ମେଲବର୍ନ,୫।୧୧: ଭାରତର ପୂର୍ବତନ ଅଣ୍ଡର-୧୯ ବିଜେତା ଅଧିନାୟକ ଉନ୍ମୁକ୍ତ ଚାନ୍ଦ ଅଷ୍ଟ୍ରେଲିଆର ବିଗ୍ ବ୍ୟାଶ୍ ଲିଗ୍(ବିବିଏଲ୍)ରେ ଖେଳିବେ। ପ୍ରଥମ ଭାରତୀୟ ଭାବେ ସେ ଏହି ଲିଗ୍ରେ ଖେଳିବାକୁ ଯାଉଛନ୍ତି। ୨୦୨୧-୨୨ ସଂସ୍କରଣ ପାଇଁ ଉନ୍ମୁକ୍ତ ମେଲବର୍ନ ରେନେଗେଡ୍ସ ସହ ଚୁକ୍ତି କରିଛନ୍ତି। ତେବେ ୨୮ ବର୍ଷୀୟ ଏହି କ୍ରିକେଟର ଚଳିତ ବର୍ଷ ଭାରତ ଛାଡ଼ି ଆମେରିକାରେ କ୍ରିକେଟ ଖେଳିବାକୁ ନିଷ୍ପତ୍ତି ନେଇଥିଲେ।
ଉନ୍ମୁକ୍ତ ଭାରତ-ଏ’ର ଅଧିନାୟକ ଥିଲେ ହେଁ କେବେ ବି ଭାରତର ଅନ୍ତର୍ଜାତୀୟ ଟିମ୍ ପକ୍ଷରୁ ଖେଳିନାହାନ୍ତି। କିନ୍ତୁ ସେ ଆଇପିଏଲରେ ଦିଲ୍ଲୀ ଡେୟାରଡେଭିଲ୍ସ, ମୁମ୍ବାଇ ଇଣ୍ଡିଆନ୍ସ ଏବଂ ରାଜସ୍ଥାନ ରୟାଲ୍ସ ଦଳର ସଦସ୍ୟ ରହିଆସିଛନ୍ତି। ଏବେ ନିଜର ନୂଆ ଯାତ୍ରାକୁ ନେଇ ସେ କହିଛନ୍ତି, ବିବିଏଲ୍ରେ ଖେଳିବା ନେଇ ମୁଁ ଉତ୍ସାହିତ। ମେଲବର୍ନ ଟିମ୍ର ସଦସ୍ୟ ହେବା ମୋ ପାଇଁ ବଡ଼ କଥା। କ୍ରିକେଟରଙ୍କ ପାଇଁ ଏହା ବଡ଼ ପ୍ଲାଟଫର୍ମ। ଅଷ୍ଟ୍ରେଲିଆରେ ଖେଳିବା ନିଶ୍ଚିତ ଭାବେ ଚ୍ୟାଲେଞ୍ଜିଂ ହେବ। ହେଲେ ମେଲବର୍ନ ବହୁ ସଂଖ୍ୟାରେ ଭାରତୀୟ ଥିବା ମୁଁ ଶୁଣିବାକୁ ପାଇଛି। ସେମାନଙ୍କ ଉପସ୍ଥିତିରେ ଖେଳିବାର ଅନୁଭୂତି ନିଆରା ହେବ ବୋଲି ସେ କହିଛନ୍ତି।