ଗ୍ରସଆଇଲେଟ୍,୧୪।୭: ଓ୍ବେଷ୍ଟଇଣ୍ଡିଜ୍ର ଅଭିଜ୍ଞ ବ୍ୟାଟ୍ସମ୍ୟାନ୍ ତଥା ‘ୟୁନିଭର୍ସ ବସ୍’ ନାମରେ ଜଣାଶୁଣା କ୍ରିସ୍ ଗେଲ୍ ଅଷ୍ଟ୍ରେଲିଆ ବିପକ୍ଷ ତୃତୀୟ ଟି-୨୦ରେ ଧୁଆଁଧାର ବ୍ୟାଟିଂ କରିଥିଲେ। ସେ ୩୮ ବଲ୍ରେ ୪ ଚୌକା ଓ ୭ ଛକା ମାରି ୬୭ ରନ୍ କରିଥିଲେ। ତେବେ ଗେଲ୍ ଏହି ମ୍ୟାଚ୍ରେ ଯେଉଁ ବ୍ୟାଟ୍ରେ ଖେଲିଥିଲେ ସେଥିରେ ‘ଦ ବସ୍’ ଲେଖାଯାଇଥିଲା। ଏହା ପ୍ରଶଂସକଙ୍କୁ ଆଶ୍ଚର୍ଯ୍ୟ କରିଥିଲା। କାରଣ ବିଷୟରେ ପଚରାଯିବାରେ ଗେଲ୍ କହିଛନ୍ତି ଯେ, ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି) ମୁଁ ‘ୟୁନିଭର୍ସ ବସ୍’ ଶବ୍ଦର ବ୍ୟବହାର କରେ ବୋଲି ଚାହୁଁନାହିଁ। ଏଣୁ ମୁଁ ଏହାକୁ ଛୋଟ କରିଦେଇଛି। ଏବେ ବ୍ୟାଟ୍ ଉପରେ କେବଳ ‘ଦ ବସ୍’ ବୋଲି ଲେଖିଛି ବୋଲି ସେ କହିଛନ୍ତି। ଏହାଛଡ଼ା ମଜାଳିଆ ଢ଼ଙ୍ଗରେ ଆଇସିସିକୁ ମୁଁ ହିଁ ବସ୍ ବୋଲି ସେ କହିଥିବା ଦେଖାଯାଇଛି।
କହିରଖୁଛୁ, ଗତ କିଛି ମ୍ୟାଚ୍ରୁ ଫର୍ମରେ ନ ଥିଲେ ଗେଲ୍। ଏଥିପାଇଁ ତାଙ୍କୁ ସମାଲୋଚନାର ସମ୍ମୁଖୀନ ହେବାକୁ ପଡ଼ୁଥିଲା। ହେଲେ ଅଷ୍ଟ୍ରେଲିଆ ବିପକ୍ଷ ତୃତୀୟ ଟି-୨୦ରେ ଗେଲ୍ ଯେଉଁଭଳି ଭାବେ ସେ ପ୍ରତ୍ୟାବର୍ତ୍ତନ କରିଛନ୍ତି ସେଥିରୁ ସେ ସହଜରେ ପଡ଼ିଆ ଛାଡ଼ିବେ ନାହିଁ ବୋଲି ସ୍ପଷ୍ଟ କରିଛି। ତେବେ ସେ ଏହି ମ୍ୟାଚ୍ରେ ଏକ ବଡ଼ ସଫଳତା ହାସଲ କରିଛନ୍ତି। ସେ ପ୍ରଥମ ଖେଳାଳି ଭାବେ ଟି୨୦ କ୍ରିକେଟରେ ୧୪,୦୦୦ ରନ୍ ପୂରଣ କରିଛନ୍ତି।