ନୂଆଦିଲ୍ଲୀ,୧୭।୪: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ର ଶୁକ୍ରବାର ଖେଳାଯାଇଥିବା ମ୍ୟାଚ୍ରେ ଚେନ୍ନାଇ ସୁପର କିଙ୍ଗ୍ସ ଏବଂ ପଞ୍ଜାବ କିଙ୍ଗ୍ସ ମଧ୍ୟରେ ମୁକାବିଲା ହୋଇଥିଲା। ଏଥିରେ ଚେନ୍ନାଇ ୬ ଉଇକେଟରେ ପଞ୍ଜାବକୁ ପରାସ୍ତ କରିଥିଲା। ପ୍ରତିଟି ବିଭାଗରେ ଧୋନୀଙ୍କ ନେତୃତ୍ୱାଧିନ ଚେନ୍ନାଇ ବିରୋଧୀ ଟିମ୍ ଉପରେ ଭାରି ପଡ଼ିଥିଲା। ସ୍ଥାନୀୟ ଓ୍ବାଙ୍ଖଡେ ଷ୍ଟାଡିୟମରେ ଅନୁଷ୍ଠିତ ଲୋ ସ୍କୋରିଂ ମ୍ୟାଚ୍ରେ ପ୍ରଥମେ ବ୍ୟାଟିଂ କରି ପଞ୍ଜାବ ୨୦ ଓଭରରେ ୮ ଉଇକେଟ ହରାଇ ୧୦୬ ରନ୍ କରିଥିଲା। ଜବାବରେ ଚେନ୍ନାଇ ୧୫.୪ ଓଭରରେ ୪ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ତେବେ ଶୋଚନୀୟ ଭାବେ ଚେନ୍ନାଇଠାରୁ ହାରିବା ପରେ ପଞ୍ଜାବର ଅଧିନାୟକ କେ.ଏଲ୍. ରାହୁଲ ବେଶ୍ ନିରାଶ ଏବଂ ଚିନ୍ତାଗ୍ରସ୍ତ ଜଣାପଡ଼ିଥିଲେ। ପରେ ସେ ପ୍ରତିକ୍ରିୟା ରଖି କହିଛନ୍ତି, ଆମ ପାଖରେ କହିବାକୁ ବେଶି କିଛି ନାହିଁ। କାରଣ ଯଦି ଗୋଟିଏ ଟିମ୍ ପ୍ରଥମରୁ ୫ ଉଇକେଟ ହରାଏ ତେବେ ଆଉ କ’ଣ ବାକି ରହିବ। ଚେନ୍ନାଇ ଟିମ୍, ବିଶେଷକରି ଚହର ପ୍ରଭାବି ବୋଲିଂ କରିଥିଲେ। ଜାଡେଜା ମୋତେ ରନ୍ଆଉଟ୍ କରିଦେଇଥିଲେ। ନହେଲେ ପିଚ୍ ଏତେ ଖରାପ ନ ଥିଲା। ଏଠାରେ ୧୫୦ରୁ ୧୬୦ ରନ୍ ସ୍କୋର କରିହୋଇଥାନ୍ତା। ମାତ୍ର ଆମେ ୧୦୦ରନ୍ ପାଖାପାଖି ପହଞ୍ଚି ପାରିଲୁ। ଭଲ କଥା ହେଲା ଯେ ଝେ ରିଚାର୍ଡସନ ଏବଂ ରିଲେ ମେରେଡିଥଙ୍କ ବୋଲିଂ ଠିକ୍ ଥିଲା। ଆଶା କରୁଛୁ ଆଗାମୀ ମ୍ୟାଚ୍ଗୁଡ଼ିକରେ ନିଶ୍ଚୟ ଜିତିବୁ। ପୁଣି ଥରେ ଯୋଜନା ପ୍ରସ୍ତୁତ କରିବୁ। କ’ଣ ପରିବର୍ତ୍ତନ କରାଯିବା ଉଚିତ ସେ ବିଷୟରେ ଚିନ୍ତା କରିବୁ। କାରଣ ଏହି ଷ୍ଟାଡିୟମରେ ପରବର୍ତ୍ତୀ କିଛି ମ୍ୟାଚ୍ ଖେଳାଯିବାର ରହିଛି ବୋଲି କ୍ରିକେଟର କହିଛନ୍ତି।
