ସରଣ୍ଡା,୧୩ା୪(ଡି.ଏନ.ଏ.): ଓଡ଼ିଶାର ଭାତହାଣ୍ଡି କୁହାଯାଉଥିବା ବରଗଡ ଜିଲା ଅତାବିରା ବ୍ଲକ ଅଞ୍ଚଳରେ ଚାଷୀ ଚଳିତ ବର୍ଷ ରବିଧାନ କ୍ଷେତରେ ଅଜଣା ରୋଗପୋକର ସାମ୍ନା କରିଛନ୍ତି। ବହୁକଷ୍ଟରେ ଫସଲ ଉଠିଆ କରିଥିବା ବେଳେ ଧାନ କେଣ୍ଡା ବାହାରିବା ସମୟରେ ଅଜଣା ପୋକ ଲାଗିଛି। ପୋକ ପ୍ରାଦୃଭାବରେ ଶହ ଶହ ଏକର ଫସଲ ନଷ୍ଟ ହେବା ଆଶଙ୍କା କରିଛନ୍ତି ଚାଷୀ। ଅତାବିରା ବ୍ଲକ କୁଲୁଣ୍ଡା, ଟାମ୍ପରସରା, କାଦୋବାହାଲ, ବନହର ପଞ୍ଚାୟତର ବିଭିନ୍ନ ଗ୍ରାମର ୫୦ରୁ ଅଧିକ ଚାଷୀଙ୍କ ଶତାଧିକ ଏକର ଜମିରେ ରୋଗ ଲାଗିଛି। ଦିନକୁ ଦିନ ଏହି ରୋଗ ବ୍ୟାପିବାରେ ଲାଗିଛି l ଉପଯୁକ୍ତଭାବେ ସାର, କୀଟନାଶକ ଆଦି ପ୍ରୟୋଗ କରାଯାଇଥିଲେ ସୁଦ୍ଧା ଧାନ ବାହାରିବା ସମୟରେ ସମସ୍ତ କେଣ୍ଡା ଶୁଖିଯାଉଛି। କ୍ଷତିପୂରଣ ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି ଚାଷୀ। ବୁଧବାର ଓଡିଶା ରାଜ୍ୟ କୃଷକ ଅତାବିରା ସଭାପତି ବୀରେନ୍ଦ୍ର କରଙ୍କ ନେତୃତ୍ୱରେ ବହୁ ଚାଷୀ ଅତାବିରା ତହସିଲଦାର ଶ୍ୱେତପଦ୍ମା ଯୋଶୀ ଓ ବ୍ଲକ କୃଷି ଅଧିକାରୀ ଲକ୍ଷ୍ମୀ ପ୍ରସାଦ ପଟେଲଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏ ନେଇ ସେମାନେ ଉଭୟ ଅଧିକାରୀଙ୍କୁ ଏକ ଦାବିପତ୍ର ପ୍ରଦାନ ସହ ଆଲୋଚନା କରିଛନ୍ତି l
