ଓ୍ବାଶିଂଟନ୍,୨୬।୬: ପୂର୍ବ ଲଦାଖର ଏଲ୍ଏସିରେ ଭାରତ ଓ ଚାଇନା ମଧ୍ୟରେ ଉତ୍ତେଜନା ଜାରି ରହିଛି। ଉଭୟ ଦେଶ ମଧ୍ୟରେ ଆଲୋଚନା ଜାରି ରହିବା ପରେ ବି ସମସ୍ୟାର କୌଣସି ସମାଧାନ ବାଟ ବାହାରି ପାରିନାହିଁ। ଇତିମଧ୍ୟରେ ଆମେରିକା ଭାରତକୁ ସମର୍ଥନ କରିବାକୁ ଯାଇ ୟୁରୋପିଆନ ଦେଶ ଜର୍ମାନରୁ ନିଜର ସୈନ୍ୟଙ୍କୁ ହଟାଇ ଦେଇଥିବା ଜଣାପଡ଼ିଛି। ଆମେରିକା ବୈଦେଶିକ ସଚିବ ମାଇକ ପୋମ୍ପିଓ ଗୁରୁବାର ଏନେଇ ସୂଚନା ଦେଇଛନ୍ତି। ସୂଚନାଯୋଗ୍ୟ, ଜର୍ମାନ ମାର୍ସାଲ ଫଣ୍ଡର ବ୍ରସେଲ୍ସ୍ସ ଫୋରମ ୨୦୨୦ର ଭର୍ଚୁଆଲ୍ ମିଟିଂ ଅବସରରେ ମାଇକ୍ କହିଛନ୍ତି, ଚାଇନାଠାରୁ ଭାରତ, ଇଣ୍ଡୋନେସିଆ, ମାଲେସିଆ, ଫିଲିପାଇନ୍ସ ଭଳି ଏସିଆ ଦେଶ ପ୍ରତି ବିପଦ ରହିଛି। ତେଣୁ ଏହାକୁ ଦୃଷ୍ଟିରେ ରଖି ଆମେରିକା ତା’ର ସୈନ୍ୟଙ୍କୁ ଏଭଳି ସ୍ଥାନରେ ମୁତୟନ କରିବାକୁ ଚାହୁଁଛି, ଯାହାଦ୍ୱାରା ଚାଇନା ସୈନ୍ୟ ପିପୁଲ୍ସ ଲିବସେରସନ ଆର୍ମି(ପିଏଲ୍ଏ)କୁ କଡା ଜବାବ ଦିଆଯାଇପାରିବ। ପିଏଲ୍ଏ ମୁକାବିଲା ନିମନ୍ତେ ଆମେରିକାର ସାମରିକ ବାହିନୀ ଠିକଣା ସ୍ଥାନରେ ମୁତୟନ ହୋଇଛନ୍ତି କି ନାହିଁ, ସେନେଇ ସୁନିଶ୍ଚିତ ସମୀକ୍ଷା କରାଯାଉଥିବା ନେଇ ମାଇକ୍ ପୋମ୍ପିଓ କହିଛନ୍ତି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିର୍ଦ୍ଦେଶକ୍ରମେ ସୈନ୍ୟ ଅବସ୍ଥିତିର ସମୀକ୍ଷା କରାଯାଉଛି। ତେଣୁ ଯୁକ୍ତରାଷ୍ଟ୍ର ଆମେରିକା ଜର୍ମାନରୁ ସୈନ୍ୟସଂଖ୍ୟା ୫୨୦୦ରୁ ୨୫୦୦୦କୁ ହ୍ରାସ କରିଛି। ତେବେ ସ୍ଥାନର ସ୍ଥିତିକୁ ଦେଖି ବିଭିନ୍ନ ଦେଶରେ ସୈନ୍ୟବଳ ମୁତୟନ କରାଯିବ ବୋଲି ମାଇକ କହିଛନ୍ତି।
