ଗଞ୍ଜାମ,୨୨।୩(ବିଦ୍ୟାଧର ସାହୁ): ତିନିଦିନ ଧରି ଲଗାଣ ବର୍ଷା ହେବ ବୋଲି ପାଣିପାଗ ବିଭାଗ ଯେଉଁ ପୂର୍ବାନୁମାନ କରିଥିଲା ତାହା ସତ ହୋଇଛି। ଶନିବାର ପୂର୍ବାହ୍ନରୁ ଗଞ୍ଜାମ ବ୍ଲକ ଅଞ୍ଚଳରେ ପବନ ସାଙ୍ଗକୁ ବିଜୁଳି ଘଡଘଡି ଓ ପ୍ରବଳ ବର୍ଷା ହେଉଛି। ଏହି ଅଦିନିଆ ବର୍ଷା ଯୋଗୁ ଖଣ୍ଡଦେଉଳୀ ପଞ୍ଚୁଦୋଳ ଯାତ୍ରା ପ୍ରଭାବିତ ହୋଇଥିବା ଜଣାପଡିଛି । ପଞ୍ଚୁଦୋଳ ଯାତ୍ରା ପଡିଆରେ ଆଖପାଖ ଅଞ୍ଚଳର ଷୋହଳ ଠାକୁର ନିଜ ନିଜ ପିଣ୍ଡିରେ ବିରାଜମାନ ଥିବା ବେଳେ ପ୍ରବଳ ବର୍ଷା ଯୋଗୁ ଯାତ୍ରାକୁ ଆସିଥିବା ବେପାରୀମାନେ ନାହିଁ ନ ଥିବା ଅସୁବିଧାର ସମୁଖୀନ ହୋଇଛନ୍ତି। ଦୁଇଟି ରାମାୟଣ ନାଟକର ପରିସମାପ୍ତି ପରେ ବର୍ତ୍ତମାନ ଠାକୁରଙ୍କ ସମ୍ମୁଖରେ ହେଉଥିବା ମହାଭାରତ ନାଟକ ବର୍ଷା ଯୋଗୁ ପ୍ରଭାବିତ ଥିବା ଦେଖିବାକୁ ମିଳିଛି। ବିଳମ୍ବିତ ରାତିରେ ଅପେରା ମଞ୍ଚସ୍ତ ହେବ । ଏଥିସହ ଏହି ଅଦିନିଆ ବର୍ଷା ଯଦି ତିନିଦିନ ଲାଗିରହେ ତାହେଲେ ମୁଗ ବିରି ଫସଲ ମଧ୍ୟ ପ୍ରଭାବିତ ହେବା ଆଶଙ୍କା ରହିଛି ବୋଲି ଚାଷୀ କହିଛନ୍ତି।
