ନୂଆଦିଲ୍ଲୀ,୨୪ା୫: ଦେଶବାସୀ କରୋନା ମହାମାରୀ ସହ ଯୁଝୁଥିବାବେଳେ ଭାଜପା ନେତାମାନଙ୍କ ଦେଖା ମିଳୁନାହିଁ। ଏଥିଯୋଗୁ କେନ୍ଦ୍ର ତଥା ଅନେକ ରାଜ୍ୟରେ କ୍ଷମତାସୀନ ଭାଜପା ପ୍ରତି ଲୋକଙ୍କ ଆସ୍ଥା ତୁଟିବାରେ ଲାଗିଛି। ଏହାକୁ ଦୃଷ୍ଟିରେ ରଖି ଲୋକଙ୍କ କଷ୍ଟ ଯନ୍ତ୍ରଣା ସମୟରେ ସେମାନଙ୍କ ସହ ଛିଡ଼ା ହେବା ପାଇଁ ଦଳୀୟ ନେତାଙ୍କୁ ଭାଜପା ପରାମର୍ଶ ଦେଇଛି। କୋଭିଡ୍-୧୯ର ଦ୍ୱିତୀୟ ଲହରରେ ସଂକ୍ରମିତଙ୍କୁ ସହାୟତା ଦେବାରେ ଭାଜପା ନେତାମାନଙ୍କ ତତ୍ପରତା ଦେଖିବାକୁ ମିଳୁ ନାହିଁ। ଚାରିଆଡ଼ୁ ସମାଲୋଚିତ ହେବା ପରେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ଭୁଲ୍ ସୁଧାରିବା ପାଇଁ ଉଦ୍ୟମ ଆରମ୍ଭ କରିଛନ୍ତି। ଭାଜପା ଶାସିତ ରାଜ୍ୟଗୁଡ଼ିକର ସରକାରଙ୍କୁ ନଡ୍ଡା ଏକ ପତ୍ର ଲେଖିଛନ୍ତି। ମେ’ ୩୦ରେ କେନ୍ଦ୍ରର ନରେନ୍ଦ୍ର ମୋଦି ସରକାରଙ୍କୁ ୭ ବର୍ଷ ପୂରିବାକୁ ଯାଉଥିବାବେଳେ ଏହି ଅବସରରେ କୌଣସି ଉତ୍ସବ ପାଳନ ନ କରିବାକୁ ସେ ପରାମର୍ଶ ଦେଇଛନ୍ତି। ଦଳୀୟ କର୍ମୀମାନେ ନିଜକୁ ସମାଜସେବାରେ ଉତ୍ସର୍ଗ କରିବା ଆବଶ୍ୟକ। ଭାଜପାକୁ ୭ ବର୍ଷ ହେଲା କ୍ଷମତାରେ ବସାଇଥିବାରୁ ଜନସାଧାରଣଙ୍କୁ ଧନ୍ୟବାଦ ଦିଆଯିବା ଉଚିତ। ସେହିପରି ମହାମାରୀରେ ନିଜ ମା’ବାପାଙ୍କୁ ହରାଇଥିବା ଅନାଥ ପିଲାମାନଙ୍କୁ ସହାୟତାର ହାତ ବଢ଼ାଇବା ପାଇଁ ଭାଜପା ଶାସିତ ରାଜ୍ୟଗୁଡ଼ିକ ଏହି ଅବସରରେ ଏକ ଯୋଜନା ଆରମ୍ଭ କରନ୍ତୁ ବୋଲି ନଡ୍ଡା ନିର୍ଦ୍ଦେଶ ଦେଇଛନ୍ତି। ଏନେଇ ନଡ୍ଡା ଗତ ୪ ଦିନ ମଧ୍ୟରେ ୩୧୭ ଭାଜପା ଏମ୍ପିଙ୍କ ସହ ଆଲୋଚନା କରିଛନ୍ତି। ନଡ୍ଡାଙ୍କ ଏହି ଚିଠି ରବିବାର ଭାଜପାର ମୂଳଲକ୍ଷ୍ୟ ‘ସେବା ହିଁ ସଙ୍ଗଠନ’କୁ ସ୍ମରଣ କରାଇଦେଇଛି।
