ଜଳେଶ୍ୱର,୧୨ା୫(ଡି.ଏନ.ଏ.): ଏନ୍ଜିଟି ପକ୍ଷରୁ ବିଭିନ୍ନ ଆଇନଗତ ସମସ୍ୟା ଦ୍ୱାରା ଚୋରାବାଲି ଚାଲାଣରେ ରୋକ ଲଗାଇବାକୁ ଚେଷ୍ଟା କରାଯାଉଥିଲେ ମଧ୍ୟ ତାହା ବନ୍ଦ କରାଯାଇପାରୁନାହିଁ। ଫଳରେ ପ୍ରତିଦିନ ସୁବର୍ଣ୍ଣରେଖା ନଦୀର ବାଲି ଚୋରାରେ ବିଭିନ୍ନ ସ୍ଥାନକୁ ଚାଲାଣ ହେଉଛି। ଜଳେଶ୍ୱର ତହସିଲଦାର ମିହିର ରଞ୍ଜନ ବେହେରା ସୁଗୋଠାରେ ହଠାତ୍ ଚଢାଉ କରି ୫ଟି ଡମ୍ପର ଓ ୨ ଟ୍ରାକ୍ଟର ଜବତ କରିବା ସହ ପ୍ରାୟ ୨ଲକ୍ଷ ଟଙ୍କାର ଜରିମାନା ଆଦାୟ କରିଛନ୍ତି।
୯୦ଦଶକରୁ ସୁବର୍ଣ୍ଣରେଖା ବାଲିକୁ ସ୍ବମ୍ପପମ୍ପ, ଜେସିବି ଦ୍ୱାରା ଉତ୍ତୋଳନ କରି ବାଲି ମାଫିଆମାନେ କୋଟି କୋଟି ଟଙ୍କା ଆଦାୟ କରୁଥିବାରୁ କେତେକ ବ୍ୟକ୍ତି ଏନ୍ଜିଟିର ଦ୍ୱାରସ୍ଥ ହୋଇଥିଲେ। ଏ ସମ୍ପର୍କରେ ଏନ୍ଜିଟି ଓଡିଶା ଓ ପଶ୍ଚିମବଙ୍ଗ ସରକାର ବିଶେଷ କରି ବାଲେଶ୍ୱର ଓ ମେଦିନୀପୁର ଜିଲା ପ୍ରଶାସନକୁ ବାରମ୍ବାର ତାଗିଦ୍ କରି ଆସିଥିଲେ। ପୁଣି ରାଜସ୍ବ ବିଭାଗ ବାଲି ନିୟନ୍ତ୍ରଣ ହରାଇଥିବା ବେଳେ ଏଣିକି ମାଇନିଂ (ଖଣି)ବିଭାଗ ତଦାରଖ କରିବା ଆରମ୍ଭ ହୋଇଛି। ବାଲି ମାଫିଆମାନେ ବିଭିନ୍ନ ତଥ୍ୟ ହାସଲ କରି ପ୍ରଶାସନକୁ ଚକମାଦେଇ ବାଲି ଚୋରାଚାଲାଣ କରି ଆସୁଛନ୍ତି। ତହସିଲଦାର କୌଣସି ବାଲି ଖାଦାନ ଚଢାଉ ଲାଗି ତହସିଲରୁ ବାହାରିଲା ବେଳକୁ ଚୋରା ବାଲି ମାଫିଆମାନେ ସଜାଗ ହୋଇଯାଉଛନ୍ତି। ଜଳେଶ୍ୱର ତହସିଲଦାର ବେହେରା ଚଢାଉ ଜାରି ରଖିଛନ୍ତି। ଚଢାଉରେ ଅତିରିକ୍ତ ତହସିଲଦାର ଅମ୍ଳାନ ନାୟକ, ସାଗର ବାସ୍କେ, ଦେବଞ୍ଜନ ମହାନ୍ତି, ସୃଷ୍ଟିଧର ପଟ୍ଟାୟତ ଓ ରାଜସ୍ବ ନିରୀକ୍ଷକ ଶରତ ବେହେରା ପ୍ରମୁଖ ସାମିଲ ଥିଲେ। ଅତିଶୀଘ୍ର ସୁବର୍ଣ୍ଣରେଖା ନଦୀର ବିଭିନ୍ନ ସଇରାତକୁ ଆଇନଗତ ଭାବେ ନିଲାମ ଦିଆଯାଇପାାରିଲେ ବାଲି ଚୋରାଚାଲାଣକୁ ରୋକ ଲଗାଯାଇପାରିବ ବୋଲି ସାଧାରଣରେ ଆଲୋଚନା ହେଉଛି।