ପୁରୀ ଅଫିସ,୨୦।୨: ରାଷ୍ଟ୍ରପତି ଓ ତାଙ୍କ ପରିବାରକୁ କୌଳିକ ପଣ୍ଡା ନାରାୟଣ ଗୋଚ୍ଛିକାର ଶ୍ରୀମନ୍ଦିରରେ ଦର୍ଶନ କରାଇଥିଲେ। ଏହାପରେ ରାଷ୍ଟ୍ରପତି ନାରାୟଣ ଗୋଚ୍ଛିକାରଙ୍କ ସହ କିଛି ସମୟ ଆଲୋଚନା କରିଥିଲେ। ମହାପ୍ରଭୁଙ୍କ ଦର୍ଶନ ପରେ ସେ ଅତ୍ୟନ୍ତ ଆନନ୍ଦିତ ଥିବା କହିଥିବାବେଳେ ତାଙ୍କ ଖାତାରେ ମେଜର ଏଡିସି ଗୋପାଳ ସିଂ ପୁନିଆଙ୍କୁ ଦସ୍ତଖତ କରିବାକୁ ନିର୍ଦ୍ଦେଶ ଦେଇଥିଲେ। ପରେ କୌଳିକ ପଣ୍ଡା ରାଷ୍ଟ୍ରପତିଙ୍କ ନାମରେ ୧୪ ହାତିଆ ନାଲି ପତିତପାବନ ବାନା ନୀଳଚକ୍ରରେ ବାନ୍ଧିଥିଲେ। ବାନା ବନ୍ଧାଯିବାର ସମ୍ପୂର୍ଣ୍ଣ ଦୃଶ୍ୟ ରାଷ୍ଟ୍ରପତି ସପରିବାରେ ଶ୍ରୀମନ୍ଦିର ପରିସରରେ ରହି ଦେଖିଥିଲେ।
ଗର୍ଭଗୃହ ଦର୍ଶନକୁ ନେଇ ଚର୍ଚ୍ଚା
ମହାପ୍ରଭୁଙ୍କୁ ଗର୍ଭଗୃହ ଦର୍ଶନ ପାଇଁ ପାରମ୍ପରିକ ବେଶପୋଷାକ ଆବଶ୍ୟକ। ଯେକେହି ପୋଖରିଆକୁ ପ୍ରବେଶ କଲେ ପାରମ୍ପରିକ ବେଶପୋଷାକରେ ଯିବାର ବିଧି ରହିଛି। ସାଧାରଣ ଲୋକଙ୍କୁ ଗର୍ଭଗୃହ ଦୈନନ୍ଦିନ ଦର୍ଶନ ମିଳୁ ନାହିଁ। ଶନିବାର ରାଷ୍ଟ୍ରପତିଙ୍କ ସମେତ ତାଙ୍କ ପୂରା ପରିବାର ମଧ୍ୟ ଗର୍ଭଗୃହରେ ପ୍ରବେଶ କରି ମହାପ୍ରଭୁଙ୍କ ଦର୍ଶନ କରିଛନ୍ତି। ରାଷ୍ଟ୍ରପତିଙ୍କ ପରିବାର ଲୋକେ ଏହି ଦର୍ଶନ କରିଥିବା ନେଇ କୌଳିକ ପଣ୍ଡା ସୂଚନା ଦେଇଛନ୍ତି। ତେବେ ରାଷ୍ଟ୍ରପତିଙ୍କ ଏହି ଗର୍ଭଗୃହ ଦର୍ଶନକୁ ନେଇ ନାନା ଚର୍ଚ୍ଚା ହୋଇଛି।
୩ଟା ୪୦ରୁ ବନ୍ଦ ହେଲା ସାଧାରଣ ଦର୍ଶନ
ରାଷ୍ଟ୍ରପତି ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କାର୍ଯ୍ୟକ୍ରମ ହେତୁ ଅପରାହ୍ନ ୪ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ସାଧାରଣ ଦର୍ଶନ ବନ୍ଦ କରିବା ନେଇ ଶ୍ରୀମନ୍ଦିର ପ୍ରଶାସନ ନିଷ୍ପତ୍ତି ନେଇଥିଲା। ମାତ୍ର ରାଷ୍ଟ୍ରପତି ନିର୍ଦ୍ଧାରିତ ସମୟ ପୂର୍ବରୁ ପୁରୀରେ ପହଞ୍ଚତ୍ଥିବାରୁ ଏହାର ୨୦ ମିନିଟ୍ ପୂର୍ବରୁ ଦର୍ଶନ ବ୍ୟବସ୍ଥାକୁ ବନ୍ଦ କରି ଦିଆଯାଇଥିଲା। ଏଥିପାଇଁ ଶ୍ରଦ୍ଧାଳୁଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ସାଧାରଣ ରବିବାର ଶ୍ରୀମନ୍ଦିର ବନ୍ଦ ରହୁଥିବା ହେତୁ ଶନିବାର ସାଧାରଣ ଦର୍ଶନ ପାଇଁ ଜୋର ଗହଳି ଦେଖାଦେଇଥାଏ। ଏଣୁ ରାଷ୍ଟ୍ରପତିଙ୍କ ଦର୍ଶନ ସମୟରେ ଶ୍ରୀମନ୍ଦିର ବାହାରେ ପ୍ରବଳ ଭିଡ଼ ଦେଖିବାକୁ ମିଳିଥିଲା।