ଲଖ୍ମୀପୁର ଖେରି,୧୧।୧: ଉତ୍ତରପ୍ରଦେଶର ଲଖ୍ମୀପୁରଖେରି ଅଞ୍ଚଳରେ ପୋଲିସ ବେଆଇନ ମଦ କାରବାର ଅଭିଯୋଗରେ ରାମଚନ୍ଦ୍ର ନାମକ ଜଣେ ୩୫ ବର୍ଷୀୟ ବ୍ୟକ୍ତିଙ୍କୁ ଗିରଫ କରିଥିଲା। ହାଜତରେ ରାମଚନ୍ଦ୍ରଙ୍କ ମୃତ୍ୟୁ ଘଟିଥିବା ଅଭିଯୋଗ କରି ସମ୍ପୃକ୍ତ ପୋଲିସ କର୍ମଚାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେଇ ପରିବାର ଲୋକେ ଦାବି କରିଛନ୍ତି।
ତେବେ ହାଜତ ମୃତ୍ୟୁ ଅଭିଯୋଗକୁ ପୋଲିସ ଖଣ୍ଡନ କରିଛି। ରାମଚନ୍ଦ୍ର ଗ୍ୟାଙ୍ଗଷ୍ଟର ଆଇନରେ ଅଭିଯୁକ୍ତ ଥିଲେ। ପୋଲିସ ଚଢ଼ାଉ ବେଳେ ସେ ଖସି ପଳାଇବାକୁ ଉଦ୍ୟମ କରୁଥିବାବେଳେ ସଂଜ୍ଞାହୀନ ହୋଇପଡ଼ିଥିଲେ ବୋଲି ପୋଲିସ କହିଛି।
ତେବେ ମୃତକଙ୍କ ପରିବାର ସଦସ୍ୟଙ୍କ ସହ ଲଖ୍ମୀପୁରଖେରି ଡିଏସ୍ପି ପି.ପି. ସିଂ କଥା ହେଉଥିବାର ଏକ ଭିଡିଓ ଅନ୍ଲାଇନରେ ଭାଇରାଲ ହୋଇଛି। ପୋଲିସ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ବୋଲି ସେ କହୁଥିବା ଭିଡିଓରେ ଶୁଣିବାକୁ ମିଳିଛି। ନିଘାସାନ କିମ୍ବା ମାଝଗାଇନ୍ର ଏସ୍ଏଚ୍ଓଙ୍କୁ ସସ୍ପେଣ୍ଡ କରାଯିବ ନାହିଁ କି ତୁମେ ୩୦ ଲକ୍ଷ ଟଙ୍କା କ୍ଷତିପୂରଣ ପାଇବ ନାହିଁ ବୋଲି ଡିଏସ୍ପି କହିଛନ୍ତି। ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଉକ୍ତ ଭିଡିଓକୁ ଶେୟାର କରିବା ସହ ଶାସକ ଭାଜପାକୁ ସମାଲୋଚନା କରିଛନ୍ତି।