ବଇଣ୍ଡା, ୨୯।୩ (ଡି.ଏନ.ଏ.): କିଶୋରନଗର ବ୍ଲକ ଲୁହାମୁଣ୍ଡା ପ୍ରାଥମିକ ବିଦ୍ୟାଳୟରେ ଥିବା ଏକ ଅତିରିକ୍ତ ଶ୍ରେଣୀଗୃହକୁ ମଙ୍ଗଳବାର ବ୍ଲକ ପ୍ରଶାସନ ପକ୍ଷରୁ ରାସ୍ତା କାର୍ଯ୍ୟ କରୁଥିବା ଠିକାସଂସ୍ଥା ଜରିଆରେ ଭଙ୍ଗା ଯାଉଥିବା ବେଳେ ଉତ୍ତେଜନା ଦେଖାଦେଇଛି। ଗ୍ରାମବାସୀଙ୍କ ବିରୋଧ ଯୋଗୁ ଘଟଣାସ୍ଥଳରୁ ଠିକାସଂସ୍ଥା କର୍ମଚାରୀମାନେ ଜେସିବି ମେଶିନ ଛାଡି ପଳାଇଯାଇଥିବା ବେଳେ ଶ୍ରେଣୀଗୃହ ଭଙ୍ଗା ଅଧାରେ ଅଟକିଛି।
ଗ୍ରାମବାସୀଙ୍କ କହିବା ଅନୁଯାୟୀ, ୫୫ ନମ୍ବର ଜାତୀୟ ରାଜପଥ ସମ୍ପ୍ରସାରଣ ପାଇଁ ରାସ୍ତା କଡରେ ଥିବା ଶ୍ରେଣୀଗୃହଗୁଡିକ ଭଙ୍ଗା ଯାଇଥିଲା। ଏପରିକି ରାସ୍ତା କାମ କରୁଥିବା ଠିକା ସଂସ୍ଥା ପକ୍ଷରୁ ନୂତନ ଶ୍ରେଣୀ ଗୃହ ନିର୍ମାଣ କରାଯାଇଥିଲା। ପାଚେରି ନିକଟରେ ଏକ ପୁରୁଣା ଶ୍ରେଣୀଗୃହ ଥିବାବେଳେ ସେଥିରେ ବିଦ୍ୟାଳୟର ଆସବାବପତ୍ର ରଖିବା ସହ ଛାତ୍ରୀଛାତ୍ର ପଢୁଥିଲେ। ପାଚେରିର ୩ ଫୁଟ ଆଗକୁ ଉକ୍ତ ଶ୍ରେଣୀଗୃହ ଥିବାରୁ କାଳେ ଆଗାମୀ ଦିନରେ ରାସ୍ତା ନିର୍ମାଣରେ ବାଧା ଉପୁଜିବ, ସେହି ଆଶଙ୍କା କରି ଠିକାସଂସ୍ଥା ପକ୍ଷରୁ ଉକ୍ତ ଶ୍ରେଣୀଗୃହକୁ ଭାଙ୍ଗିବା ପାଇଁ ଯୋଜନା ହୋଇଥିଲା। ହେଲେ ପ୍ରଶାସନ ପକ୍ଷରୁ ବିଦ୍ୟାଳୟ ପରିଚାଳନା କମିଟି କିମ୍ବା ଗ୍ରାମବାସୀଙ୍କୁ ଏ ନେଇ ନୋଟିସ ନ କରି ହଠାତ ଠିକାସଂସ୍ଥା ପକ୍ଷରୁ ତହସିଲ ପ୍ରଶାସନ, ହଣ୍ଡପା ପୋଲିସ ଉପସ୍ଥିତିରେ ଶ୍ରେଣୀ ଗୃହକୁ ଭଙ୍ଗାଯାଇଥିଲା। ଫଳରେ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା। ଆବଶ୍ୟକ ନ ଥିବା ସତ୍ତ୍ୱେ ଏକତରଫା ଭାବେ ପ୍ରଶାସନିକ ଅଧିକାରୀଙ୍କୁ ହାତକରି ଠିକାସଂସ୍ଥା ଶ୍ରେଣୀଗୃହ ଭାଙ୍ଗୁଥିବା ଗ୍ରାମବାସୀ ଅଭିଯୋଗ କରିଥିଲେ। ଗ୍ରାମବାସୀଙ୍କ ବିରୋଧକୁ ଦେଖି ଘଟଣାସ୍ଥଳରୁ ଠିକାସଂସ୍ଥା କର୍ମଚାରୀମାନେ ପଳାଇଯାଇଥିଲେ। ଏ ନେଇ ତହସିଲଦାର ଶାନ୍ତି ସ୍ବରୂପ ମିଶ୍ର କହିଛନ୍ତି, ପ୍ରଶାସନ ପକ୍ଷରୁ ପୂର୍ବରୁ ସମୟ ଦିଆଯାଇଥିଲା। ଉକ୍ତ ଶ୍ରେଣୀଗୃହକୁ ଭାଙ୍ଗିବା ପାଇଁ ଏନ୍ଏଚ୍ଏଆଇ ପକ୍ଷରୁ ନିର୍ଦ୍ଦେଶନାମା ଆସିବା ପରେ ଭଙ୍ଗାଯାଇଛି।