ନୂଆଦିଲ୍ଲୀ, ୩୦ା୫: ବାଣିଜ୍ୟ କ୍ଷେତ୍ରରେ ଚାଇନାର ଏକଚାଟିଆ ମନୋବୃତ୍ତି ବେଜିଂକୁ କ୍ରମଶଃ ଆର୍ଥିକ ସ୍ତରରେ ପ୍ରଭାବିତ କରିବାରେ ଲାଗିଛି। ପରିବର୍ତ୍ତନଶୀଳ ଭୂରାଜନୈତିକ ପ୍ରେକ୍ଷାପଟରେ ଚାଇନାର ଆଧିପତ୍ୟ ଦୁର୍ବଳ ହୋଇଥିବାବେଳେ ଭାରତ ଏକ ଉଦୀୟମାନ ଅର୍ଥନୀତି ଭାବେ ମୁଣ୍ଡଟେକିଛି। ଏଭଳି ସମୟରେ ଆମେରିକା ଭାରତ ସହ ବାଣିଜି୍ୟକ ଘନିଷ୍ଠତା ବଢ଼ାଇ ଏହି କ୍ଷେତ୍ରରେ ଚାଇନାକୁ ଟପିଯାଇଛି। ବହୁରାଷ୍ଟ୍ରୀୟ କମ୍ପାନୀଗୁଡ଼ିକ ଚାଇନାରୁ ମୁହଁ ଫେରାଇ ଭାରତକୁ ଏକ ଉତ୍କୃଷ୍ଟ ବଜାର ରୂପେ ବାଛି ନେଇଥିବାବେଳେ ଆଗାମୀ ଦିନରେ ନୂଆଦିଲ୍ଲୀ-ଓ୍ବାଶିଂଟନ୍ ସମ୍ପର୍କ ଆହୁରି ମଜଭୁତ ହେବା ଆଶା କରାଯାଉଛି।
ଆମେରିକା ଓ ଭାରତ ମଧ୍ୟରେ ୨୦୨୧-୨୨ରେ ହୋଇଥିବା ଦ୍ୱିପାକ୍ଷିକ ବାଣିଜ୍ୟ ନୂଆ ରେକର୍ଡ କରିଛି। ଗତ ଆର୍ଥିକ ବର୍ଷରେ ଦୁଇ ଦେଶ ମଧ୍ୟରେ ଅର୍ଥନୈତିକ ସମ୍ବନ୍ଧ ଅଧିକ ମଜଭୁତ ହୋଇଛି। ବାଣିଜ୍ୟ ମନ୍ତ୍ରଣାଳୟ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ବେପାରବଣିଜରେ ଆମେରିକା ଏବେ ଭାରତର ସବୁଠାରୁ ବଡ଼ ଭାଗୀଦାରି ହୋଇଛି। ୨୦୨୧-୨୨ରେ ଦ୍ୱିପାକ୍ଷିକ କାରବାର ୧୧୯.୪୨ ବିଲିୟନ ଡଲାର ଛୁଇଁଛି। ୨୦୨୦-୨୧ରେ ଏହା ୮୦.୫୧ ବିଲିୟନ୍ ଡଲାର ଥିଲା। ଭାରତ ସହ କାରବାରରେ ଏବେ ଆମେରିକା ଚାଇନାକୁ ପଛରେ ପକାଇଛି।
ଅନୁସାରେ, ୨୦୨୧-୨୨ରେ ଭାରତରୁ ୭୬.୧୧ ବିଲିୟନ୍ ଡଲାରର ସାମଗ୍ରୀ ଆମେରିକାକୁ ରପ୍ତାନି ହୋଇଛି। ୨୦୨୦-୨୧ ଆର୍ଥିକ ବର୍ଷରେ ଏହା ୫୧.୬୨ ବିଲିୟନ୍ ଡଲାର ରହିଥିଲା।
