ପଟ୍ଟାମୁଣ୍ଡାଇ, ୨୬ା୧୦(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ କଲୋନୀ ମଧ୍ୟରେ ମୂଲ୍ୟବାନ ଶିଶୁଗଛ କଟା ଯାଇଥିବା ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ଏହାର ବିହିତ କାର୍ଯ୍ୟନୁଷ୍ଠାନ ନେବାକୁ ନଗର କଂଗ୍ରେସ ପକ୍ଷରୁ ଦାବି ହୋଇଛି। ପ୍ରାୟ ୫ଟି ମୂଲ୍ୟବାନ ଶିଶୁଗଛ କାଠ ଗଣ୍ଡି କଲୋନୀ ପରିସରରେ ମହଜୁଦ ରହିଛି। ନଗର କଂଗ୍ରେସ ସଭାପତି ଅମୂଲ୍ୟ ପ୍ରଧାନ କହିଛନ୍ତି, ପଟ୍ଟାମୁଣ୍ଡାଇ ପୌରାଞ୍ଚଳ ଅନ୍ତର୍ଗତ ବ୍ଲକ କଲୋନୀ ପରିସରରେ ପ୍ରାୟ ୧୫ରୁ ଉଦ୍ଧର୍ବ ବିରାଟକାୟ ଶିଶୁବୃକ୍ଷ ବହୁ ବର୍ଷ ଧରି ରହିଛି। ସେଥିମଧ୍ୟରୁ ଗୋଟିଏ ଗଛ ମୂଳ ଶୁଖି ଯାଇଥିବା ବେଳେ ଶନିବାର କେହି ଦୁର୍ବୃତ୍ତ ୫ଟି ଗଛ କାଟି ଦେଇଥିବା ଜଣାପଡିଛି। ଦୀପତଳ ଅନ୍ଧାର ପରି ତହସିଲ କ୍ୱାର୍ଟର୍ସ ରହିଥିଲେ ମଧ୍ୟ କିଭଳି ଏପରି ଗଛ ସବୁ କାଟି ଦିଆଗଲା ତାହା ସମସ୍ତଙ୍କୁ ଚକିତ କରିଛି। ସରକାର କୋଭିଡ-୧୯ ସମ୍ବେଦନଶୀଳ ସମୟରେ ବୃକ୍ଷ ରୋପଣ ହିଁ ଏକାନ୍ତ ବୋଲି ସାର୍ବଜନୀନ ସଚେତନତା କରାଉଛି। ଏଠି କାହା ସ୍ବାର୍ଥରେ ଏତେ ପରିମାଣର ଗଛ କାଟି ଦିଆଗଲା ବୋଲି ସେ ପ୍ରଶ୍ନ ଉଠାଇଛନ୍ତି। ଏ ନେଇ ପୌରାଞ୍ଚଳରେ ଚାପା ଉତ୍ତେଜନା ଦେଖାଦେଇଛି। ଗଛ କିଏ କାଟିଲା ଓ କାହା ପରାମର୍ଶରେ ଗଛ କଟା ହେଲା, ତା’ର ଖବର କାହା ପାଖରେ ନାହିଁ। ଏ ବାବଦରେ ବନ ବିଭାଗ କିଛି ଜାଣିନି କି ରାଜସ୍ବ ବିଭାଗ ପାଖରେ କଟା ଗଛ ସବୁର ହିସାବ ନାହିଁ। ଦିନ ଦି’ପହରେ ଏତେ ଗଛ କାଟି କିଏ କୁଆଡ଼େ ନେଲା, ତାହା ବଡ଼ ପ୍ରଶ୍ନବାଚୀ ହୋଇ ଛିଡ଼ା ହୋଇଛି। ଯଦି ଗଛକଟାକୁ ନେଇ ଠିକ୍ କାର୍ଯ୍ୟନୁଷ୍ଠାନ ନ ନିଆଯାଏ ତାହା ହେଲେ ପଟ୍ଟାମୁଣ୍ଡାଇ ନଗର କଂଗ୍ରେସ ଆନ୍ଦୋଳନକୁ ଓହ୍ଲାଇବ ବୋଲି ସେ ଚେତାଇ ଦେଇଛନ୍ତି। ଏ ସମ୍ପର୍କରେ ରେଞ୍ଜର ଚିତ୍ତରଞ୍ଜନ ବେଉରାଙ୍କୁ ପଚାରିବାରେ ଗଛକଟା ଅଭିଯୋଗ ପାଇବା ପରେ ସ୍ଥାନୀୟ ଫରେଷ୍ଟରଙ୍କୁ ପଠାଇଥିଲୁ। ସେଠାରେ ଗଛ କଟା ଯାଇଥିବା ଦେଖିବାକୁ ମିଳିଥିଲା। ଛୁଟି ଥିବାରୁ କାହାକୁ ଗଛ କାଟିବାକୁ ପରମିଶନ ଦିଆଯାଇ ନ ଥିଲା। ଯିଏ ବି ଗଛ କାଟିଥିବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଥିଲେ।