ମୁମ୍ବାଇ: ସର୍ବଦା ନିଜର ଅଜବ ଫ୍ୟାଶନ ସେନ୍ସ ସହ ବୋଲ୍ଡ ଲୁକ୍କୁ ନେଇ ଚର୍ଚ୍ଚାରେ ରୁହନ୍ତି ସୋସିଆଲ ମିଡିଆ ସେନସେଶନ ଉର୍ଫି ଜାଭେଦ। ବିଗ୍ ବସ୍ ଓଟିଟି ଫେମ୍ ଉର୍ଫି ଏବେ ଡାକ୍ତରଖାନାରେ ଭର୍ତ୍ତି ହେବାକୁ ନେଇ ଚର୍ଚ୍ଚାରେ ଅଛନ୍ତି। ଏକ୍ସପାଏରୀ ତେଲରେ ଖାଦ୍ୟ ରାନ୍ଧି ଖାଇବା ତାଙ୍କୁ ମହଙ୍ଗା ପଡ଼ିଛି। ଏନେଇ ସେ ନିଜେ ଇନଷ୍ଟାଗ୍ରାମରେ ସୂଚନା ଦେଇଛନ୍ତି।
ଉର୍ଫି ସୋସିଆଲ ମିଡିଆ ଆକାଉଣ୍ଟରେ ଏକ ଫଟୋ ଶେୟାର କରିଛନ୍ତି। ଏଥିରେ ତାଙ୍କ ଆଖି ଫୁଲିବା ସହ ସେ ହସ୍ପିଟାଲ ବେଡ୍ରେ ଶୋଇଥିବା ନଜର ଆସିଛନ୍ତି। ଉର୍ଫିଙ୍କ ଏଭଳି ଫଟୋକୁ ଦେଖି ୟୁଜର୍ସ ଓ ତାଙ୍କ ପ୍ରଶଂସକମାନେ ଚିନ୍ତାରେ ପଡିଯାଇଛନ୍ତି। ଉର୍ଫିଙ୍କ ଏଭଳି ଅବସ୍ଥା କିଏ କଲା ସେ ନେଇ ସମସ୍ତେ ପ୍ରଶ୍ନ କରୁଛନ୍ତି। ଜବାବରେ ଉର୍ଫି ଏକ୍ସପାଏରୀ ଅଲିଭ୍ ଅଏଲ୍ ଖାଇବା ଯୋଗୁ ଏଭଳି ଅବସ୍ଥା ହୋଇଥିବା ନେଇ ଖୁଲାସା କରିଛନ୍ତି।
ସେ ‘ଆମାଜନ୍’ରୁ ‘Jivo’ର ଏକ ଅଲିଭ୍ ଅଏଲ୍ ମଗାଇଥିଲେ। ଏହି ତେଲରେ ପ୍ରଥମେ ସେ ମଟର୍ ପନିର ରୋଷେଇ କରିଥିଲେ। ତାଙ୍କ ସହ ତାଙ୍କର ପୂରା କର୍ମଚାରୀମାନେ ମଧ୍ୟ ଏହି ତେଲରେ ତିଆରି ଖାଦ୍ୟ ଖାଇଥିଲେ। ପନିର ଖାଇବା ପରେ ଉର୍ଫିଙ୍କ ସହ ତାଙ୍କ କର୍ମଚାରୀଙ୍କ ସ୍ବାସ୍ଥ୍ୟ ବିଗିଡ଼ି ଯାଇଥିଲା। ପ୍ରଥମେ ତେଲରେ ରାନ୍ଧି ଖାଇବା ଦ୍ୱାରା ଏଭଳି ହୋଇ ନ ଥାଇପାରେ ବୋଲି ସେ ଭାବିଥିଲେ। ପୁଣି ଥରେ ସେ ସେହି ତେଲରେ ମାଛ ରୋଷେଇ କରି ଖାଇଥିଲେ। ଏହାପରେ ଉର୍ଫିଙ୍କ ସ୍ବାସ୍ଥ୍ୟାବସ୍ଥା ଅଧିକ ବିଗିଡି ଯାଇଥିଲା। ଶେଷରେ ତାଙ୍କୁ ହସ୍ପିଟାଲରେ ଭର୍ତ୍ତି ହେବାକୁ ପଡିଛି ବୋଲି ଇନ୍ଷ୍ଟା ଷ୍ଟୋରୀରେ ଉର୍ଫି କହିଛନ୍ତି। ଉର୍ଫିଙ୍କ ଏଭଳି ଅବସ୍ଥା ଦେଖି ତାଙ୍କ ପ୍ରଶଂସକମାନେ ତାଙ୍କର ଶୀଘ୍ର ଆରୋଗ୍ୟ କାମନା କରିଛନ୍ତି।
