ଓ୍ବାଶିଂଟନ,୨୧।୬: ଚାଇନା ନିଜର ସାମୁଦ୍ରିକ ଶକ୍ତି ବୃଦ୍ଧି କରିବାରେ ଲାଗିଛି। ଏପରିସ୍ଥଳେ ଆମେରିକା ନିଜର ଶକ୍ତି ପ୍ରଦର୍ଶନ କରିବା ସହିତ ସମୁଦ୍ରରେ ୧୮ ହଜାର କିଲୋଗ୍ରାମ୍ର ବିରାଟ ବୋମା ପରୀକ୍ଷା କରିଛି। ଆମେରିକା ନୌସେନାର ଏୟାର କ୍ରାଫ୍ଟ କ୍ୟାରିଅର ଗେର୍ଲାଡ ଫୋର୍ଡ ଦ୍ୱାରା ବୋମାକୁ ଅଥଳ ସମୁଦ୍ର ଗର୍ଭରେ ପରୀକ୍ଷଣ କରାଯାଇଛି। ଏହାଯୋଗୁ ସୃଷ୍ଟି ହୋଇଥିବା ପ୍ରଚଣ୍ଡ ବିସ୍ଫୋରଣ ଦ୍ୱାରା ସମୁଦ୍ରରେ ଭୂକମ୍ପ ହୋଇଛି। ସମୁଦ୍ରରେ ଉଚ୍ଚ ଢ଼େଉ ସୃଷ୍ଟି ହୋଇଥିବା ଆମେରିକା ନୌସେନା ପକ୍ଷରୁ କୁହାଯାଇଛି। ତେବେ ଏହା ଏକ ସୁରକ୍ଷିତ ପରୀକ୍ଷା ଥିଲା ବୋଲି ନୌସେନା କହିଛି। ଆମେରିକା ନୌସେନା ବୋମା ବିସ୍ଫୋରଣ ୩୭ ସେକେଣ୍ଡର ଏକ ଭିଡ଼ିଓ ଟୁଇଟରରେ ଅପଲୋଡ୍ କରିଛି। ଏବେ ଭିଡ଼ିଓଟି ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଏହାକୁ ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ଆରମ୍ଭ ହୋଇଛି।
