ଲକ୍ଷ୍ନୌ,୨୩ ।୧୦: ଉତ୍ତର ପ୍ରଦେଶ ବିଧାନସଭା ନିର୍ବାଚନକୁ ଆଖି ଆଗରେ ରଖି କଂଗ୍ରେସ ଶନିବାର ‘ପ୍ରତିଜ୍ଞା ଯାତ୍ରା’ ଆରମ୍ଭ କରିବାକୁ ଯାଉଛି । ଉତ୍ତର ପଦେଶ ଲକ୍ଷ୍ନୌର ବାରବାଙ୍କିରେ ପ୍ରଭାରୀ ପ୍ରିୟଙ୍କା ଗାନ୍ଧୀ ଏହାକୁ ସବୁଜ ସଙ୍କେତ ଦେଇ ଆରମ୍ଭ କରିବାକୁ ଯାଉଛନ୍ତି । ଏହି ସମୟରେ ପ୍ରଦେଶ କଂଗ୍ରେସ ଅଧ୍ୟକ୍ଷ ଅଜୟ କୁମାର ଲଲ୍ଲୁ ଉପସ୍ଥିତ ରହିବେ । ବାରାବାଙ୍କି ବ୍ୟତୀତ ଶନିବାର ସହାରନପୁର ଓ ବାରାଣସୀରେ ବି କଂଗ୍ରେସ ପ୍ରତିଜ୍ଞା ଯାତ୍ରାର ଶୁଭାରମ୍ଭ କରିବ । ଏହାପରେ ପ୍ରିୟଙ୍କା ଗାନ୍ଧୀ ସହାରନପୁର ଓ ବାରାଣସିରେ ଆରମ୍ଭ ହେଉଥିବା ପ୍ରତିଜ୍ଞା ଯାତ୍ରାରେ ବି ସାମିଲ ହେବେ । ୩ଟି ଯାକ ପ୍ରତିଜ୍ଞା ଯାତ୍ରାକୁ ବାରାବାଙ୍କିରୁ ପ୍ରିୟଙ୍କା ସବୁଜ ସଙ୍କେତ ଦେଇ ଆରମ୍ଭ କରିବେ । ଏହା ପୂର୍ବରୁ ପ୍ରିୟଙ୍କା ଶିକ୍ଷା ଓ ଚାକିରି କ୍ଷେତ୍ରରେ ମହିଳାଙ୍କ ପାଇଁ ସ୍ଥାନ ସଂରକ୍ଷଣ, ମହିଳାଙ୍କ ପାଇଁ ମାଗଣା ଶିକ୍ଷା, କୃଷକଙ୍କ ଋଣ ଛାଡ, ବିଜୁଳି ବିଲ ଅଧା କରିବା ଭଳି ଘୋଷଣା କରିପାରନ୍ତି । ଏହା ପୂର୍ବରୁ ପ୍ରିୟଙ୍କା ଘୋଷଣା କରିଛନ୍ତି ୟୁପି ନିର୍ବାଚନରେ କଂଗ୍ରେସ ୪୦ ପ୍ରତିଶତ ଟିକେଟ ମହିଳାଙ୍କୁ ଦେବ । ଏହାସହ ଛାତ୍ରୀଛାତ୍ରଙ୍କୁ ମୋବାଇଲ ଓ ସ୍କୁଟି ଦେବାକୁ ଘୋଷଣା ମଧ୍ୟ କରିଛନ୍ତି ।