ସେହିପରି ୨୦୨୧-୨୨ରେ ଭାରତକୁ ଅଧିକ ଆମେରିକୀୟ ସାମଗ୍ରୀ ଆମଦାନୀ ହୋଇଛି। ଏହାର ମୂଲ୍ୟ ୪୩.୩୧ ବିଲିୟନ ଡଲାର ରହିଛି। ୨୦୨୦-୨୧ ଆର୍ଥିକ ବର୍ଷରେ ଭାରତକୁ ୨୯ ବିଲିୟନ ଡଲାର ମୂଲ୍ୟର ସାମଗ୍ରୀ ଆମେରିକାରୁ ଆମଦାନୀ ହୋଇଥିଲା। ଭାରତ ଓ ଚାଇନା ମଧ୍ୟରେ ଗତ ଆର୍ଥିକ ବର୍ଷରେ ୧୧୫.୪୨ ବିଲିୟନ ଡଲାର ମୂଲ୍ୟର କାରବାର ହୋଇଥିଲା। ମନ୍ତ୍ରଣାଳୟ ଦେଇଥିବା ତଥ୍ୟ ମୁତାବକ, ୨୦୨୦-୨୧ରେ ଚାଇନା ସହ ୮୬.୪ ବିଲିୟନ ଡଲାରର ସାମଗ୍ରୀ ରପ୍ତାନି ଓ ଆମଦାନୀ ହୋଇଥିଲା। ୨୦୨୧-୨୨ ଆର୍ଥିକ ବର୍ଷରେ ଚାଇନାକୁ ଭାରତୀୟ ସାମଗ୍ରୀ ରପ୍ତାନି ସାମାନ୍ୟ ବୃଦ୍ଧି ପାଇଛି। ଏହି ସମୟରେ ମୋଟ ୨୧.୨୫ ବିଲିୟନ ଡଲାରର ଜିନିଷ ଭାରତ ଚାଇନାକୁ ପଠାଇଥିବାବେଳେ ୨୦୨୦-୨୧ରେ ତାହା ୨୧.୧୮ ବିଲିୟନ୍ ଡଲାର ଥିଲା। କିନ୍ତୁ ଚାଇନାରୁ ସାମଗ୍ରୀ ଆମଦାନୀ ଗତ ଆର୍ଥିକ ବର୍ଷରେ ଆଖିଦୃଶିଆ ଭାବେ ବଢ଼ିଛି।
୨୦୨୧-୨୨ରେ ଭାରତ ୯୪.୧୬ ବିଲିୟନ ଡଲାରର ସାମଗ୍ରୀ ଚାଇନାରୁ ଆଣିଛି। ୨୦୨୦-୨୧ରେ ଏହି ମୂଲ୍ୟ ପ୍ରାୟ ୬୫.୨୧ ବିଲିୟନ ଡଲାର ରହିଥିଲା। ୨୦୨୦-୨୧ ତୁଳନାରେ ଗତ ଆର୍ଥିକ ବର୍ଷରେ ଭାରତ ଓ ଚାଇନା ମଧ୍ୟରେ ବାଣିଜି୍ୟକ ବ୍ୟବଧାନ ୪୪ ବିଲିୟନ୍ ଡଲାରରୁ ୭୨.୯୧ ବିଲିୟନ୍ ଡଲାରକୁ ବୃଦ୍ଧି ପାଇଛି। ୨୦୧୩-୧୪ରୁ ୨୦୧୭-୧୮ ପର୍ଯ୍ୟନ୍ତ ଚାଇନା ଭାରତର ସବୁଠାରୁ ବଡ଼ ବାଣିଜି୍ୟକ ସହଯୋଗୀ ରହିଥିଲା। ଚାଇନା ପୂର୍ବରୁ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ଭାରତର ସର୍ବବୃହତ୍ ଟ୍ରେଡିଂ ପାର୍ଟନର ରହିଥିଲା। ୨୦୨୧-୨୨ରେ ୟୁଏଇ ସହ ଭାରତ ୭୨.୯ ବିଲିୟନ୍ ଡଲାରର କାରବାର କରିଛି। ଫଳରେ ୟୁଏଇ ଭାରତହ ତୃତୀୟ ସର୍ବବୃହତ୍ ବାଣିଜି୍ୟକ ଭାଗୀଦାରି ହୋଇଛି। ନୂଆଦିଲ୍ଲୀ ଏବଂ ଓ୍ବାଶିଂଟନ୍ ଅର୍ଥନୈତିକ ସମ୍ପର୍କକୁ ମଜଭୁତ କରିବା ପାଇଁ ପଦକ୍ଷେପ ନେଉଥିବାରୁ ଆଗାମୀ ଦିନରେ ଦ୍ୱିପାକ୍ଷିକ ବାଣିଜ୍ୟ କାରବାର ବୃଦ୍ଧି ପାଇବ ବୋଲି ବିଶେଷଜ୍ଞମାନେ ଆଶା କରିଛନ୍ତି।