ନୂଆଦିଲ୍ଲୀ,୨୯ ।୧୦: ସଂଯୁକ୍ତ ରାଷ୍ଟ୍ର ସୁରକ୍ଷା ପରିଷଦର ଆତଙ୍କବାଦ ନିରୋଧକ ସମିତିର ବିଶେଷ ବୈଠକର ଶନିବାର ହେଉଛି ଦ୍ୱିତୀୟ ଦିବସ । ଦ୍ୱିତୀୟ ଦିନର ବୈଠକ ଶନିବାର ଦିଲ୍ଲୀରେ ଅନୁଷ୍ଠିତ ହେବାକୁ ଯାଉଛି । ଏହି ବୈଠକରେ ୩ ବିନ୍ଦୁ ଉପରେ ଆଧାରିତ ଏଜେଣ୍ଡା ଉପରେ ଚର୍ଚ୍ଚା କରାଯିବ । ଯେଉଁଥିରେ ଆତଙ୍କବାଦୀ ଆକ୍ରମଣରେ ଇଣ୍ଟରନେଟ ଓ ସୋସିଆଲ ମିଡିଆର ବ୍ୟବହାର, ପାଣ୍ଠି ସଂଗ୍ରହ ପାଇଁ ନୂତନ ପେମେଣ୍ଟ ଟେକ୍ନୋଲୋଜିର ବ୍ୟବହାର ଏବଂ ଡ୍ରୋନ୍ ଭଳି ମାନବ ବିହୀନ ବିମାନ ଉପକରଣ ସହିତ କାରବାର ଉପରେ ଆଲୋଚନା ଅନ୍ତର୍ଭୁକ୍ତ କରାଯିବ । ସୂଚନାଯୋଗ୍ୟ, ଏହାର ପ୍ରଥମ ଦିନର ବୈଠକ ମୁମ୍ବାଇରେ ୨୮ ଅକ୍ଟୋବର ଶୁକ୍ରବାର ଆୟୋଜିତ ହୋଇଯାଇଛି ।
ସଂଯୁକ୍ତ ରାଷ୍ଟ୍ର ସୁରକ୍ଷା ପରିଷଦର ଏହି ବୈଠକ ସକାଳ ୯ଟା ୩୦ରୁ ସନ୍ଧ୍ୟା ୬ଟା ୩୦ ପର୍ଯ୍ୟନ୍ତ ନୂଆ ଦିଲ୍ଲୀର ତାଜ ପ୍ୟାଲେସରେ ହେବ । ବୈଠକ ପରେ ପ୍ରେସ କନଫରେନ୍ସ ହେବ । ଶୁକ୍ରବାର ତାଜ ହୋଟେଲରେ ଏହି ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ସଂଯୁକ୍ତ ରାଷ୍ଟ୍ର ସୁରକ୍ଷା ପରିଷଦର ସମସ୍ତ ୧୫ ସଦସ୍ୟ ଦେଶର ରାଷ୍ଟ୍ରଦୂତ ଆତଙ୍କବାଦୀ ଆକ୍ରମଣରେ ମୃତ୍ୟୁ ହୋଇଥିବା ଲୋକଙ୍କ ସ୍ମାରକରେ ଶ୍ରଦ୍ଦାଞ୍ଜଳି ଦେଇଥିଲେ । ଶନିବାରର ବୈଠକରେ ଚାଇନା ବି ଭାଗ ନେବ ।
