ଲକ୍ଷ୍ନୌ,୮।୩: ଯୋଗୀ ସରକାରରେ କ୍ୟାବିନେଟ ମନ୍ତ୍ରୀ ଥିବା ସ୍ବତନ୍ତ୍ର ଦେବ ସିଂହଙ୍କ ମା’ଙ୍କ ପରଲୋକ ଘଟିଛି। ୯୯ବର୍ଷ ବୟସରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ସେ ଦୀର୍ଘ ସମୟ ଧରି ଅସୁସ୍ଥ ହୋଇପଡିଥିଲେ। ମା’ଙ୍କ ମୃତ୍ୟୁ ଖବର ଶୁଣିବା ମାତ୍ରେ ସ୍ବତନ୍ତ୍ର ଦେବ ସମସ୍ତ କାର୍ଯ୍ୟକ୍ରମକୁ ବାତିଲ କରିଦେଇଛନ୍ତି। ସ୍ବତନ୍ତ୍ର ଦେବ ବାରାଣସୀ ବିମାନବନ୍ଦରରୁ ମିର୍ଜାପୁରସ୍ଥିତ ତାଙ୍କ ପୈତୃକ ବାସଭବନକୁ ଯାଇଥିଲେ। ସେଠାରେ ମା’ଙ୍କ ଶେଷ ଦର୍ଶନ କରିବା ପରେ ଶେଷକୃତ୍ୟ ପାଇଁ ନିଜ କାନ୍ଧରେ ବୋହି ସ୍ବତନ୍ତ୍ର ଦେବ ମଣିକର୍ଣ୍ଣିକା ଘାଟ ବାରାଣସୀରେ ପହଞ୍ଚିଥିଲେ। ସେଠାରେ ମା’ଙ୍କ ରୀତିନୀତିରେ ଶେଷକୃତ୍ୟ ସମ୍ପନ୍ନ କରାଯିବ। ଅନ୍ୟପଟେ ସ୍ବତନ୍ତ୍ର ଦେବଙ୍କ ମା’ଙ୍କ ବିୟୋଗରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଶୋକ ପ୍ରକାଶ କରିଛନ୍ତି। ଯୋଗୀ ଆଦିତ୍ୟନାଥ ଟୁଇଟ ଏବଂ ଫୋନ୍ କରି ତାଙ୍କ ମା’ଙ୍କ ମୃତ୍ୟୁକୁ ନେଇ ଗଭୀର ସମବେଦନା ଜଣାଇଛନ୍ତି। ଅନ୍ୟପଟେ ସମସ୍ତ ଭାଜପା ନେତା ମଧ୍ୟ ଶୋକ ବ୍ୟକ୍ତ କରିବା ସହ ଶେଷ ଦର୍ଶନ ପାଇଁ ତାଙ୍କ ବାସଭବନରେ ପହଞ୍ଚିଥିଲେ। ସେହିପରି ଉତ୍ତରପ୍ରଦେଶର ଉଭୟ ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଏବଂ ବ୍ରଜେଶ ପାଠକଙ୍କ ସମେତ ସମସ୍ତ ଭାଜପା ନେତା ତାଙ୍କ ମା’ଙ୍କ ମୃତ୍ୟୁକୁ ନେଇ ସମବେଦନା ଜଣାଇଛନ୍ତି।
