![](https://www.dharitri.com/wp-content/uploads/2022/10/n-14-23.jpg)
ପ୍ୟାରିସ୍/ନୂଆଦିଲ୍ଲୀ,୩୦।୧୦ : ସହରରେ ବାସ କରୁଥିବା ଭାରତୀୟମାନେ ବେକାରୀ, ଦୁର୍ନୀତି, ଦରଦାମ୍ ବୃଦ୍ଧି ଏବଂ ମୁଦ୍ରାସ୍ଫୀତି ପାଇଁ ଚିନ୍ତିତ। ଫ୍ରାନ୍ସର ପ୍ୟାରିସରେ ଥିବା ଆଇପିଏସଓଏସ(ଇସସ୍ପୋସ୍)ର ମୁଖ୍ୟାଳୟ ପକ୍ଷରୁ ହୋଇଥିବା ସର୍ବଶେଷ ସର୍ଭେ ରିପୋର୍ଟରେ ଏହା ପ୍ରକାଶ ପାଇଛି । ରିପୋର୍ଟରେ କୁହାଯାଇଛି ଯେ ଦଶ ଜଣ ସହରୀ ଭାରତୀୟଙ୍କ ମଧ୍ୟରୁ ଦୁଇଜଣ ମୁଦ୍ରାସ୍ଫୀତି ପାଇଁ ଚିନ୍ତିତ। ଆଇପିଏସଏସ ସର୍ଭେ ‘ହ୍ବାଟ୍ ଓରିଜ୍ ଦ ଓ୍ବାଲର୍ଡ’ ରିପୋର୍ଟରେ ଉଲ୍ଲେଖ କରାଯାଇଛି ଯେ, ମୁଦ୍ରାସ୍ଫୀତି ନେଇ ଚିନ୍ତିତ ଥିବା ୨୯ଟି ଦେଶର ତାଲିକାରେ ସର୍ବନିମ୍ନରେ ଭାରତ ରହିଛି। ଅକ୍ଟୋବରରେ କରାଯାଇଥିବା ସର୍ଭେର ଫଳାଫଳ ଉପରେ ଆଧାର କରି ଏହି ରିପୋର୍ଟ ପ୍ରକାଶ ପାଇଛି।
ରିପୋର୍ଟରେ କୁହାଯାଇଛି ଯେ ବିଶ୍ୱ ବ୍ୟାପୀ ମୁଦ୍ରାସ୍ଫୀତି ନାଗରିକଙ୍କ ମଧ୍ୟରେ ଚିନ୍ତାର ଏକ ମୁଖ୍ୟ କାରଣ ପାଲଟିଛି ଏବଂ ଗତ ମାସରେ ଏହା ମଧ୍ୟ ଦୁଇ ପ୍ରତିଶତ ବୃଦ୍ଧି ପାଇଛି। ଏଥିସହ ବିଶ୍ୱସ୍ତରରେ ନାଗରିକମାନେ ଦାରିଦ୍ର୍ୟ, ସାମାଜିକ ଅସମାନତା, ବେକାରୀ, ହିଂସାତ୍ମକ ଅପରାଧ ଏବଂ ଆର୍ଥିକ ତଥା ରାଜନୈତିକ ଦୁର୍ନୀତି ଭଳି ପ୍ରସଙ୍ଗକୁ ନେଇ ଚିନ୍ତିତ ଅଛନ୍ତି।
ରିପୋର୍ଟରେ କୁହାଯାଇଛି ଯେ ୭୬ ପ୍ରତିଶତ ଭାରତୀୟ ବିଶ୍ୱାସ କରନ୍ତି ଯେ ଦେଶ ସଠିକ ଦିଗରେ ଗତି କରୁଛି। ଏହି ତାଲିକାରେ ସୌଦି ଆରବଶୀର୍ଷରେ ରହିଛି। ଏଠାରେ ୯୩ ପ୍ରତିଶତ ନାଗରିକ ବିଶ୍ୱାସ କରନ୍ତି ଯେ ଦେଶ ସଠିକ ଦିଗରେ ଆଗେଇ ଚାଲିଛି। ପ୍ରକାଶ ଥାଉକି, ସର୍ଭେର ଫଳାଫଳ ଉପରେ ଇସସ୍ପୋସ୍ ସିଇଓ ଅମିତ ଆଦାରକର କହିଛନ୍ତି, ଭାରତ ଭଳି ବଜାରରେ କରୋନା ମହାମାରୀର ପ୍ରଭାବ ଏବଂ ବିଶ୍ୱର ଆର୍ଥିକ ମାନ୍ଦାବସ୍ଥାର ପ୍ରଭାବ ମଧ୍ୟ ଅନୁଭୂତ ହେଉଛି। ଏହା ଚାକିରି ଉପରେ ପ୍ରଭାବ ପକାଉଛି, ଯାହାଦ୍ୱାରା ଦୁର୍ନୀତି, ଅପରାଧ ଏବଂ ସାମାଜିକ ଅସମାନତା ବୃଦ୍ଧି ପାଉଛି।