ଜଗତ୍ସିଂହପୁର ଅଫିସ, ୧୮ା୩: କଟକ ଜିଲା ନିଆଳି ଓ କଣ୍ଟାପଡ଼ା ପରେ ଏବେ ଜଗତ୍ସିଂହପୁର ଜିଲା ବିରିଡ଼ି ବ୍ଲକ ଅଞ୍ଚଳରେ ଅଜଣା ଜନ୍ତୁ ଆକ୍ରମଣରେ ମେଣ୍ଢାଙ୍କ ମୃତ୍ୟୁ ହୋଇଛି। ବ୍ଲକର ମଙ୍ଗୁଲି ପଞ୍ଚାୟତ ଅନ୍ତର୍ଗତ ଶଙ୍ଖାରିସାହିର ପ୍ରଫୁଲ ବାରିକଙ୍କ ଗୁହାଳରେ ଗୁରୁବାର ରାତିରେ ୪ ମେଣ୍ଢାଙ୍କ ମୃତ୍ୟୁ ଘଟିଥିବାବେଳେ ୫ ଗୁରୁତର ହୋଇଥିବା ଜଣାପଡ଼ିଛି। ଏହି ଖବର ବିରିଡ଼ି ସମେତ ଜଗତ୍ସିଂହପୁର ଜିଲାରେ ଭୟର ବାତାବରଣ ସୃଷ୍ଟି କରିଛି। କିନ୍ତୁ ଲୋକେ ଆତଙ୍କିତ ନ ହେବା ପାଇଁ ବନ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।
ଏ ସମ୍ପର୍କରେ ଧଳତଙ୍ଗଗଡ଼ ରେଞ୍ଜ ଅଫିସର ରବୀନ୍ଦ୍ର କୁମାର ମହାନ୍ତି କହିଛନ୍ତି, ଅଜଣା ଜନ୍ତୁ ଆକ୍ରମଣରେ ମେଣ୍ଢାଙ୍କ ମୃତ୍ୟୁ ଖବରପାଇ ଜିଲା ବନ ଅଧିକାରୀ ଡ. ସଞ୍ଜୟ କୁମାର ସ୍ବାଇଁଙ୍କ ସମେତ ଫରେଷ୍ଟର, ଫରେଷ୍ଟ ଗାର୍ଡ ଓ ସେ ଶଙ୍ଖାରିସାହିରେ ପହଞ୍ଚତ୍ ଥିଲେ। ପ୍ରାଣୀ ସମ୍ପଦ ବିଭାଗ ଅଧିକାରୀମାନେ ପହଞ୍ଚତ୍ଲା ପରେ ୪ ମୃତ ମେଣ୍ଢାର ମୃତଦେହ ବ୍ୟବଚ୍ଛେଦ କରାଯାଇଛି। ଏହାପରେ ବାରିକଙ୍କ ବାଡ଼ିରେ ମାଟି ଖୋଳାଯାଇ ସେଥିରେ ଲୁଣ ଆଦି ଭରାଗଲା ପରେ ମୃତ ମେଣ୍ଢାଙ୍କୁ ପୋତି ଦିଆଯାଇଛି। ଏଥିସହ ଗୁରୁତରମାନଙ୍କ ଚିକିତ୍ସା କରାଯାଉଛି। ଏ ପରିସ୍ଥିତିରେ ଲୋକେ ଭୟଭୀତ ନ ହୋଇ ସତର୍କତା ଅବଲମ୍ବନ କରିବା ଉଚିତ। ଜନସାଧାରଣଙ୍କୁ ସଚେତନ କରିବା ପାଇଁ ଡାକବାଜି ଯନ୍ତ୍ର ସାହାଯ୍ୟରେ ବ୍ୟାପକ ପ୍ରଚାର କରାଯାଉଛି। ଲୋକେ ସେମାନଙ୍କ ଗୃହପାଳିତ ପ୍ରାଣୀଙ୍କୁ ଯଥାସମ୍ଭବ ଛାତ ଘରେ ରଖିବାକୁ ଚେଷ୍ଟା କରନ୍ତୁ ବୋଲି ରେଞ୍ଜ ଅଫିସର ମହାନ୍ତି କହିଛନ୍ତି। ପ୍ରାଣୀ ସମ୍ପଦ ବିଭାଗ ଏସ୍ଡିଭିଓ ଶଶାଙ୍କ ଶେଖର ନାୟକ କହିଛନ୍ତି, ଜୀବିତ ୫ ଗୁରୁତରଙ୍କ ମଧ୍ୟରୁ ୨ ମେଣ୍ଢାଙ୍କ ଅବସ୍ଥା ସଙ୍କଟାପନ୍ନ ରହିଛି। ମେଣ୍ଢାଗୁଡିକୁ ଏକାଧିକ ଅଜଣା ଜଙ୍ଗଲୀ ଜନ୍ତୁ ଆକ୍ରମଣ କରିଥିବା ସନ୍ଦେହ କରାଯାଉଛି। ସେମାନଙ୍କ ବେକରେ ଗଭୀର ଦାନ୍ତ ଦାଗ ରହିଛି। ଅଜଣା ଜନ୍ତୁ ଆକ୍ରମଣ ପ୍ରସଙ୍ଗରେ ଲୋକେ ସଚେତନ ରହିବା ଜରୁରୀ। ବିଶେଷକରି ମୃତ ମେଣ୍ଢାଙ୍କୁ ନ ଛୁଇଁବା ଦରକାର। କାରଣ ଅଜଣା ଜନ୍ତୁଙ୍କ ଆକ୍ରମଣ ଯୋଗୁ ଜଳାତଙ୍କ ରୋଗର ଜୀବାଣୁ ମେଣ୍ଢାଙ୍କ ଶରୀରରେ ରହିଥାନ୍ତି।
୨୦୧୭ ଓ ୨୦୧୮ରେ ନିଆଳି ଅଞ୍ଚଳରେ ଅଜଣା ଜନ୍ତୁ ଆକ୍ରମଣରେ ୨୨୫ଟି ମେଣ୍ଢାଙ୍କ ମୃତ୍ୟୁ ଘଟିଥିଲା। ବହୁ ସଂଖ୍ୟାରେ ଆହତ ହୋଇଥିଲେ। ସେତେବେଳେ ଭଅଁରା ଜଙ୍ଗଲରୁ ଗଧିଆ ଚାଲି ଆସି ମେଣ୍ଢାଙ୍କୁ ଆକ୍ରମଣ କରିଥିବା କୁହାଯାଉଥିଲା। ପ୍ରାଣୀ ବିଶେଷଜ୍ଞଙ୍କ ମତ ହେଲା, ଗଧିଆମାନେ ସାଧାରଣତଃ ରାତିରେ ଜନ୍ତୁଙ୍କୁ ଆକ୍ରମଣ କରି ତାଙ୍କ ରକ୍ତ ଶୋଷିଥାନ୍ତି। ସେମାନେ ମଧ୍ୟ ଏକୁଟିଆ ପରିବର୍ତ୍ତେ ଗୋଷ୍ଠୀ ହୋଇ ଶିକାରରେ ବାହାରିଥାନ୍ତି । ତେଣୁ ମେଣ୍ଢାଙ୍କ ବେକରେ ଦାନ୍ତ ଚିହ୍ନ ଥିବାରୁ ଗଧିଆମାନେ ଏଭଳି ଅଭାବନୀୟ ଘଟଣା ଘଟାଇଥାଇ ପାରନ୍ତି ବୋଲି ପ୍ରାଣୀ ବିଶେଷଜ୍ଞମାନେ ଅନୁମାନ କରିଛନ୍ତି। ନିକଟରେ ଅନୁରୂପ ଭାବେ ଅଜଣା ଜନ୍ତୁ ଆକ୍ରମଣରେ କଣ୍ଟାପଡ଼ା ଅଞ୍ଚଳରେ ୨୦ରୁ ଅଧିକ ମେଣ୍ଢାଙ୍କ ମୃତ୍ୟୁ ଘଟିଥିଲା। ସେତେବେଳେ ନିଆଳିରେ ସରକାରଙ୍କ ତରଫରୁ ମେଣ୍ଢା ପାଳକଙ୍କୁ ସହାୟତା ଯୋଗାଇ ଦିଆଯାଇଥିଲା। ମୃତ ବଡ଼ ମେଣ୍ଢା ପିଛା ୨ ହଜାର ଓ ସାନ ପିଛା ୧ ହଜାର ଟଙ୍କା ଲେଖାଏ କ୍ଷତିପୂରଣ ଦେବାକୁ ବ୍ୟବସ୍ଥା କରାଯାଇଥିଲା। ଏଠାରେ ମଧ୍ୟ ସେଭଳି କ୍ଷତିପୂରଣ ଯୋଗାଇ ଦେବାକୁ ସାଧାରଣରେ ଦାବି ହୋଇଛି।