ସମ୍ବଲପୁର,୧୯ା୨(ବ୍ୟୁରୋ): ସମ୍ବଲପୁର ଜିଲାର ମାନେଶ୍ୱର ଓ ନାକଟିଦେଉଳ ବ୍ଲକରେ ଶୁକ୍ରବାର ଦ୍ୱିତୀୟ ପର୍ଯ୍ୟାୟ ଭୋଟ୍ ଶେଷ ହୋଇଛି। ମାନେଶ୍ୱର ବ୍ଲକ ସାହସପୁର ଭୋଟ କେନ୍ଦ୍ରରେ ଅବ୍ୟବସ୍ଥା ନେଇ ଉତ୍ତେଜନା ପ୍ରକାଶ ପାଇଥିଲା। ଅପରାହ୍ନ ୧ଟା ପରେ ଶତାଧିକ ଭୋଟର କେନ୍ଦ୍ର ଭିତରକୁ ଯିବାକୁ ଚେଷ୍ଟା କରିଥିଲେ। ଏହି ସମୟରେ ପୋଲିସ ସହ ଧସ୍ତାଧସ୍ତି ହୋଇଥିଲା। ପୋଲିସ ବଳପୂର୍ବକ ସେମାନଙ୍କୁ ଭୋଟ କେନ୍ଦ୍ର ସମ୍ମୁଖରୁ ହଟାଇଥିଲା। ଅତିରିକ୍ତ ଏସ୍ପି ତପନ କୁମାର ମହାନ୍ତି ଓ ଅନ୍ୟ ପୋଲିସ ଅଧିକାରୀ ପହଞ୍ଚତ୍ଥିଲେ ମଧ୍ୟ ଭୋଟରମାନେ ସେମାନଙ୍କ ଆଗରେ ଅସନ୍ତୋଷ ଜାହିର କରିଥିଲେ। ପରେ ମହାନଗର ନିଗମ କମିଶନର ପ୍ରଦୀପ କୁମାର ସାହୁ ପହଞ୍ଚତ୍ ସେମାନଙ୍କ ସହ ଆଲୋଚନା କରିଥିଲେ।
ଭୋଟରମାନେ ଅଭିଯୋଗ କରିଥିଲେ, ସକାଳୁ ଆସିଥିଲେ ମଧ୍ୟ ଭୋଟ୍ କେନ୍ଦ୍ର ଭିତରେ ଜାଗା ନ ଥିବାରୁ ବାହାରେ ଛିଡା ହୋଇ ହଇରାଣ ହେବାକୁ ପଡିଛି। ଗୋଟିଏ ବୁଥ୍ରେ ପ୍ରାୟ ୭୪୬ ଭୋଟର ଥିବାରୁ ମତଦାନରେ ବିଳମ୍ବ ହୋଇଥିଲା। ପୁଣି ବୃଦ୍ଧ, ଦିବ୍ୟାଙ୍ଗମାନଙ୍କ ପାଇଁ କୌଣସି ସୁବିଧା କରାଯାଇ ନ ଥିଲା। ସେମାନଙ୍କୁ ବାହାରେ ଧାଡିରେ ଛିଡା ହେବାକୁ ପଡିଥିଲା। ଏପରିସ୍ଥଳେ ଅପରାହ୍ନ ୧ଟାରେ ଗେଟ୍ ବନ୍ଦ କରି ଭିରତକୁ ଯିବାକୁ ଦେଇ ନ ଥିଲେ ବୋଲି ଅଭିଯୋଗ କରିଥିଲେ। ଏହାକୁ ନେଇ ଉତ୍ତେଜନା ପ୍ରକାଶ ପାଇଥିଲା। ପରବର୍ତ୍ତୀ ସମୟରେ ଭିତରେ ଯେଉଁମାନେ ଅଛନ୍ତି ସେମାନେ ଭୋଟ ଦେଇପାରିବେ ବୋଲି କୁହାଯିବା ପରେ ପରିସ୍ଥିତି ଶାନ୍ତ ପଡିଥିଲା। ଅନ୍ୟପଟେ ଦୁର୍ବୃତ୍ତମାନେ ଜାଣିଶୁଣି ସମୟସୀମା ଅତିକ୍ରମ ପରେ ଭିତରକୁ ପ୍ରବେଶ କରିବାକୁ ଯୋଜନା କରୁଥିଲେ। ତେଣୁ ବୁଥ୍ କ୍ୟାପଚରିଂ କିମ୍ବା ଭିତରେ ଜୋର ଜବରଦସ୍ତି ଭୋଟ ଦେବାକୁ ଯୋଜନା କରୁଥିଲେ ବୋଲି ଆଲୋଚନା ହେଉଛି। ଏ ସମ୍ପର୍କରେ ଅତିରିକ୍ତ ଏସ୍ପି ମହାନ୍ତି କହିଛନ୍ତି, ବଳପୂର୍ବକ କେତେଜଣ ଯୁବକ ଭୋଟ କେନ୍ଦ୍ର ଭିତରକୁ ପ୍ରବେଶ କରୁଥିଲେ। ସମୟ ଶେଷ ହେବା ପରେ ସେମାନେ କେନ୍ଦ୍ର ଭିତରକୁ ଆସି ଗଣ୍ଡଗୋଳ କରିବାକୁ ପ୍ରାୟାସ କରୁଥିଲେ। ତେଣୁ ଗେଟ ବାହାରୁ ସେମାନଙ୍କୁ ପ୍ରବେଶ କରିଦିଆଗଲା ନାହିଁ । କେଉଁ କାରଣରୁ ସେମାନେ ଏଭଳି କଲେ ତାହା ତଦନ୍ତ କରାଯାଉଛି। ଆଇନ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।