କାନପୁର, ୯ା୫ : ଉତ୍ତର ପ୍ରଦେଶ ପଞ୍ଚାୟତ ନିର୍ବାଚନ ଫଳାଫଳ ପ୍ରକାଶ ପାଇବା ପରେ ସମ୍ନାକୁ ଆସିଛି ଏକ କୌତୁହଳପୂର୍ଣ୍ଣ ଘଟଣା। ଜଣେ ପୂର୍ବତନ ସରପଞ୍ଚ ନିର୍ବାଚନରେ ପରାଜିତ ହେବାରୁ ନିଜ ସମୟରେ ନିର୍ମିତ ରାସ୍ତାକୁ ଜେସିବି ଲଗାଇ ପୂରା ନଷ୍ଟ କରି ଦେଇଛନ୍ତି। ଏ ସମ୍ପର୍କରେ ଗ୍ରାମବାସୀ ତହସିଲ ଅଧିକାରୀଙ୍କ ନିକଟରେ ଅଭିଯୋଗ କରିବା ପରେ ଘଟଣାଟି ପଦାକୁ ଆସିଛି।
ବାରବାଙ୍କି ଜିଲାର ସୁବେହା ଥାନା ଅନ୍ତର୍ଗତ ଅହିରାନ ସରିୟାନ ଗ୍ରାମର ପୂର୍ବତନ ମୁଖ୍ୟ ଦୀପକ କୁମାର ତିଓ୍ବାରୀ ନିର୍ବାଚନରେ ସେହି ଗ୍ରାମର ପ୍ରଦୀପଙ୍କ ଠାରୁ ପରାସ୍ତ ହୋଇଥିଲେ।
ଗ୍ରାମବାସୀଙ୍କ ଅନୁଯାୟୀ, ଭୋଟ ନ ପାଇବାରୁ ତିଓ୍ବାରୀ ଏଭଳି କରିଛନ୍ତି। ଏ ଘଟଣା ସଂକ୍ରାନ୍ତରେ ଆମେ ମିଳିତ ଭାବେ ତହସିଲ କାର୍ଯ୍ୟାଳୟରେ ଅଭିଯୋଗ କରିଥିଲୁ। ନିର୍ବାଚନରେ ବ୍ୟସ୍ତ ଥିବା କହି ଏପର୍ଯ୍ୟନ୍ତ ଆମ କଥାକୁ ସେମାନେ ଅଣଦେଖା କରି ଆସୁଛନ୍ତି।
ବୁଧବାର ସକାଳେ ତିଓ୍ବାରୀ ଗ୍ରାମରେ ଜେସିବି ଓ ସମର୍ଥକଙ୍କ ସହ ପହଞ୍ଚିଥିଲେ। ଜେସିବି ଦ୍ୱାରା ନଷ୍ଟ କରିଦେଲେ ହନୁମାନ ମନ୍ଦିର ରୋଡ୍କୁ। ଦେଖଣାହାରୀ ପାଲଟି ଯାଇଥିଲେ ଗ୍ରାମବାସୀ। ମନ୍ଦିରକୁ ଗମନାଗମନ ସୁବିଧା ପାଇଁ ୭ ବର୍ଷ ତଳେ ଏହି ରାସ୍ତାକୁ ନିର୍ମାଣ କରାଯାଇଥିଲା।