ଆନନ୍ଦପୁର,୫।୫(ସ୍ବ.ପ୍ର.):କେନ୍ଦୁଝର ଜିଲା ଆନନ୍ଦପୁରର ଲାଇଫଲାଇନ୍ କୁହାଯାଉଥିବା ବୈତରଣୀ ସେତୁ ଅସୁରକ୍ଷିତ ହୋଇପଡ଼ିଛି। ୨୦ ନଂ. ଜାତୀୟ ରାଜପଥ ଓ ୫୩ ନଂ. ରାଜ୍ୟ ରାଜପଥକୁ ଯୋଗାଯୋଗ କରିବାର ମାଧ୍ୟମ ପାଲଟିଥିବା ଏହି ସେତୁ ସ୍ଥାନୀୟ ବାସିନ୍ଦାଙ୍କଠାରୁ ଆରମ୍ଭ କରି ଯାନବାହନ ଗମନାଗମନ କ୍ଷେତ୍ରରେ ଗୁରୁତ୍ୱପୂର୍ଣ୍ଣ। ମାତ୍ର ଭାରିଯାନ ଚଳାଚଳ ଓ ରକ୍ଷଣାବେକ୍ଷଣ ଅଭାବରୁ ସେତୁର ବେରିଂ ଖସି ବିପଦପୂର୍ଣ୍ଣ ହୋଇପଡ଼ିଛି। ପ୍ରଶାସନ ପକ୍ଷରୁ ଏହାର ମରାମତି କରାଯାଉଥିଲେ ମଧ୍ୟ ସ୍ଥିତି ସୁଧୁରୁ ନ ଥିବାରୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି।
୧୯୮୫ ମସିହାରେ ଉକ୍ତ ସେତୁ ଲୋକାର୍ପିତ ହୋଇଥିଲା। ଏହା ପୁରୁଣା ହୋଇଯାଇଥିବା ବେଳେ ମରାମତି ଅଭାବ ଓ ଭାରିଯାନ ଚଳାଚଳ ଯୋଗୁ ୨୦୧୯ ଜୁଲାଇରେ ସେତୁର ବେରିଂ ଖସିଯାଇଥିଲା। ଅଭିଯୋଗ ପରେ ପ୍ରଶାସନ ପକ୍ଷରୁ ତିନୋଟି ପର୍ଯ୍ୟାୟରେ ମରାମତି ପାଇଁ କୋଟିଏରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇଛି। ତଥାପି ସେତୁ ବିପଦମୁକ୍ତ ହୋଇପାରିନି। ମାତ୍ରାଧିକ ଭାରିଯାନ ଚଳାଚଳ ଯୋଗୁ ସେତୁ ଦିନକୁ ଦିନ ଦୁର୍ବଳ ହେଉଛି। ଏ ନେଇ ପ୍ରଶାସନିକ କଟକଣା ସତ୍ତ୍ୱେ ଏହା ଉପରେ ଭାରିଯାନ ଚଳାଚଳରେ ରୋକ ଲାଗିପାରୁନି। ଏପରିକି ୨୦ ନଂ. ଜାତୀୟ ରାଜପଥ ଦେଇ ଆସୁଥିବା ଲୁହାପଥର ବୋଝେଇ ଭାରିଯାନ ପରମିଟ୍ ନ ଥାଇ ସେତୁ ଉପର ଦେଇ ୫୩ ନଂ. ରାଜ୍ୟ ରାଜପଥରେ ଯାତାୟାତ କରୁଛି। ପ୍ରବେଶ ପଥରେ ସୁରକ୍ଷା ବାଡ଼ା ନ ଥିବାରୁ ଯାତ୍ରୀ ଅସୁରକ୍ଷିତ ଭାବେ ଯାତାୟାତ କରୁଛନ୍ତି। ସ୍ପାନ୍ ସଂଯୋଗ ସ୍ଥାନରେ ଲୁହା ପ୍ଲେଟ୍ ଉଠି ଯାତ୍ରୀଙ୍କ ପାଇଁ ବିପଦ ସୃଷ୍ଟି କରୁଛି। ଏହା ସହିତ ସେତୁର ନିର୍ଦ୍ଦିଷ୍ଟ ସ୍ଥାନରେ ବାଡ଼ା ଭାଙ୍ଗି ଯିବା ସହ ଆଲୋକୀକରଣର ବ୍ୟବସ୍ଥା ନ ଥିବାରୁ ରାତ୍ରୀକାଳରେ ବିପଦକୁ ଡାକୁଛି। ନିକଟରେ ବ୍ୟାରେଜ ଡିଭିଜନ ପକ୍ଷରୁ ପ୍ରଦତ୍ତ ସୂଚନା ଅନୁଯାୟୀ, ସୁରକ୍ଷାକୁ ଦୃଷ୍ଟିରେ ରଖି ଉପଖଣ୍ଡ ମାଜିଷ୍ଟ୍ରେଟ୍ ବ୍ୟାରେଜ ଉପରେ ଭାରିଯାନ ଚଳାଚଳ ଉପରେ ୧୪୪ ଧାରା ଜାରି କରିଥିଲେ। ମାତ୍ର ରାତିରେ ବେଧଡ଼କ ଭାବେ ଭାରିଯାନ ଚଳପ୍ରଚଳ ଚିନ୍ତାଜନକ ବିଷୟ ପାଲଟିଛି। ସ୍ଥାନୀୟ ବିଭାଗୀୟ କର୍ତ୍ତୃପକ୍ଷ ଓ ପ୍ରଶାସନିକ କ୍ଷେତ୍ରରେ ଏଥିପ୍ରତି ଦୃଷ୍ଟି ଦିଆଯାଇ ଆବଶ୍ୟକ ପଦକ୍ଷେପ ଗ୍ରହଣ କରିିବାକୁ ଆଇନଜୀବୀ ଭାଗୀରଥି ଦାସ, ପ୍ରେସ୍ କ୍ଲବ୍ ସଭାପତି ନାରାୟଣ ସାହୁ, ସାମାଜିକ କର୍ମୀ ଜ୍ୟୋତିରଞ୍ଜନ ଜେନାଙ୍କ ସମେତ ସ୍ଥାନୀୟବାସିନ୍ଦା ଦାବି କରିଛନ୍ତି।