ନୂଆଦିଲ୍ଲୀ, ୬ା୩ : ନ୍ୟୁୟର୍କରୁ ନୂଆଦିଲ୍ଲୀ ଆସୁଥିବା ଆମେରିକାନ୍ ଏୟାରଲାଇନ୍ସର ଏକ ବିମାନରେ ଜଣେ ଭାରତୀୟ ଛାତ୍ର ନିଶାଗ୍ରସ୍ତ ଅବସ୍ଥାରେ ସହଯାତ୍ରୀଙ୍କ ଉପରେ ପରିସ୍ରା କରିଛନ୍ତି। ଘଟଣା ଜଣାପଡ଼ିବା ପରେ ଉକ୍ତ ଏୟାରଲାଇନ୍ସ ଆମେରିକା ବିଶ୍ୱବିଦ୍ୟାଳୟରେ ପଢ଼ୁଥିବା ଆର୍ଯ୍ୟ ବୋହ୍ରା(୨୧)ଙ୍କୁ ବ୍ୟାନ୍ କରିଛି। ସେ ଭବିଷ୍ୟତରେ ଆଉ ଆମେରିକା ବିମାନରେ ଯାତ୍ରା କରିପାରିବେ ନାହିଁ। ଆମେରିକାନ୍ ଏୟାରଲାଇନ୍ସର ସୂଚନା ଅନୁଯାୟୀ ଏଏ୨୯୨ ବିମାନଟି ନ୍ୟୁୟର୍କର କେନେଡି ଇଣ୍ଟରନ୍ୟାଶନାଲ ଏୟାରପୋର୍ଟରୁ ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚତ୍ବା ପରେ ପରିସ୍ରା କରିଥିବା ଛାତ୍ରଙ୍କ ବିରୋଧରେ ଥାନାରେ ଏତଲା ଦିଆଯାଇଥିଲା। ଛାତ୍ର ଜଣକ ପ୍ରବଳ ମାତ୍ରାରେ ନିଶାଗ୍ରସ୍ତ ଥିବାରୁ କ୍ରିଉ ସଦସ୍ୟମାନଙ୍କ ପରାମର୍ଶ ନ ଶୁଣି ସେମାନଙ୍କ ସହ ବାରମ୍ବାର ଯୁକ୍ତି କରିଥିଲେ ଓ ବିମାନରେ ବସିବାକୁ ଚାହିଁ ନ ଥିଲେ। ସେ ବିମାନ ଓ କ୍ରିଉମାନଙ୍କ ସୁରକ୍ଷା ପ୍ରତି ବିପଦ ଆଣିଥିଲେ ବୋଲି ଅଭିଯୋଗ ହୋଇଛି। ଶେଷରେ ସେ ପାଖ ସିଟ୍ରେ ବସିଥିବା ଜଣେ ଯାତ୍ରୀଙ୍କ ଉପରେ ପରିସ୍ରା କରିଥିଲେ।
ସୂଚନାଯୋଗ୍ୟ, ଗତବର୍ଷ ନଭେମ୍ବର ୨୬ରେ ନ୍ୟୁୟର୍କରୁ ନୂଆଦିଲ୍ଲୀ ଆସୁ୍ଥିବା ଏୟାର ଇଣ୍ଡିଆ ବିମାନରେ ଶଙ୍କର ମିଶ୍ରା ନାମକ ବ୍ୟକ୍ତି ଜଣେ ୭୦ ବର୍ଷୀୟା ସହଯାତ୍ରୀଙ୍କ ଉପରେ ପରିସ୍ରା କରି ଏୟାରଲାଇନ୍ସ ଦ୍ୱାରା ବ୍ୟାନ୍ ହୋଇଥିଲେ। ଏହାର ୧୦ ଦିନ ପରେ ଡିସେମ୍ବର ୬ରେ ପ୍ୟାରିସ୍ରୁ ଦିଲ୍ଲୀ ଆସୁଥିବା ଏୟାର ଇଣ୍ଡିଆ ବିମାନରେ ଜଣେ ଯାତ୍ରୀ ପାଖ ସିଟ୍ରେ ଥିବା ମହିଳା ସହଯାତ୍ରୀଙ୍କ ବ୍ଲାଙ୍କେଟ୍ରେ ପରିସ୍ରା କରିଥିଲେ।