ପାଟଣା,୭।୧୨(ବୀର କିଶୋର ଦାଶ): କେନ୍ଦୁଝର ଜିଲା ସାହାରପଡା ତହସିଲ ଖଡ଼ିକାପଦା ପଞ୍ଚାୟତର ଗୟଳକୁଣ୍ଡ ଗାଁ ବିରଳ ନଦୀରୁ ଶୁକ୍ରବାର ବିଳମ୍ବିତ ରାତ୍ରୀରେ ବାଲିମାଫିଆ ମାନେ ଚୋରା ବାଲି ଉତ୍ତୋଳନ କରି ଚାଲାଣ କରୁଥିବା ବେଳେ ଲୋକଙ୍କ ଘୋର ବିରୋଧର ସମ୍ମୁଖୀନ ହୋଇଛନ୍ତି। ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇଛି। ଚୋରା ବାଲି ଚାଲାଣ ବେଳେ ବ୍ୟବହୃତ ପ୍ରକ୍ଲେନ ମେସିନ ସହ ଏକ ବାଇକକୁ ଗ୍ରାମବାସୀ ଅଟକ ରଖିଛନ୍ତି। ବାଲି ମାଫିଆମାନେ ଉତ୍ୟକ୍ତ ଲୋକଙ୍କୁ ଦେଖି ଛତ୍ର ଭଙ୍ଗ ଦେଇ ଫେରାର ହୋଇଯାଇଛନ୍ତି। ମାଫିଆ ମାନେ ବାଲି ଚାଲାଣ ସମୟରେ ମାରଣାସ୍ତ୍ର ବ୍ୟବହାର କରୁଥିବା ସ୍ଥାନୀୟ ଲୋକେ କହିଛନ୍ତି। ଘଟଣାସ୍ଥଳରେ ଏହାକୁ ନେଇ ଉତ୍ତେଜନା ଲାଗିରହିଥିବା ବେଳେ ପୋଲିସ କିମ୍ବା ଖଣି ବିଭାଗ ପହଞ୍ଚି ନାହିଁ।
ସୂଚନା ଯେ, ବିରଳ ନଦୀ ସହ ପାଟଣା ତହସିଲ ଅନ୍ତର୍ଗତ ପାଟଣା ବୈତରଣୀ ନଦୀ ରାଜନଗର, କଇଣ୍ଡା, ଅଙ୍କୁରା, ନୂଆପଡ଼ା, ଦୁର୍ଗା ଦେଇପୂର, ଏରେଣ୍ଡଇ, ଡୁମୁରିଆ ଆଦି ଉତ୍ସରୁ ରାତି ଅଧରେ ବାଲି ମାଫିଆମାନେ ବାଲି ଚୋରାଚାଲାଣ କରୁଥିବାରୁ କେତେବେଳେ ବି ଏସବୁ ବାଲି ଘାଟରେ ଅପ୍ରୀତିକର ପରିସ୍ଥିତି ଘଟିପାରେ। ତହସିଲ ହାତରୁ ଲଘୁ ଖଣିଜ ସମ୍ପଦ ଖଣି ବିଭାଗ ହାତକୁ ଯିବା ପରେ ବେଆଇନ ଲଘୁ ଖଣିଜ ସଂପଦ ଚୋରି ଚାଲାଣ ବୃଦ୍ଧି ପାଇଥିବା ଆଲୋଚନା ହେଉଛି। ସୀମିତ ସଂଖ୍ୟକ କର୍ମଚାରୀଙ୍କୁ ନେଇ ଖଣି ବିଭାଗ ଚୋରିରେ ଅଙ୍କୁଶ ଲଗାଇ ପାରୁନାହିଁ।
