ଲକ୍ଷ୍ନୌ,୭ା୧୨: ଜୁଆ ଖେଳିଲେ ସର୍ବସ୍ବାନ୍ତ ହେବା ଥୟ ବୋଲି ମହାଭାରତ ଆମକୁ ଶିଖାଇଛି। ଏଭଳି ଅନେକ ଦୃଷ୍ଟାନ୍ତ ଥାଇ ମଧ୍ୟ ସଚେତନ ନ ହେବାର ମାନେ ହେଉଛି, ବିପତ୍ତିକୁ ଡାକିବା। ଉତ୍ତରପ୍ରଦେଶର ରେଣୁଙ୍କ ପାଖକୁ ଜୟପୁରରେ ଥିବା ତାଙ୍କ ସ୍ବାମୀ ଟଙ୍କା ପଠାଉଥିଲେ। ସେହି ଅର୍ଥକୁ ସେ ଲୁଡ଼ୁ ଖେଳରେ ହରାଇ ଦେବାପରେ ଶେଷରେ ଭଡ଼ା ଘର ମାଲିକଙ୍କ ନିକଟରେ ନିଜକୁ ବାଜି ଲଗାଇଲେ। ଅନ୍ତିମ ଖେଳରେ ପରାଜୟ ରେଣୁଙ୍କୁ ବାଧ୍ୟକଲା ଘର ମାଲିକଙ୍କ ସହ ରହିବାକୁ। ଏହି ଘଟଣାକୁ ନେଇ ସମ୍ପ୍ରତି ୟୁପିରେ ଅନେକ ଚର୍ଚ୍ଚା।
ଉତ୍ତରପ୍ରଦେଶର ଦେଓରିଆ ଜିଲା ଦେବକାଲି ଅଞ୍ଚଳରୁ ଚକିତ କରିଦେବା ଭଳି ଘଟଣା ସାମ୍ନାକୁ ଆସିଛି। ଜୁଆଖେଳରେ ଆସକ୍ତ ରେଣୁଙ୍କ ସ୍ବାମୀ ରାଜସ୍ଥାନର ଜୟପୁରରେ କାମ କରନ୍ତି। ସ୍ବାମୀ ଦୁଇ ପିଲାଙ୍କ ଲାଳନପାଳନ ଏବଂ ଘର ଚଳାଇବା ପାଇଁ ତାଙ୍କ ନିକଟକୁ ନିୟମିତ ଭାବେ ଟଙ୍କା ପଠାନ୍ତି। କିନ୍ତୁ ଏପଟେ ରେଣୁ ସେହି ଅର୍ଥରାଶିକୁ ଘର ମାଲିକଙ୍କ ସହ ଲୁଡ଼ୁ ଖେଳରେ ହରାଇ ଚାଲିଥାନ୍ତି। ଦିନେ ଏମିତି ଖେଳ ଚାଲୁ ଚାଲୁ ଲୋଭୀ ମହିଳା ସବୁ ସମ୍ବଳ ହରାଇ ବସିଲେ। ଅବସ୍ଥା ଏମିତି ହେଲା ଯେ, ତାଙ୍କ ପାଖରେ ଆଉ ଟଙ୍କାଏ ବି ରହିଲାନି। ସେତିକିରେ ସେ ମନକୁ ବୁଝାଇ ଘରକୁ ଫେରିଯାଇଥିଲେ କିଛି ଅସ୍ବାଭାବିକ ପରିସ୍ଥିତି ଘଟି ନ ଥାନ୍ତା। ହେଲେ କିନ୍ତୁ ହରାଇଥିବା ଟଙ୍କା ଫେରିପାଇବା ଆଶାରେ ରେଣୁ ଘର ମାଲିକଙ୍କଠାରେ ଶେଷ ସର୍ତ୍ତ ଲଗାଇଥିଲେ। ମୁଁ ଜିତିଲେ ସବୁ ଟଙ୍କା ଫେରାଇ ନେବି। ତୁମେ ଜିତିଲେ ସବୁଦିନ ପାଇଁ ମୁଁ ତୁମର। ବାଜି ହାରିବା ପରେ ରେଣୁଙ୍କୁ ପର ପୁରୁଷ ସହ ରହିବାକୁ ପଡ଼ିଥିଲା। ଅନୁତପ୍ତ ରେଣୁ ଦିନେ ନିଜ ସ୍ବାମୀଙ୍କୁ ଫୋନ୍ କରି ପୂରା ଘଟଣା ବଖାଣିଥିଲେ। ଏ ସବୁ ଶୁଣିବା ପରେ ସ୍ବାମୀ ଗାଁକୁ ଫେରି ପ୍ରତାପଗଡ଼ ଥାନାରେ ଘର ମାଲିକଙ୍କ ବିରୋଧରେ ଏତଲା ଦେଇଛନ୍ତି। ଏହି ଘଟଣା ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି। ତେବେ ଲୁଡୁକୁ ନେଇ ୟୁପିର ଏ ଘଟଣା ପ୍ରଥମ ନୁହେଁ। ୨୦୨୦ରେ ଭୋପାଳର ୨୪ ବର୍ଷୀୟା ମହିଳା ଫ୍ୟାମିଲି କୋର୍ଟରେ ତାଙ୍କ ବାପାଙ୍କ ବିରୋଧରେ ଅଭିଯୋଗ କରିିଥିଲେ। ତାଙ୍କ ବାପା ଲୁଡୁ ଖେଳରେ ବାରମ୍ବାର ଝିଅଙ୍କୁ ହରାଇବା କାରଣରୁ ସେ ରାଗିଯାଇ କୋର୍ଟର ଦ୍ୱାରସ୍ଥ ହୋଇଥିଲେ।
