ଥରେ ଚିନ୍ତା କଲେ ଦୁଇ ହାତର ଓଜନ ଯଦି ୫ କେଜିରୁ ଅଧିକ ତେବେ ଦୈନନ୍ଦିନ କାମ କେମିତି କରିବେ? କିନ୍ତୁ ଏମିତି ଦେଖିବାକୁ ମିଳିଛି ୧୨ ବର୍ଷୀୟ କଲିମଙ୍କଠାରେ। ତାଙ୍କ ଦୁଇ ହାତ ଓଜନ ୫ କେଜି। ସେ ସେଥିରେ କଷ୍ଟେମଷ୍ଟେ କାମ କରୁଛନ୍ତି।
ଝାଡ଼ଖଣ୍ଡର ବୋକାରେ ସହରରେ ରହୁଥିବା ମହମ୍ମଦ କଲିମଙ୍କ ହାତ ପିଲାଦିନରୁ ଅଲଗା ଥିଲା। ପରିବାର ଲୋକେ ଏ ବିଷୟରେ କିଛି ଜାଣି ପାରୁ ନ ଥିଲେ। ପରେ ଚିକିତ୍ସା ପାଇଁ ଚେଷ୍ଟା କରିଥିଲେ। ମାତ୍ର କିଛି ଫରକ ପଡ଼ିଲା ନାହିଁ। କଲିମଙ୍କ ପିତା ମହମ୍ମଦ ଶମିମ ପେଣ୍ଟିଂ କାମ କରନ୍ତି। ମା’ ଗୃହିଣୀ ଅଟନ୍ତି। କଲିମଙ୍କର ଏକ ଭଉଣୀ ଏବଂ ଛୋଟ ଭାଇ ଅଛନ୍ତି।
କଲିମଙ୍କ ହାତରେ ଅସୁବିଧା ହେଉଥିବାରୁ ସେ ଠିକ୍ରେ ଫୋନ୍ ଚଲାଇ ପାରନ୍ତି ନାହିଁ। କଲିମ ତାଙ୍କ କକାଙ୍କ ଇନ୍ଷ୍ଟାଗ୍ରାମରେ ଏକ ଭିଡିଓ ପୋଷ୍ଟ କରିଛନ୍ତି। ଏହି ଭିଡିଓ ଦେଖିବା ପରେ ଲୋକେ ନାନା କମେଣ୍ଟ ଦେଉଛନ୍ତି। କିଛି ଲୋକଙ୍କ କଲିମଙ୍କୁ ଚିଡ଼ାଉଛନ୍ତି। ଆଉ କେହି କେହି ସୈତାନ ବୋଲି କହିଛନ୍ତି।
କଲିମ କୁହନ୍ତି, ଆଗରୁ ତାଙ୍କୁ ଏହିସବୁ କଥା ଖରାପ ଲାଗୁଥିଲା। ଏବେ ଦେହସୁହା ହୋଇଗଲାଣି। ପିଲାମାନେ ବି ତାଙ୍କ ସହ ଧିରେ ଧିରେ ମିଶିଲେଣି। ସେ କୁହନ୍ତି, ମୁଁ ଡ୍ରେସ୍ ପିନ୍ଧିପାରେ। ବାକି କାମ ମା’ କରନ୍ତି। ତାଙ୍କ ହାତର ଚିକିତ୍ସା ପାଇଁ ଅନେକ ଅର୍ଥ ଖର୍ଚ୍ଚ ହୋଇଥିଲେ ମଧ୍ୟ କୌଣସି ସୁଧାର ଆସିନାହିଁ। ଭବିଷ୍ୟତକୁ ନେଇ କଲିମ୍ କୁହନ୍ତି, ମୁଁ ଅଷ୍ଟମ ପର୍ଯ୍ୟନ୍ତ ପଢ଼ିଛି। ଆଉ ଅଧିକ ପଢ଼ିନାହିଁ। ଏବେ ସୋସିଆଲ ମିଡିଆରେ କିଛି କରିବାକୁ ଚାହୁଁଛି। ଯାହାଦ୍ୱାରା ଲୋକଙ୍କ ମନୋରଞ୍ଜନ କରିପାରିବି।