ବାଲିକୁଦା,୨୬ା୧୨(ସ୍ବ.ପ୍ର.):ବାଲିକୁଦା ବ୍ଲକ ବରମୁଣ୍ଡଳୀ ପଞ୍ଚାୟତ ଅନ୍ତର୍ଗତ ଦୁର୍ଗା ପୂଜା ପଡ଼ିଆରେ ଉପକୂଳ ରାଜପଥକୁ ନେଇ ରବିବାର ଏକ ସମାବେଶ ଆୟୋଜନ କରାଯାଇଥିଲା। ଏଥିରେ ୫ ହଜାରରୁ ଊର୍ଦ୍ଧ୍ୱ ମହିଳା ଯୋଗଦେଇ ନିଜ ହକ ପାଇଁ ଦାବି କରିଥିଲେ। ଗତ କିଛି ମାସ ହେବ ଏହାକୁ ନେଇ ଉପକୂଳ କ୍ରିୟାନୁଷ୍ଠାନ କମିଟି ଆନ୍ଦୋଳନାତ୍ମକ ପନ୍ଥା ଆପଣେଇ ଆସିଛି। ଏନେଇ କମିଟି ରାଜ୍ୟଠାରୁ ଆରମ୍ଭ କରି କେନ୍ଦ୍ର ସରକାର ପର୍ଯ୍ୟନ୍ତ ସବୁଠି ଦାବି କରିଛି ବୋଲି କମିଟି ପକ୍ଷରୁ ସମାବେଶରେ କୁହାଯାଇଥିଲା। ଏହି ଅବସରରେ କମିଟିର ନେତୃମଣ୍ଡଳୀ କହିଥିଲେ, ଉପକୂଳ ରାଜପଥ ପାଇଁ ପ୍ରଥମେ ଯେଉଁ ନକ୍ସା ପ୍ରସ୍ତୁତ ହୋଇଥିଲା ତାହାକୁ ପରିବର୍ତ୍ତନ କରାଯାଇଛି। ଉକ୍ତ ରାଜପଥକୁ ଉପକୂଳଠାରୁ ୨୫ କିଲୋମିଟର ଦୂରରେ ନିର୍ମାଣ ପାଇଁ ଯୋଜନା କରାଯାଇଛି। ଏହାକୁ ଉପକୂଳ କ୍ରିୟାନୁଷ୍ଠାନ କମିଟି କେବେ ହେଲେ ବରଦାସ୍ତ କରିବ ନାହିଁ। କାରଣ ଉପକୂଳ ରାଜପଥ ଆମ ୯ ପଞ୍ଚାୟତର ଜୀବନ ରେଖା ସଦୃଶ ା ନିଜର ହକ୍ ପାଇଁ ଏହି ଲଢ଼େଇ ଜାରି ରହିବ। ଆବଶ୍ୟକ ପଡ଼ିଲେ କୌଣସି ଅଧିକାରୀଙ୍କୁ ଅଞ୍ଚଳରେ ପୂରାଇ ଦିଆଯିବ ନାହିଁ ବୋଲି ନେତୃମଣ୍ଡଳୀ ଚେତାବନୀ ଦେଇଥିଲେ।
ଏଥିରେ ଇଂ.ଚଣ୍ଡେଶ୍ୱର ବେହେରା ଅଧ୍ୟକ୍ଷତା କରିଥିବା ବେଳେ ସତ୍ୟବ୍ରତ ବିଶ୍ୱାଳ ସ୍ବାଗତ ଭାଷଣ ଦେଇଥିଲେ। ରମେଶ ବହିରା ଧନ୍ୟବାଦ ଦେଇଥିଲେ। ସମାବେଶରେ ବାଲିକୁଦା ପୂର୍ବତନ ବିଧାୟକ ଡା. ଲଲାଟେନ୍ଦୁ ମହାପାତ୍ର, ବାଲିକୁଦା ବ୍ଲକ ଅଧ୍ୟକ୍ଷ ପ୍ରକାଶ ପ୍ରଧାନ, ଜିଲା ପରିଷଦ ସଦସ୍ୟା ତଟିନା ସ୍ବାଇଁ, ଆଇନଜୀବୀ ଡ. ସୁଶାନ୍ତ କାନୁନ୍ଗୋ, ପୂର୍ବତନ ବିଧାୟକ ସ୍ବର୍ଗତ ଉମେଶ ସ୍ବାଇଁଙ୍କ ପୁଅ ଚିରାଗ ସ୍ବାଇଁ ଓ ବୋହୂ ଶିଖା ସ୍ବାଇଁ, ଡା, ଶଶାଙ୍କ ସାହାଣୀ, ସୁବାସ ନାୟକ, ରବି ସେନାପତି, ସଦାନନ୍ଦ ବେହେରା, ପ୍ରଫେସର ମାନସ ବେହେରା ପ୍ରମୁଖ ଯୋଗଦେଇ କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ବର୍ଷି ଥିଲେ।