ଢେଙ୍କାନାଳ ଅଫିସ, ୨୪।୯: ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହେବାରେ ଲାଗିଛି। ସରକାରୀସ୍ତରରେ ରୋଗୀଙ୍କ ଲାଗି ନିଃଶୁଳ୍ପ ଯୋଗାଣ ହେଉଥିବା ଜରୁରୀ ଇଞ୍ଜେକ୍ସନ ଏବଂ ମେଡିସିନ ମିଳୁ ନ ଥିବାରୁ ରୋଗୀମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି। ଏପରି କି ରାତିରେ ଗ୍ୟାଷ୍ଟ୍ରିକ୍ କିମ୍ବା ପେଟ ଯନ୍ତ୍ରଣା ଭୋଗୁଥିବା ରୋଗୀ ଆସିଲେ ସେମାନଙ୍କୁ ଇଞ୍ଜେକ୍ସନ ନ ଦେଇ କଟକ ରେଫର କରି ଦିଆଯାଉଥିବା ଅଭିଯୋଗ ହେଉଛି।
ଜିଲା ମୁଖ୍ୟ ଚିକିତ୍ସାଳୟରେ ଅତ୍ୟାବଶ୍ୟକ ଔଷଧ ମହଜୁଦ୍ ରଖିବା, ରୋଗୀଙ୍କୁ ଆବଶ୍ୟକ ସମୟରେ ନିଃଶୁଳ୍କ ଭାବେ ଯୋଗାଇଦେବାକୁ ସରକାରୀସ୍ତରରେ ନିର୍ଦ୍ଦେଶ ରହିଛି। ତେବେ ଢେଙ୍କାନାଳ ଜିଲା ସ୍ବାସ୍ଥ୍ୟକେନ୍ଦ୍ରରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ଗ୍ୟାଷ୍ଟ୍ରିକ୍ ପାଇଁ ପାଣ୍ଟୋପ୍ରାଜୋଲ, ପେଟକାମୁଡ଼ା ପାଇଁ ଟୋଟାବେରିନ୍ ଇଞ୍ଜେକ୍ସନ୍ ଏଠାରେ ମିଳୁନାହିଁ। କାଶ ସିରପ୍ ମଧ୍ୟ ଦିଆଯାଉନାହିଁ। ଜିଲା ସ୍ବାସ୍ଥ୍ୟକେନ୍ଦ୍ରରେ ରୋଗୀସଂଖ୍ୟା ଅନୁପାତରେ ଗ୍ୟାଷ୍ଟ୍ରିକ ଏବଂ ପେଟକାମୁଡ଼ା ପାଇଁ ଦୈନିକ ଅନୂ୍ୟନ ୧୫୦ ଲେଖାଏ ଇଞ୍ଜେକ୍ସନ୍ ଯୋଗାଣ ହେବା କଥା। ତେବେ କିଛିଦିନ ହେଲା ଉଭୟ ମାତ୍ର ୨୦ରୁ ୨୫ ଡୋଜ୍ ଯୋଗାଣ କରାଯାଉଛି। ତେଣୁ ପ୍ରଭାବଶାଳୀ ବ୍ୟକ୍ତିମାନେ ଏହାର ସୁଯୋଗ ନେଉଥିବାବେଳେ ଗରିବ ରୋଗୀମାନେ ଏଥିରୁ ବଞ୍ଚତ୍ତ ହେଉଥିବା ଅଭିଯୋଗ ହେଉଛି। ସାଧାରଣ ରୋଗୀଙ୍କୁ ଇଞ୍ଜେକ୍ସନ ନ ଥିବା କହି ବାହୁଡ଼ାଇ ଦିଆଯାଉଛି। ତେଣୁ ସେମାନେ ବାଧ୍ୟ ହୋଇ ବାହାରୁ ଟଙ୍କା ଦେଇ ଇଞ୍ଜେକ୍ସନ କିଣୁଛନ୍ତି। ଏବେ ଗ୍ୟାଷ୍ଟ୍ରିକ୍ ଏବଂ ପେଟକାମୁଡ଼ା ରୋଗୀ ସଂଖ୍ୟା ବଢୁଥିବାରୁ ଏ ଦିଗରେ କର୍ତ୍ତୃପକ୍ଷ ଦୃଷ୍ଟି ଦେବାକୁ ଦାବି ହେଉଛି। ଏ ନେଇ ସିଡିଏମ୍ଓ ଡା. ଅଶୋକ କୁମାର ଦାସ କୁହନ୍ତି, ବୋଧେହୁଏ ଇଣ୍ଡେନ୍ ଅନୁଯାୟୀ ଇଞ୍ଜେକ୍ସନ ଆସି ନ ଥିବ। ସେଥିପାଇଁ ଅସୁବିଧା ହେଉଥିବ। ଅନୁଧ୍ୟାନ କରି ଦେଖିବେ ବୋଲି ସେ କହିଛନ୍ତି।