ଓ୍ବାଶିଂଟନ୍, ୧୨ା୯: ଆମେରିକାର ବିଶ୍ୱ ବାଣିଜ୍ୟ କେନ୍ଦ୍ର ବିଲ୍ଡିଂରେ ୨୦୦୧ ସେପ୍ଟେମ୍ବର ୧୧ରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ପ୍ରାୟ ୩ ହଜାର ଜୀବନ ଯାଇଥିଲା। ୯/୧୧ ଆକ୍ରମଣକୁ ୨୦ ବର୍ଷ ପୂର୍ତ୍ତି ଅବସରରେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ଏବଂ ଦେଶର ପ୍ରଥମ ମହିଳା ଜିଲ୍ ବାଇଡେନ୍ ମୃତକଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ନ୍ୟୁୟର୍କରେ ଥିବା ସ୍କାରକୀଠାରେ ପୂର୍ବତନ ରାଷ୍ଟ୍ରପତି ବାରାକ ଓବାମା, ବିଲ୍ କ୍ଲିଣ୍ଟନ୍ଙ୍କ ସମେତ ସମସ୍ତ ପ୍ରଦେଶର ପ୍ରମୁଖ ବ୍ୟକ୍ତିବିଶେଷ ପହଞ୍ଚି ନୀରବ ପ୍ରାର୍ଥନା କରିଛନ୍ତି। ଏକତା ହିଁ ଆମେରିକାର ଶକ୍ତି। ତେଣୁ ଦେଶବାସୀ ସର୍ବଦା ଏକଜୁଟ ହୋଇ ରହିବାକୁ ବାଇଡେନ୍ ଆହ୍ବାନ ଦେଇଛନ୍ତି। ଏଥିସହ ଆକ୍ରମଣସ୍ଥଳରେ ନିଜ ଜୀବନକୁ ବାଜି ଲଗାଇ ଲୋକଙ୍କୁ ଉଦ୍ଧାର କରିଥିବା ଏବଂ ପ୍ରାଣ ହାରିଥିବା ସାହସୀମାନଙ୍କୁ ମଧ୍ୟ ସେ ସମ୍ମାନ ଜଣାଇଥିଲେ। ସମୟ ଯେତେ ବଦଳି ଗଲେ ବି ଏହି ସମୟ ସବୁବେଳେ କଷ୍ଟଦାୟକ ବୋଲି ବାଇଡେନ୍ କହିଥିଲେ। ବାଇଡେନ୍ ୩ ଆକ୍ରମଣସ୍ଥଳ ନ୍ୟୁୟର୍କର ବିଶ୍ୱ ବାଣିଜ୍ୟ କେନ୍ଦ୍ରର ଟୁଇନ୍ ଟାଓ୍ବାର ସମେତ ପେନ୍ସିଲଭାନିଆ ଏବଂ ପେଣ୍ଟାଗନ ବିଲ୍ଡିଂ ନିକଟକୁ ଯାଇଥିଲେ। ଜର୍ଜ ଡବ୍ଲ୍ୟୁ ବୁଶ୍, ଓବାମା ଏବଂ ଡୋନାଲ୍ଡ ଟ୍ରମ୍ପଙ୍କ ପରେ ୯/୧୧ ବର୍ଷ ପୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରିବାରେ ବାଇଡେନ୍ ହେଉଛନ୍ତି ଚତୁର୍ଥ ରାଷ୍ଟ୍ରପତି।
