଅର୍ଥନୀତିକୁ ପ୍ରଭାବିତ କରିଛି। ଏହି ଭୂତାଣୁରେ ସଂକ୍ରମିତ ହୋଇଥିବା ଟ୍ରମ୍ପ୍ଙ୍କ ଭୋଟରକୁ ବାଇଡେନ୍ ଆଶା ଓ ସହାନୁଭୂତିର ସନ୍ଦେଶ ଦେଇଥିଲେ।
ହ୍ବାଇଟ୍ ହାଉସ୍କୁ ଯିବେ ବାଇଡେନ୍ଙ୍କ କୁକୁର
ପ୍ରେସିଡେଣ୍ଟ ଇଲେକ୍ଟ ଜୋ ବାଇଡେନ୍ ଓ ତାଙ୍କ ସ୍ତ୍ରୀ ଜିଲ୍ ବାଇଡେନ୍ ହ୍ବାଇଟ୍ ହାଉସ୍କୁ ଯିବେ। ତାଙ୍କ ସହ ଦୁଇଟି ଜର୍ମାନ୍ ଶିଫ୍ହାର୍ଡସ୍ କୁକୁର ମଧ୍ୟ ଯିବେ। ଦୁଇ କୁକୁର ‘ମେଜର୍’ ଓ ‘ଚାମ୍ପ୍’ ବାଇଡେନ୍ ଦମ୍ପତିଙ୍କ ସହ ସେଠାରେ ୪ ବର୍ଷ ରହିବେ। ରାଷ୍ଟ୍ରପତିଙ୍କୁ ପ୍ରେସିଡେଣ୍ଟ ଅଫ୍ ଦି ୟୁନାଇଟେଡ୍ ଷ୍ଟେଟ୍ସ (ପିଓଟିୟୁଏସ୍) କୁହାଯାଉଥିବାବେଳେ ଦୁଇ କୁକୁରଙ୍କୁ ସୋସିଆଲ ମିଡିଆରେ ୟୁଜର୍ସ ଡଗ୍ସ ଅଫ୍ ଦି ୟୁନାଇଟେଡ୍ ଷ୍ଟେଟ୍ସ (ଡିଓଟୁୟୁଏସ୍) ଆଖ୍ୟା ଦେଇଛନ୍ତି।