ଲକ୍ଷ୍ନୌ,୨୦।୪: ଉତ୍ତର ପ୍ରଦେଶ ରାଏବରେଲିରେ ଏକ ଅମାନବୀୟ କାଣ୍ଡ ଘଟିଯାଇଛି । କେତେଜଣ ଯୁବକ ଜଣେ ଦଳିତ ନାବାଳକଙ୍କୁ ନିର୍ଯାତନା ଦେଉଥିବାର ଭିଡିଓ ସାମ୍ନାକୁ ଆସିଛି। ନାବାଳକ ଜଣଙ୍କ ଜଣେ ଯୁବକଙ୍କ ପାଦ ଚାଟୁଥିବା ଭାଇରାଲ ହୋଇଥିବା ଭିଡିଓରେ ଦେଖାଯାଇଛି। ଏଥିରେ ସମ୍ପୃକ୍ତ ଥିବା ୮ ଜଣଙ୍କୁ ପୋଲିସ ଗିରଫ କରିଛି। ଘଟଣାଟି ଗତ ୧୦ ତାରିଖର ହୋଇଥିବାବେଳେ ପୀଡ଼ିତ ନାବାଳକଙ୍କ ଲିଖିତ ଅଭିଯୋଗକ୍ରମେ ପୋଲିସ ସେମାନଙ୍କୁ ଗିରଫ କରିଛି। ୟୁପିର ଜଗତପୁର ଟାଉନ୍ରେ ପୀଡ଼ିତଙ୍କ ଘର। ୧୦ ତାରିଖରେ ସେ ତାଙ୍କର କିଛି ବନ୍ଧୁଙ୍କ ସହ ମୋଟରସାଇକେଲରେ ରାମଲିଲା ମଇଦାନକୁ ଆସିଥିଲେ। ସେଠାରୁ ସେମାନେ ସାଲୋନ ରୋଡ୍ ଯାଇଥିବାବେଳେ ଆଉ କେତେଜଣ ଯୁବକ ତାଙ୍କୁ ଏକ ବଗିଚାକୁ ନେଇଯାଇ ମାଡ଼ ମାରିଥିବା ପୋଲିସ କହିଛି। ନାବାଳକ ଜଣକ ତାଙ୍କ ବିଧବା ମା’ ଓ ଦୁଇ ଭଉଣୀଙ୍କ ସହ ରୁହନ୍ତି। ତେବେ ନାବାଳକଙ୍କୁ ମାଡ଼ ମାରିବା ସହ ତାଙ୍କୁ ପାଦ ଚଟାଇବା ପଛର କାରଣ ଏ ପର୍ଯ୍ୟନ୍ତ ଜଣାପଡ଼ିନାହିଁ। ଅଭିଯୁକ୍ତମାନଙ୍କୁ କଠୋର ଦଣ୍ଡ ଦେବା ସହ ପୀଡ଼ିତଙ୍କୁ ନ୍ୟାୟ ଦିଆଯିବା ନେଇ ପରିବାର ଦାବି କରିଛି।